ၵူၼ်းဝၢၼ်ႈ ၵႂႃႇႁဵတ်းသူၼ် ၶၢင်ႉၶမ်ၼႂ်းၵႄႈ ပၢင်တိုၵ်း တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း တီႈၵူတ်ႉၶၢႆ ပီႈၼွင်ႉၵူၼ်းႁိူၼ်းတၢင်းလင် ဢွၼ်ၵၼ်မႆႈၸႂ်။
ဝၼ်းတီႈ 16/6/2020 ယၢမ်းႁူဝ်ၶမ်ႈ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ် ၵမ်းၼိုင်ႈ၊ ဝၼ်းတီႈ 17/6/2020 ယၢမ်းၵၢင်ၼႂ်ၵေႃႈ ပဵၼ်ပၢင်တိုၵ်းၵၼ်ထႅင်ႈၵမ်းၼိုင်ႈ။ ပၢင်တိုၵ်းၼႆႉ ပဵၼ်ၵၼ်ၸွမ်းႁိမ်းႁွမ်းဝၢၼ်ႈၵႃလႅင်လႄႈ ဝၢၼ်ႈၼႃးၶႅမ် ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ ႁဵတ်းႁႂ်ႈၵူၼ်းဝၢၼ်ႈ ၸိူဝ်းၵႂႃႇႁဵတ်းႁႆႈႁဵတ်းသူၼ် ဢွၼ်ၵၼ်ၶမ် ၼႂ်းၵႄႈပၢင်တိုၵ်း ၵၼ် ဝႃႈၼႆ။
သြႃႇၼွင်ႇလၢတ်ႉ ပၢင်သဝ်းၵူၼ်းပၢႆႈၽေး တီႈဝၢၼ်ႈၵႃလႅင် လၢတ်ႈတီႈၽူႈတွႆႇႁွၵ်ႈဝႃႈ “ပီၼႆႉ ပၢင်တိုၵ်းၵေႃႈယဵၼ်သေ ၵူၼ်းပၢႆႈၽေးႁဝ်းၶႃႈ လင်ႁိူၼ်း 30-40 လင် ဢၼ်ပၢႆႈမႃးသွၼ်ႈဝႆႉတီႈၼႆႈ ၶိုၼ်းဢွၼ်ၵၼ်ပွၵ်ႈမိူဝ်းႁဵတ်းႁႆႈႁဵတ်းသူၼ် ၵၼ် ၶိုၼ်း ။ ပၢင်တိုၵ်းၵမ်းၼႆႉ တႄႇပဵၼ်မိူဝ်ႈဝၼ်းတီႈ 16 တေႃႇထိုင် မိူဝ်ႈၼႆႉ ပႆႇယဵၼ်။ ၵူၼ်းဢၼ်ပွၵ်ႈမိူဝ်းၵႂႃႇႁဵတ်းႁႆႈႁဵတ်းသူၼ်ၸိူဝ်းၼၼ်ႉ လႆႈၶမ်ဝႆႉၼႂ်းၵႄႈပၢင်တိုၵ်း ၵမ်ႈၼမ်ပဵၼ်ၵူၼ်းၸၢႆး၊ ယွၼ်ႉၼၼ် ယူႇတီႈၼႃႈႁိူၼ်း ပီႈၼွင်ႉၸိူဝ်းၵိုတ်းတၢင်းလင် ဢွၼ်ၵၼ်မႆႈၸႂ်ၸွမ်းၶဝ်ၶႃႈဢေႃႈ” ဝႃႈၼႆ။
ပီၼႆႉ ယွၼ်ႉပၢင်တိုၵ်း ယဵၼ်လူင်းတင်းၼမ်လႄႈ ၵူၼ်းပၢႆႈၽေးသိုၵ်း ဢၼ်ယူႇဝႆႉတီႈပၢင်သဝ်း ၵူၼ်းပၢႆႈၽေး တီႈၵႃလႅင် ၼၼ်ႉ မၢင်ၵေႃႉ ဢွၼ်ၵၼ်ပွၵ်ႈမိူဝ်းႁဵတ်းႁႆႈႁဵတ်းသူၼ် ။ ၵူၺ်းၵႃႈ ပၢင်တိုၵ်းၼႆႉၶိုၼ်းပဵၼ်ၵူႈဝၼ်း၊ ၵူၼ်းတီႈပၢင်သဝ်း မႆႈၸႂ်တႃႇၸိူဝ်းမီးၼႂ်းႁႆႈ သေၶမ်ဝႆႉၼႂ်းၵႄႈပၢင်တိုၵ်းၸိူဝ်းၼၼ်ႉ ၊ ၵူဝ်ၺႃးတပ်ႉသိုၵ်းလူင်ပွင်ၸိုင်ႈမၢၼ်ႈ တီႉၺွပ်း ၵႂႃႇ”- သြႃႇၼွင်ႇလၢတ်ႉ လၢတ်ႈၼႄၼင်ႇၼႆ။
ဝၼ်းတီႈ 16/6/2020 ယၢမ်းဝၢႆးဝၼ်း 3 မူင်း သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် ႁိမ်းဝၢၼ်ႈၼႃးၶႅမ် တီႈၼိုင်ႈ။ ဝၼ်းတီႈ 17/6/2020 ယၢမ်းၵၢင်ၼႂ် မွၵ်ႈ 6 မူင်းၶိုင်ႈၼၼ်ႉ ပဵၼ်ပၢင်တိုၵ်းၵၼ် ၼႂ်းၵႄႈဝၢၼ်ႈၼႃးၶႅမ်လႄႈ ႁိမ်းႁွမ်းဝၢၼ်ႈၼမ်ႉႁူး တီႈၼိုင်ႈ ဝႃႈၼႆ။
သြႃႇၼွင်ႇလၢတ်ႉ သိုပ်ႇလၢတ်ႈဝႃႈ “ ၵူၼ်းၸၢႆး ၸိူဝ်းၵႂႃႇႁဵတ်းၵၢၼ်ၼၼ်ႉ ၵူဝ်သိုၵ်းမၢၼ်ႈမၢပ်ႇမႂ်ၶဝ်လူၺ်ႈ 17/1 သေ တီႉၺွပ်းႁွင်ႉၶဝ်ၵႂႃႇၵူၺ်းၶႃႈယဝ်ႉ။ ယွၼ်ႉဝႃႈ တၢင်းသၢႆဢၼ်ၶဝ်ၵႂႃႇႁဵတ်းသူၼ်ၼၼ်ႉ ဢမ်ႇလႆႈလႅင်းၾူၼ်း၊ တေႃႈလဵဝ်ၼႆႉ ႁဝ်းၶႃႈ ဢွၼ်ၵၼ်ပႂ်ႉၶဝ်ပွၵ်ႈမႃးယူႇၶႃႈ” ဝႃႈၼႆ။
ဢွင်ႈတီႈပဵၼ်ပၢင်တိုၵ်းၵၼ်ၼၼ်ႉ သင်ဝႃႈ လုၵ်ႉတီႈပၢင်သဝ်းၵူၼ်းပၢႆႈၽေး တီႈဝၢၼ်ႈၵႃလႅင်သေ ၶီႇရူတ်ႉၶိူင်ႈၵႂႃႇၸိုင် တေႁိုင်မွၵ်ႈၼိုင်ႈၸူဝ်ႈမူင်းၶိုင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ