တပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းလွတ်ႈလႅဝ်းၶၢင် KIA ပဵၼ်ပၢင်တိုၵ်းၵၼ် တင်းပွတ်းမိူင်းၵူဝ်း ၸိုင်ႈတႆးပွတ်းႁွင်ႇ ၾၢႆႇတပ်ႉသိုၵ်းမၢၼ်ႈ မီးလွင်ႈလူႉတၢႆလႄႈ မၢတ်ႇၸဵပ်း ဝႃႈၼႆ။
ဝၼ်းတီႈ 01/02/2018 ယၢမ်းၵၢင်ၼႂ် 10 မူင်းပၢႆၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ လုၵ်ႉတၢင်းမိူင်းပေႃႈ ၶဝ်ႈမိူင်း ၵူဝ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၼၼ်ႉ ၺႃးမၢၵ်ႇဢၼ်သိုၵ်းၶၢင် KIA ႁၢင်ႈၵၢင်ဝႆႉ တႅၵ်ႇသႂ်ႇ သွင်ၾၢႆႇလႆႈ ပဵၼ်ပၢင်တိုၵ်းၵၼ် ဝႃႈၼႆ။
ႁွင်ႈၵၢၼ်ၶၢဝ်ႇ KNG လၢတ်ႈဝႆႉဝႃႈ “ တပ်ႉသိုၵ်းမၢၼ်ႈ တပ်ႉမ 11 ဢဵၼ်ႁႅင်း မွၵ်ႈ 60 ၵေႃႉ ပဵၼ်သၢႆသိုၵ်းမိူင်းပေႃႈ။ တပ်ႉသိုၵ်းၶၢင်သမ်ႉ တပ်ႉၵွင် 6 ဢၼ်တူင်ႉၼိုင်ထုင်ႉၼၼ်ႉ” ဝႃႈၼႆ။
တၢင်းၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်လႆႈလူႉတၢႆၼၼ်ႉ ၼႂ်းၼၼ်ႉ ပႃးၸၼ်ႉၶုၼ်သိုၵ်းၵေႃႉၼိုင်ႈ၊ ႁူဝ် သိုၵ်းၼိုင်ႈၵေႃႉ။ ဢၼ်လႆႈမၢတ်ႇၸဵပ်းသမ်ႉ 7 ၵေႃႉ ၼႂ်းၼၼ်ႉ ပႃးၸၼ်ႉၶုၼ်သိုၵ်းၵေႃႉၼိုင်ႈ ဝႃႈၼႆ။
တပ်ႉသိုၵ်းလူင်ပွင်ၸိုင်ႈမၢၼ်ႈ တင်း KIA ၼႆႉ ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းမိူင်းၶၢင်သေဢမ်ႇၵႃး ပၢင်တိုၵ်းၶဝ် သိုပ်ႇပဵၼ်ပႃး ၼႂ်းမိူင်းတႆးပွတ်းႁွင်ႇထႅင်ႈ ဝႃႈၼႆ။
ၶေႃႈမုလ်း – Kachinnews
