သိုၵ်းလူင်ပွင်ၸိုင်ႈမၢၼ်ႈ တီႉၺွပ်းၵူၼ်းဝၢၼ်ႈ 5 ၵေႃႉ ၵႂႃႇၸွမ်းသၢႆသိုၵ်း သူင်ႇတၢင်း၊ ႁဵတ်းႁႂ်ႈႁၢမ်းၵၢၼ်ႁၢမ်းငၢၼ်း ဝႃႈၼႆ။

သိုၵ်းလူင်ပွင်ၸိုင်ႈမၢၼ်ႈ ႁွင်ႉၵူၼ်းဝၢၼ်ႈၼွင်ႁွႆ 3 ၵေႃႉလႄႈ တီႈၶႅမ်ႉပၢင်သဝ်း ဝၢၼ်ႈၵႃလႅင် 2 ၵေႃႉ ႁူမ်ႈၵၼ် 5 ၵေႃႉ ၵႂႃႇၸွႆးသၢႆသိုၵ်းၶဝ်၊ ထိုင်မႃးဝၼ်းတီႈ 18/6/2020 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈပၢႆၼႆႉ ၸင်ႇပွႆႇတူဝ်ပွၵ်ႈမႃး ၼႆယဝ်ႉ။

ၵူၼ်းပိုၼ်ႉတီႈ ၽူႈၸၢႆးၵေႃႉၼိုင်ႈ ဢၼ်ႁၼ်တႂ်ႈၼႃႈ/ တႃ လၢတ်ႈတီႈၽူႈတွႆႇႁွၵ်ႈဝႃႈ “သိုၵ်းမၢၼ်ႈႁွင်ႉၵူၼ်းဝၢၼ်ႈၼွင်ႁွႆ 3 ၵေႃႉၵႂႃႇ။ ၸိူဝ်းၶဝ်ပဵၼ်ၸၢဝ်းတဢၢင်း။ သမ်ႉထႅင်ႈ ၵူၼ်းဝၢၼ်ႈ တီႈပၢင်သဝ်းၵူၼ်းပၢႆႈၽေးထႅင်ႈ 2 ၵေႃႉ ပဵၼ်ၸၢဝ်းၶၢင်၊ ၶဝ်ႁွင်ႉၵႂႃႇၸွမ်းသၢႆသိုၵ်းၶဝ် တႃႇၼႄသၢႆတၢင်း” ဝႃႈၼႆ။

ၵူၼ်းဝၢၼ်ႈ 2 ၵေႃႉၼၼ်ႉ ၵႂႃႇႁဵတ်းၵၢၼ်သူၼ်သေ ၽွင်းပွၵ်ႈမႃးၶိုၼ်းတီႈပၢင်သဝ်းၵူၼ်းပၢႆႈၽေးၼၼ်ႉ ထုၵ်ႇသိုၵ်းလူင်ပွင်ၸိုင်ႈမၢၼ်ႈ တီႉၺွပ်းႁွင်ႉၵႂႃႇ ၸွမ်း ဝႃႈၼႆ။

“ၵူၼ်းဝၢၼ်ႈၼွင်ႁွႆ 3 ၵေႃႉ ၼၼ်ႉတႄႉ သိုၵ်းမၢၼ်ႈ မႃးႁွင်ႉဢဝ်တီႈဝၢၼ်ႈၵမ်းလဵဝ်။ ၵူၼ်းဝၢၼ်ႈ 2 ၵေႃႉ ၼၼ်ႉသမ်ႉ ပွၵ်ႈသူၼ်ႁႆႈမႃးသေ ထုၵ်ႇႁွင်ႉၵႂႃႇ၊ သိုၵ်းမၢၼ်ႈၶဝ်ႁွင်ႉၵႂႃႇတႃႇၼႄတၢင်း။ ၵူၼ်းၸၢႆးဢၼ်ထုၵ်ႇ သိုၵ်းမၢၼ်ႈႁွင်ႉၵႂႃႇၼၼ်ႉ တေမီးဢႃယုမွၵ်ႈ 20-30 ၸိူဝ်းၼႆႉ” ၽူႈၸၢႆးၵေႃႉဢၼ်ႁၼ်သိုၵ်းမၢၼ်ႈ ႁွင်ႉၵူၼ်းဝၢၼ်ႈၵႂႃႇၼၼ်ႉ လၢတ်ႈၼႄၼင်ႇၼႆ။

ထိုင်မႃး ယၢမ်းဝၢႆးဝၼ်းမွၵ်ႈ 3 မူင်းၶိုင်ႈၼၼ်ႉ သိုၵ်းလူင်ပွင်ၸိုင်ႈမၢၼ်ႈ ၸင်ႇပွႆႇတူဝ် ၵူၼ်းမိူင်း 5 ၵေႃႉၼၼ်ႉ ပွၵ်ႈမႃးၶိုၼ်းယဝ်ႉဝႃႈၼႆ။

ယၢမ်းလဵဝ်ၼႆႉ ပဵၼ်ၶၢဝ်းတၢင်းပဵၼ်ၶူဝ်ႊဝိတ်ႉ 19 ၊ ၵူၼ်းမိူင်းဢမ်ႇလႆႈႁဵတ်းၵၢၼ်ငၢၼ်းလီလီ၊ ယၢမ်းလဵဝ်သမ်ႉမႃးပဵၼ် ပၢင်တိုၵ်းထႅင်ႈလႄႈ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ႁူပ်ႉ လွင်ႈယၢပ်ႇၽိုတ်ႇ လိူဝ်ႁႅင်း ၼႆယဝ်ႉ။

တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်ႁွင်ႉၵူၼ်းဝၢၼ်ႈၵႂႃႇၼႄတၢင်းၼၼ်ႉ ပဵၼ်တပ်ႉမ 88 ။ ယၢမ်းလဵဝ် ၼႂ်းၸႄႈဝဵင်းၵူတ်ႉၶၢႆ တၢင်းပွတ်းဝၢၼ်ႈၵႃလႅင်၊ ၼႃးၶႅမ် ၸိူဝ်းၼႆႉ သိုၵ်းလူင်ပွင်ၸိုင်ႈမၢၼ်ႈတင်း သိုၵ်းၶၢင် KIA ပဵၼ်ပၢင်တိုၵ်းၵၼ်ဝႆႉယူႇ ၼႆယဝ်ႉ။

သြႃႇၼွင်ႇလၢတ်ႉ တီႈပၢင်သဝ်း ၵူၼ်းပၢႆႈၽေး ဝၢၼ်ႈၵႃလႅင် လၢတ်ႈတီႈၽူႈတွႆႇႁွၵ်ႈဝႃႈ “ပၢင်တိုၵ်းၼႆႉ ပဵၼ်တပ်ႉသိုၵ်းမၢၼ်ႈ တင်း တပ်ႉသိုၵ်းၶၢင်။ မိူဝ်ႈဝႃး ယၢမ်းၵၢင်ၼႂ် မွၵ်ႈ 7 မူင်းၼႆႉ ပၢင်တိုၵ်းပဵၼ် 2 ပွၵ်ႈ” ဝႃႈၼႆ။

ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇၼႆႉ ပဵၼ်ပၢင်တိုၵ်းႁၢဝ်ႈႁႅင်းမႃး။ ထႅင်ႈၾၢႆႇၼိုင်ႈၵေႃႈ ယၢမ်းလဵဝ် ပဵၼ်ၽွင်းၶၢဝ်းတၢင်းပဵၼ်ၶူဝ်ႊဝိတ်ႉ 19 လႄႈ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်းဝႆႉၸူဝ်ႈၶၢဝ်း ဝႃႈၼႆသေတႃႉ တိုၵ်ႉသိုပ်ႇပဵၼ်ပၢင်တိုၵ်းယူႇ ၼႆယဝ်ႉ။

ယၢမ်းလဵဝ် ၼႂ်းၸႄႈဝဵင်းၵူတ်ႉၶၢႆၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈ တိုၵ်ႉထႅမ်ႁႅင်းသိုၵ်းၼပ်ႉႁူဝ်ပၢၵ်ႇထႅင်ႈ ၵူၼ်းပိုၼ်ႉတီႈ လၢတ်ႈၼႄၼင်ႇၼႆ။