ယေးငိုၼ်းမိူင်းမၢၼ်ႈ (မြန်မာနိုင်ငံတော်ဗဟိုဘဏ်) တေဢိတ်ႇဢွၵ်ႇငိုၼ်းၶႅပ်းမၢင်ၸေႈႁႃႈပၢၵ်ႇ ဢၼ်ပႃးႁုၼ်ႇႁၢင်ႈၸွမ်ႁၢၼ် ဢွင်ႇသၢၼ်း ဝႃႈၼႆ။
ဝၼ်းတီႈ 18/6/2020 ယူႇတီႈယေးငိုၼ်းမိူင်းႁူမ်ႈတုမ် ပိုၼ်ၽၢဝ်ႇဢွၵ်ႇမႃးဝႃႈ ပေႃးထိုင်မႃးဝၼ်းတီႈ 19/7/2020 ၸိုင် တေဢိၵ်ႇဢွၵ်ႇငိုၼ်းၶႅပ်းမၢင်ၸေႈႁႃႈပၢၵ်ႇ သႂ်ႇပႃးႁုၼ်ႇႁၢင်ႈၸွမ်ႁၢၼ်ဢွင်ႇသၢၼ်း လႄႈ ႁုၼ်ႇႁၢင်ႈယေးငိုၼ်းမိူင်းမၢၼ်ႈ ၼႆယဝ်ႉ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႈဝႆႉဝႃႈ“ တီႈၶႅပ်း 500 ၼၼ်ႉ တေမီးပိူင်ၾၢင်မၼ်း တၢင်းယၢဝ်းၶႅပ်းငိုၼ်းတေမီး 150 မီႊလီႊမီႊတိူဝ်ႊ၊ တၢင်းသုင် 70 မီႊလီႊမီႊတိူဝ်ႊ။ တၢင်းၼႃႈဝႂ်ငိုၼ်းၼၼ်ႉ တေသႂ်ႇႁုၼ်ႇႁၢင်ႈ ၸွမ်ႁၢၼ်ဢွင်ႇသၢၼ်း၊ တေဢွၵ်ႇသီၵႂၼ်းလႅင်၊ ႁိမ်းၸဵင်ႇၶႅပ်းငိုၼ်းၼၼ်ႉ တေသႂ်ႇမၢႆၼပ်ႉ 500/၅၀၀ သၢမ်တီႈ။ လိူဝ်သေၼၼ်ႉ တီႈတၢင်းၼိူဝ် ႁုၼ်ႇႁၢင်ႈၸွမ်ႁၢၼ်ဢွင်ႇသၢၼ်းၼၼ်ႉ တေတႅမ်ႈလိၵ်ႈသႂ်ႇဝႃႈ ယေးငိုၼ်းမိူင်းမၢၼ်ႈ (မြန်မာနိုင်ငံတော်ဗဟိုဘဏ်)၊ တေတႅမ်ႈသႂ်ႇဝႆႉထႅင်ႈတူဝ်လိၵ်ႈ (ငါးရာကျပ်)၊ တေမီးသၢႆႁူမ်ႇလူမ်ႈသီၶမ်းႁိူဝ်ႈၾင်ဝႆႉၸွမ်း ၸိူဝ်းၼႆႉ” ဝႃႈၼႆ။
တၢင်းလင် ၶႅပ်း 500 ၼၼ်ႉသမ်ႉ တေသႂ်ႇလိၵ်ႈဢိင်းၵလဵတ်ႈမူတ်းမူတ်း၊ တီႈတၢင်းၼိူဝ်ငိုၼ်းၼၼ်ႉ တေတႅမ်ႈသႂ်ႇ CENTRAL BANK OF MYANMAR ။ လိူဝ်သေၼၼ်ႉ ႁိမ်းၸဵင်ႇငိုၼ်း တႃႇ 3 တီႈသမ်ႉ တေတွၵ်ႇသႂ်ႇ မၢႆၼပ်ႉ 500/ ၅၀၀ ။ လိူဝ်ၼၼ်ႉ တေသႂ်ႇႁၢင်ႈ ယေးငိုၼ်းမိူင်းမၢၼ်ႈ၊ ၾၢႆႇတႂ်ႈႁုၼ်ႇႁၢင်ႈယေးငိုၼ်းၼၼ်ႉ တေသႂ်ႇလိၵ်ႈဢိင်းၵလဵတ်ႈ ဢၼ်ဝႃႈ FIVE HUNDRED KYATS ၸိူဝ်းၼႆႉ။
ယၢမ်းလဵဝ် ၶႅပ်း 500 ဢၼ်ၸႂ်ႉတိုဝ်းၵၼ်ယူႇၼႆႉ ပဵၼ်ငိုၼ်းဢၼ်ၶဝ်ႈပဵၼ်တၢင်းၵၢၼ်ယူႇ သိုပ်ႇၸႂ်ႉတိုဝ်းၵၼ်ၵႂႃႇလႆႈ ၼႆယဝ်ႉ။