သင်ၶၸဝ်ႈမိူင်းလၢႆးၶႃႈ ၼမ်းၼႃႈ ၽုၵ်ႇတူၼ်ႈမႆႉႁဵင်တူၼ်ႈပၢႆ

သင်ၶၸဝ်ႈမိူင်းလၢႆးၶႃႈ ဢွၼ်ႁူဝ်ၼမ်းၼႃႈ ၽုၵ်ႇသွမ်ႈတူၼ်ႈမႆႉ တီႈလွႆၵွင်းမူး မၢၵ်ႇႁိၼ်ၼမ်ႉ ၼႂ်းၸႄႈဝဵင်းလၢႆးၶႃႈ ႁဵင်တူၼ်ႈပၢႆ။

ဝၼ်းတီႈ 20/6/2020 ယၢမ်းၵၢင်ၼႂ် 9 မူင်း ယူႇတီႈသင်ၶၼႃယၵ တူင်ႇဝဵင်းလၢႆးၶႃႈ ဢွၼ်ႁူဝ်ၼမ်းၼႃႈသေ ၽုၵ်ႇတူၼ်ႈမႆႉ တီႈလွႆၵွင်းမူး မၢၵ်ႇႁိၼ်ၼမ်ႉ ဢၼ်မီးဝႆႉၼႂ်းၵႄႈ ဝၢၼ်ႈသၢင်းတင်း ဝၢၼ်ႈထီႇ ၸႄႈဝဵင်းလၢႆးၶႃႈ ၸိုင်ႈတႆး ပွတ်းၸၢၼ်း ၼႆယဝ်ႉ။

ၸဝ်ႈၶူး ၽူႈတူင်ႉၼိုင် ၼႂ်းသင်ၶၸဝ်ႈ တူင်ႇဝဵင်းလၢႆးၶႃႈ ၸဝ်ႈၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ၼင်ႇႁိုဝ် ႁႂ်ႈပဵၼ်တီႈ မၢႆတွင်း ယၢမ်းၽွင်း ၸဝ်ႈပေႃႈသိလ်ထမ်းၶူးဝႃးဝုၼ်းၸုမ်ႉ ဢတိတ်ႉထၢၼ်ႇဝႆႉ ၶဝ်ႈထမ်ႈတီႈမိူင်းၵႅတ်ႇ 3 ပီ 3 လိူၼ် ပၢႆ 3 ဝၼ်း။ လိူဝ်သေၼၼ်ႉ ႁပ်ႉတုင်းဢဝ် ၶေႃႈသင်ႇသွၼ် ၸဝ်ႈၶူးမေႃလူင် Dr. ၶမ်းမၢႆ ထမ်မသႃမိ ၽူႈၵေႃႇတင်ႈၸၼ်ႉၸွမ် ပုတ်ႉထမိူင်းတႆး တီႈဝဵင်းလူင်တူၼ်ႈတီးသေလႄႈ ယူႇတီႈသင်ၶၼႃယၵ တူင်ႇဝဵင်းလၢႆးၶႃႈႁဝ်း ၸင်ႇဢွၼ်ႁူဝ်သေ ၽုၵ်ႇတူၼ်ႈမႆႉၵႂႃႇ” ဝႃႈၼႆ။

တူၼ်ႈမႆႉ ဢၼ်ၽုၵ်ႇသွမ်ႈၵႂႃႇတီႈလွႆၵွင်းမူး မၢၵ်ႇႁိၼ်ၼမ်ႉၼႆႉ တင်းမူတ်းမီးမွၵ်ႈ 1,000 ပၢႆ။ ၵမ်ႈၼမ် ပဵၼ်မႆႉ မွၵ်ႇၵွၼ်၊ မႆႉယူမ်းလိူင်၊ မွၵ်ႇၶဵတ်ႉလႃး၊ မွၵ်ႇသႅင်လႅင်လႄႈ မွၵ်ႇၸၢမ်ၶမ်း ၸိူဝ်းၼႆႉ။

ဢွင်ႈတီႈၽုၵ်ႇတူၼ်ႈမႆႉ တီႈလွႆၵွင်းမူး မၢၵ်ႇႁိၼ်ၼမ်ႉၼႆႉ ယၢၼ်ၵႆတင်းဝဵင်းလၢႆးၶႃႈ မွၵ်ႈ 7 လၵ်း ၼႆယဝ်ႉ။

လိူဝ်ၼၼ်ႉ ပေႃးထိုင်မႃး ဝၼ်းတီႈ 26-27/6/2020 ယူႇတီႈသြႃႇလႄႈတၵ်ႉၵႃႇ မိူင်းလၢႆးၶႃႈ တေႁူမ်ႈၵၼ်ၽုၵ်ႇတူၼ်ႈမႆႉ တီႈတိၼ်လွႆၵွင်းမူးထမ်ႇမသႃႇမိၸုမ်ႈမိူင်း ႁိမ်းၼမ်ႉႁူးတႃသႂ် မိူင်းလၢႆးၶႃႈ တႃႇ 5,000 တူၼ်ႈ ၼႆယဝ်ႉ။

ယိူင်းဢၢၼ်းပိူင်လူင် ၵၢၼ်ၽုၵ်ႇတူၼ်ႈမႆႉၼႆႉ တွၼ်ႈတႃႇ ႁႂ်ႈပဵၼ်တီႈမၢႆတွင်း သႃႇသၼႃႇပုတ်ႉထၸဝ်ႈ 5,000 ပီမိူင်း၊ ႁႂ်ႈလႆႈႁူမ်ႈသၢင်ႈၵုသူလ်ပႃႇရမီႇၸွမ်း ၸဝ်ႈပေႃႈသိလ်ထမ်းဝုၼ်းၸုမ်ႉ ဢတိတ်ႉထၢၼ်ႇၶဝ်ႈထမ်ႈ 3 ပီ 3 လိူၼ်ပၢႆ 3 ဝၼ်း တီႈထမ်ႈမိူင်ႈၵႅတ်ႇလႄႈ ႁႂ်ႈပဵၼ်တီႈႁူမ်ၸူမ်းၸွမ်းၵုသူလ်ပႃႇရမီႇ ၸဝ်ႈၶူးမေႃလူင် ၻွၵ်ႊတိူဝ်ႊၶမ်းမၢႆ ထမ်ႇမသႃႇမိ ၽူႈဢွၼ်ႁူဝ်ၵေႃႇတင်ႈ ၸၼ်ႉၸွမ်ပုတ်ႉထတ်း မိူင်းတႆး ၼႆယဝ်ႉ။