ၵူၼ်းႁိူၼ်းလဵဝ်ၵၼ် ၵိၼ်ၺႃးႁဵပ်းမိူဝ်ႇသေ လႆႈလူႉတၢႆ 4 ၵေႃႉ ၼႂ်းၸႄႈဝဵင်းသီႇပေႃႉ။ ႁွင်ႈၵၢၼ်ပိုၼ်ၽၢဝ်ႇ SSPP ဢွၵ်ႇဝႆႉ။
ဝၼ်းတီႈ 17-18/6/2020 ၶၢဝ်းတၢင်း 2 ဝၼ်းၼၼ်ႉ ၵူၼ်းဝၢၼ်ႈပၢင်ၶႄႇ ဢိူင်ႇမိူင်းတုင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁႃႁဵပ်းမႃးၵိၼ်သေ ၺႃးႁဵပ်းမိူဝ်ႇ၊ ၼႂ်းႁိူၼ်းလဵဝ်ၵူၺ်းလူႉတၢႆ 4 ၵေႃႉ 1.လုင်းပၢၼ်း ဢႃယု 90 ပီ၊ 2.ၸၢႆးယူၺ်း ဢႃယု 40 ပီ၊ 3.ၼၢင်းယူၺ်း ဢႃယု 38 ပီလႄႈ 4.လုၵ်ႈယိင်း ၼၢင်းၶမ်း ဢႃယု 12 ပီ -ၼႆယဝ်ႉ။
ၸၢႆးလႅင်း ၵူၼ်းၼုမ်ႇဝၢၼ်ႈႁႆး လၢတ်ႈတီႈၽူႈတွႆႇႁွၵ်ႈဝႃႈ“ ၸႂ်ႈၶႃႈဢေႃႈ လႆႈလူႉတၢႆ ထႅင်ႈ 4 ၵေႃႉ၊ ပဵၼ်ၵူၼ်းႁိူၼ်းလဵဝ်ၵၼ်ၵူၺ်းၶႃႈ၊ ၵႂႃႇၵဵပ်းႁဵပ်းမႃးၵိၼ်ၼႆၶႃႈဝႃႇ။ ၵဵဝ်ႇလူၺ်ႈလွင်ႈၵူၼ်းမိူင်းၵိၼ်ၺႃးႁဵပ်းမိူဝ်ႇတၢႆၼႆႉ ယူႇတီႈ ၸဝ်ႈသၢႆၾႃႉ ၸီႉသင်ႇ ၼႂ်းၼႃႈတီႈဢုပ်ႉပိူင်ႇ ၶွင် SSPP တင်းသဵင်ႈဝႃႈ ႁႂ်ႈပၼ်ပိုၼ်ႉႁူႉၵူၼ်းမိူင်း ၵဵဝ်ႇၵပ်းလွင်ႈႁဵပ်းၼႆႉ၊ ၵွပ်ႈဝႃႈ ၼႂ်းလိူၼ်ၼႆႉၵူၺ်း ၵူၼ်းမိူင်းၵိၼ်ၺႃးႁဵပ်းမိူဝ်ႇ မီးၵႂႃႇ 8 ၵေႃႉယဝ်ႉ။ ႁႂ်ႈပၼ်ၾၢင်ႉထိုင်ၵူၼ်းမိူင်းဝႃႈ ယႃႇပေလႃႈလီႈၵိၼ်ႁဵပ်း၊ ပေႃးဢမ်ႇႁူႉပဵၼ်ႁဵပ်းသင်ၼႆ ယႃႇပေၵိၼ်ၸိူဝ်းၼႆႉ၊ ပေႃးလႃႈလီႈၵိၼ်လူင်ၵႂႃႇ တေၸၢင်ႈလူႉတၢႆ ” ဝႃႈၼႆ။
ၵဵဝ်ႇၵပ်းပိူင်ပဵၼ်လွင်ႈလူႉတၢႆၼႆႉ မိူဝ်ႈဝၼ်းတီႈ 17 ယၢမ်းၵၢင်ၼႂ်ႁိမ်း 8 မူင်းၼၼ်ႉ ၸၢႆးယူၺ်း ဢႃယု 40 ပီ လူႉတၢႆ ဢွၼ်တၢင်း။ ဝၢႆးၼၼ်ႉ လုင်းပၢၼ်း ဢႃ ယု 90 ပီ လူႉတၢႆထႅင်ႈ ၼႂ်းဝၼ်းလဵဝ် 2 ၵေႃႉ။ ထိုင်မႃး ဝၼ်းတီႈ 18 ယၢမ်းၵၢင်ၼႂ် 10 ထိုင် 11 မူင်းသမ်ႉ ၼၢင်းယူၺ်း ဢႃယု 38 ပီ လူႉတၢႆထႅင်ႈလႄႈ လုၵ်ႈယိင်း ၼၢင်းၶမ်း ဢႃယု 12 ပီၵေႃႈ လႆႈလူႉတၢႆၸွမ်းထႅင်ႈ ႁွင်ႈၵၢၼ်ပိုၼ်ၽၢဝ်ႇ SSPP ဢွၵ်ႇဝႆႉ ၼင်ႇၼႆ။
ၼႂ်းလိူၼ်ၵျုၼ်ႊၼႆႉၵူၺ်း ၵူၼ်းမိူင်းၵိၼ်ၺႃးႁဵပ်းမိူဝ်ႇလႆႈလူႉတၢႆၵႂႃႇ 8 ၵေႃႉယဝ်ႉ၊ တီႈသီႇပေႃႉ 4 ၵေႃႉ၊ တၢင်ႉယၢၼ်း 2 ၵေႃႉလႄႈ ၵေးသီး 2 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ