ၵူၼ်းမိူင်းတႆး ၸိူဝ်းၵႂႃႇႁဵတ်းၵၢၼ် တၢင်းမိူင်းထႆးသေ ပွၵ်ႈၶိုၼ်းမိူင်း၊ ပွၵ်ႈတၢင်း မႄႈသွတ်ႇ – မျႃႉဝတီႇ – တႃႈၵုင်ႈ သေ မႃးတၢင်းတူၼ်ႈတီး ၽႅဝ်မႃးဝဵင်းပၢင်လူင် ႁိမ်း 100 ၵေႃႉ။

ဝၼ်းတီႈ 17/6/2020 ထိုင်မိူင်းတႆး ပွတ်းၸၢၼ်း ဝဵင်းပၢင်လူင် 40 ၵေႃႉ၊ ဝၼ်းတီႈ 15 သမ်ႉ ၽႅဝ်ဝႆႉ 41 ၵေႃႉ၊ ၵမ်ႈၼမ် ႁႅင်းၵၢၼ် ဢၼ်ပွၵ်ႈမႃးၸိူဝ်းၼႆႉ လုၵ်ႉတၢင်းမိူင်းထႆး ပွတ်းတႂ်ႈ၊ ပွတ်းၵၢင်သေ ပွၵ်ႈ တၢင်း မႄႈသွတ်ႇ(မိူင်းထႆး) – မျႃႉဝတီႇ ၸႄႈမိူင်းယၢင်းၽိူၵ်ႇ။

ၼၢင်းမျႃႉထူၺ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းလွႆလႅမ် လၢတ်ႈတီႈၽူႈတွႆႇႁွၵ်ႈဝႃႈ “ႁႅင်းၵၢၼ် ဢၼ်ပွၵ်ႈမႃးၸိူဝ်းၼႆႉ လႆႈဢဝ်ၼမ်ႉမုၵ်ႈ ၼမ်ႉလၢႆး ၶဝ်သူင်ႇၵူတ်ႇထတ်းဝႆႉ တႃႇၶၢဝ်းတၢင်း 5 ဝၼ်း။ သင်ဝႃႈ ၵူတ်ႇထတ်း ဢွၵ်ႇ ပဵၼ် Negative ၸိုင် ႁႅင်းၵၢၼ် ၸိူဝ်းၼႆႉ ပွၵ်ႈမိူဝ်းဢွင်ႈတီႈယူႇၽႂ်မၼ်းလႆႈယဝ်ႉ” ဝႃႈၼႆ။

ႁႅင်းၵၢၼ် 81 ၵေႃႉၼႆႉ တေႃႈလဵဝ် လႆႈဢဝ်ဝႆႉတီႈၸၼ်ႉၸွမ်ပၢင်လူင်။ လွင်ႈၵိၼ်ယႅမ်ႉတႄႉ ၵဵပ်းငိုၼ်းၵၼ်ၶိုၼ်းသေ လဵင်ႉၵၼ်၊ ႁႅင်းၵၢၼ် မၢင်ၵေႃႉ ဢမ်ႇသႂ်ႇငိုၼ်းတွင်းၸွမ်းၵေႃႈမီးယူႇ – ဝႃႈၼႆ။

ၼၢင်းမျႃႉထူၺ်း သိုပ်ႇလၢတ်ႈဝႃႈ “ၵူၼ်းဢၼ်ထုၵ်ႇၵုမ်းတူဝ် Quarantine တင်းမူတ်းၼႆႉ လႆႈၵဵပ်းငိုၼ်းၶဝ် တွၼ်ႈတႃႇ တေသိုဝ်ႉၶဝ်ႈၼမ်ႉတၢင်းၵိၼ်လဵင်ႉၶဝ်ၶိုၼ်းၵူၺ်း။ ၵူၺ်းၵႃႈ မၢင်ၵေႃႉ ဢမ်ႇသႂ်ႇၵေႃႈမီး၊ မၢင်ၵေႃႉ ဢၼ်သႂ်ႇၵေႃႈမီး။ ယူႇတီႈလူင်ပွင်ၸိုင်ႈတႄႉ ၵမ်ႉထႅမ်ပၼ် ၼိုင်ႈၵေႃႉလႂ် တေႃႇဝၼ်း 2,000 ပျႃး၊ တေဝႃႈ ၵုမ်ႇထူၼ်ႈႁႃႉၼႆၵေႃႈ ပႆႇၵုမ်ႇထူၼ်ႈ” ဝႃႈၼႆ။

လိူဝ်ၼၼ်ႉ ဢၼ်လုၵ်ႉမိူင်းထႆး တွၼ်ႈၼိူဝ် မႃးတၢင်း တႃႈၶီႈလဵၵ်း မိူင်းတႆး ပွတ်းဢွၵ်ႇသေ ပွၵ်ႈၽႅဝ်ထိုင် ဝဵင်းပၢင်လူင် ၼၼ်ႉၵေႃႈ မီးၵူၼ်း 20 ပၢႆ ဝႃႈၼႆ။

ၵူၼ်းမိူင်းတႆး ၸိူဝ်းၵႂႃႇႁဵတ်းၵၢၼ်တၢင်းမိူင်းထႆး သေ ပွၵ်ႈၶဝ်ႈမႃးတၢင်းမျႃႉဝတီႈ ၸႄႈမိူင်းယၢင်းၽိူၵ်ႇ သေ လတ်းၵူင်မိူင်း မၢၼ်ႈ တူင်ႈပဵင်း ထိုင်ၶိုၼ်းမိူင်းတႆး ၼႆႉ တင်းမူတ်း ႁူဝ်ၵူၼ်းမီး 2,000 ပၢႆယဝ်ႉ ဝႃႈၼႆ။