Thursday, March 28, 2024

ပၢင်လိူၵ်ႈတင်ႈ 2020 ၼႆႉ ပႃႇတီႇသိူဝ်ၽိူၵ်ႇဢၢၼ်းလႆႈ 58 တီႈၼင်ႈ

Must read

ပၢင်လိူၵ်ႈတင်ႈ ပီ 2020 ၼႆႉ ပႃႇတီႇသိူဝ်ၽိူၵ်ႇ SNDP လၢမ်းဝႆႉ တေဢၢၼ်းလႆႈတီႈၼင်ႈၼႂ်းသၽႃး 58 တီႈၼင်ႈ လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ လၢတ်ႈ။

Photo by – SNDP/ လုင်းၸၢႆးဢၢႆႈပဝ်ႈ ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP

ပေႃးထိုင်မႃး လိူၼ်ၼူဝ်ႊဝႅမ်ႊၿိူဝ်ႊ 2020 ၸိုင် ယူႇတီႈၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် တေၸတ်းႁဵတ်း ပၢင်လိူၵ်ႈတင်ႈ ၼႂ်းမိူင်းႁူမ်ႈတုမ်ပတ်းပိုၼ်ႉ။ ပၢင်လိူၵ်ႈတင်ႈၼႆႉ ယူႇတီႈတီႇမူဝ်ႇၶရႅတ်ႉတိၵ်ႉ ပႃႇတီႇၸၢဝ်းၶိူဝ်းတႆး (SNDP) ႁိုဝ် ပႃႇတီႇသိူဝ်ၽိူၵ်ႇ တေၶဝ်ႈလိူၵ်ႈတင်ႈ ၼႂ်းၸႄႈမိူင်းတႆး တင်းသၢမ်ပွတ်းတွၼ်ႈ ၼႆယဝ်ႉ။

- Subscription -

လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ (SNDP) လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၵူႈပွၵ်ႈၼၼ်ႉ ႁဝ်းၶႃႈပေႉမႃး လႆႈတီႈၼင်ႈ 58 တီႈ။ ပၢင်လိူၵ်ႈတင်ႈပီၼႆႉ ႁဝ်းၶႃႈ လၢမ်းဝႆႉ တေဢၢၼ်းလႆႈၵႃႈၼၼ်ႉ” ဝႃႈၼႆ။

မိူဝ်ႈပၢင်လိူၵ်ႈတင်ႈပီ 2010 ၼၼ်ႉ ယူႇတီႈပႃႇတီႇသိူဝ်ၽိူၵ်ႇ (SNDP) လႆႈတီႈၼင်ႈၼႂ်းသၽႃး တင်းမူတ်း 58 တီႈၼင်ႈ။ လႆႈတီႈယူႇၽွင်းလူင် 6 ၵေႃႉသေ မီးၵၢၼ်တူဝ်ထူပ်းဝႆႉတင်းၼမ်။ ၵွပ်ႈၼၼ်လႄႈ သင်ဝႃႈ ပၢင်လိူၵ်ႈတင်ႈ 2020 လႆႈဢွင်ႇပေႉမႃးၼႆ တေဢၢၼ်းပဵၼ်လူင်ပွင်ၸိုင်ႈမိူင်းတႆး လုင်းၸၢႆးဢၢႆႈပဝ်ႈ ထတ်းသၢင်ဝႆႉၼင်ႇၼႆ။

ပၢင်လိူၵ်ႈတင်ႈ ၼႂ်းပီ 2020 ၼႆႉ ယူႇတီႈပႃႇတီႇသိူဝ်ၽိူၵ်ႇ SNDP တေၶဝ်ႈၶႅင်ႇၼႂ်းမိူင်းတႆးၵူၺ်းဢမ်ႇၵႃး ပႃးၸဵမ်ၼႂ်းၸႄႈမိူင်းၶၢင်၊ တိူင်းတႃႈလိူဝ်ႇ ၸိူဝ်းၼႆႉ တေၶဝ်ႈလိူၵ်ႈတင်ႈမွၵ်ႈ 30 ၸႄႈဝဵင်း ၼႆယဝ်ႉ။

လုင်းၸၢႆးဢၢႆႈပဝ်ႈ သိုပ်ႇလၢတ်ႈဝႃႈ “ ႁဝ်းၶႃႈ တေၶဝ်ႈၶေႉၶႅင်ႇ မွၵ်ႈ 30 ၸႄႈဝဵင်းၼႆႉ။ မိူၼ်ၼင်ႇ မိူင်းတႆး ပွတ်းဢွၵ်ႇ၊ ပွတ်းၸၢၼ်း၊ ပွတ်းႁွင်ႇ ယဝ်ႉၵေႃႈ ၼႂ်းမိူင်းၶၢင်၊ တိူင်းဝဵင်းလိူဝ်ႇသမ်ႉ တေၶဝ်ႈၶႅင်ႇတီႈၼင်ႈၽွင်းလူင်ၾၢႆႇၸၢဝ်းၶိူဝ်း တႆး” ဝႃႈၼႆ။

ၼွၵ်ႈလိူဝ်ၼၼ်ႉ ပၢင်လိူၵ်ႈတင်ႈ ပီ 2020 ၼႆႉ ယူႇတီႈပႃႇတီႇသိူဝ်ၽိူၵ်ႇ တေပၼ်ႁႅင်း ၼၢင်းယိင်းလႄႈ ၵူၼ်းၼုမ်ႇ ၶဝ်ႈလိူၵ်ႈတင်ႈတင်းၼမ်၊ ၽူႈယႂ်ႇၵူၼ်းလူင် ၼႂ်းပႃႇတီႇတႄႉ တေဢမ်ႇၶဝ်ႈလိူၵ်ႈတင်ႈၸွမ်းယဝ်ႉ ဝႃႈၼႆ။

“ႁဝ်းၶႃႈမုင်ႈမွင်းဝႆႉ ၼင်ႇႁိုဝ် ၼၢင်းယိင်း လႄႈ ၵူၼ်းၼုမ်ႇ ပေႃးတေလႆႈၶဝ်ႈပႃးမႃးမွၵ်ႈ 20-30 ပိူဝ်ႊသႅၼ်ႊ(30%)ၼႆႉ။ ၶႃႈႁဝ်းတႄႉ ဢမ်ႇၶဝ်ႈလိူၵ်ႈတင်ႈယဝ်ႉ။ ႁဝ်းၶႃႈ တေပၼ်ၵူၼ်းၼုမ်ႇၶဝ်ႈလိူၵ်ႈတင်ႈဢဝ်” လုင်းၸၢႆးဢၢႆႈပဝ်ႈ လၢတ်ႈၼႄၼင်ႇၼႆ။

မိူဝ်ႈပီ 2015 ၼၼ်ႉ ပႃႇတီႇသိူဝ်ၽိူၵ်ႇ SNDP လႆႈတီႈၼင်ႈၼႂ်းသၽႃးၸႄႈမိူင်းတႆး ၼိုင်ႈတီႈၼင်ႈ၊ ပဵၼ်တီႈမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း