ပၢင်လိူၵ်ႈတင်ႈပတ်းပိုၼ်ႉတူဝ်ႈမိူင်းႁူမ်ႈတုမ် 2020 ၼႆႉ ပႃႇတီႇႁူဝ်သိူဝ် တေလိူၵ်ႈသၢင် ၼၢင်းယိင်းလႄႈ ၵူၼ်းၼုမ်ႇ ၶဝ်ႈလိူၵ်ႈတင်ႈ တႃႇ 30 ပိူဝ်ႊသႅၼ်ႊ (30%) ဝႃႈၼႆ။

ပေႃးထိုင်မႃး လိူၼ်ၼူဝ်ႊဝႅမ်ႊၿိူဝ်ႊ 2020 ၸိုင် ယူႇတီႈၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် တေၸတ်းႁဵတ်း ပၢင်လိူၵ်ႈတင်ႈ ၼႂ်းမိူင်းႁူမ်ႈတုမ် ပတ်းပိုၼ်ႉၼႆသေ ယူႇတီႈငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး (SNLD) တေၶဝ်ႈလိူၵ်ႈတင်ႈ ၼႂ်းၸႄႈမိူင်းတႆးပတ်းပိုၼ်ႉ ၼႆယဝ်ႉ။

ၸၢႆးလဵၵ်ႉ ၽူႈၼမ်းၼႂ်းၵူႈလွင်ႈလွင်ႈ ပႃႇတီႇႁူဝ်သိူဝ် SNLD လၢတ်ႈတီႈၽူႈတွႆႇႁွၵ်ႈဝႃႈ “တွၼ်ႈတႃႇ ပၢင်လိူၵ်ႈတင်ႈ ပီ 2020 ၼႆႉ ႁဝ်းၶႃႈ တေၶတ်းၸႂ်လိူၵ်ႈ ၼေႃႇၽူႈတႅၼ်းသၽႃး တေပဵၼ်ၼၢင်းယိင်းလႄႈ ၵူၼ်းၼုမ်ႇ ၵမ်ႈၼမ် တႃႇ 30 ပိူဝ်ႊသႅၼ်ႊ၊ ၼင်ႇႁိုဝ် ပေႃးတေလႆႈၶဝ်ႈႁူမ်ႈပႃး ၼႆတႄႉ တေပဵၼ်ဢၼ်လၢၵ်ႇလၢႆး ဢၼ်ၼိုင်ႈ” ဝႃႈၼႆ။

ပီၼႆႉ ယူႇတီႈပႃႇတီႇႁူဝ်သိူဝ် တေၶဝ်ႈၶေႉၶႅင်ႇလိူၵ်ႈတင်ႈ ၼႂ်းမိူင်းတႆးပတ်းပိုၼ်ႉ တႃႇ 50 ၸႄႈဝဵင်းပၢႆ ၼႆယဝ်ႉ။

လိူဝ်ၼၼ်ႉၵေႃႈ တေၶဝ်ႈၶေႉၶႅင်ႇလိူၵ်ႈတင်ႈပႃး ၼႂ်းၸႄႈမိူင်းၶၢင်၊ ၸႄႈမိူင်းယၢင်းလႅင်လႄႈ ၼႂ်းတိူင်းဝဵင်းလိူဝ်ႇ (မၼ်းတလေး) ၸိူဝ်းၼႆႉ ဝႃႈၼႆ။

ၸၢႆးလဵၵ်ႉ သိုပ်ႇလၢတ်ႈဝႃႈ “ ယိူင်းဢၢၼ်းဝႆႉတႄႉ တီႈဢေႇသုတ်းမၼ်းမွၵ်ႈ 150 တီႈၼင်ႈၼႆႉ။ ၼႂ်း 150 တီႈၼင်ႈၼႆႉ တေလိူဝ်မႃးဢိတ်းၼိုင်ႈၵေႃႈမီး ဢမ်ႇၼၼ် တေယွမ်းလူင်းဢိတ်းၼိုင်ႈၵေႃႈတေမီးယူႇ။ တွၼ်ႈတႃႇ ပၢင်လိူၵ်ႈတင်ႈၼႆႉ ႁဝ်းၶႃႈ တေၶွတ်ႇၽွတ်ႈ ၶွမ်ႊမတီႊၸၼ်ႉၸႄႈဝဵင်း၊ ၶွမ်ႊမတီႊၵိင်ႇၽႄငဝ်ႈငုၼ်းလႄႈ ၶွမ်ႊမတီႊငဝ်ႈငုၼ်း၊ ပေႃးႁဝ်းၶႃႈ ၶွတ်ႇၽွတ်ႈၶွမ်ႊမတီႊယဝ်ႉၼႆၸိုင် တေၸႅၵ်ႇဝႂ်ဝႅပ်ႇၾွမ်ႊပၼ် တွၼ်ႈတႃႇၼေႃႈၽူႈတႅၼ်း ၸိူဝ်းတေၶဝ်ႈလိူၵ်ႈတင်ႈ” ဝႃႈၼႆ။

ပၢင်လိူၵ်ႈတင်ႈ ပီ 2015 လႄႈ ပၢင်လိူၵ်ႈတင်ႈသွမ်ႈ 2017 ႁူမ်ႈၵၼ် ယူႇတီႈပႃႇတီႇႁူဝ်သိူဝ် SNLD လႆႈတီႈၼင်ႈၼႂ်းသၽႃး တင်းမူတ်း 46 တီႈၼင်ႈ။ ၼႂ်း 46 တီႈၼင်ႈၼၼ်ႉ ၽူႈတႅၼ်းသၽႃးၸႄႈမိူင်း 28 တီႈၼင်ႈ၊ ၽူႈတႅၼ်းသၽႃးၵူၼ်းမိူင်း 14 တီႈၼင်ႈလႄႈ ၽူႈတႅၼ်းသၽႃးၸိူဝ်ႉၸၢတ်ႈ 3 တီႈၼင်ႈ ဢိၵ်ႇပႃး ၸႄႈမိူင်းၶၢင် ထႅင်ႈ 1 တီႈၼင်ႈ ။