လူင်ပွင်ၸိုင်ႈတင်း RCSS ဢုပ်ႇဢူဝ်းၵၼ် ၼိူဝ်ဢွၼ်ႊလၢႆႊ တႃႇႁူမ်ႈသၢၼ်မိုဝ်းၵၼ် တူင်ႉၼိုင်လွင်ႈၵႅတ်ႇၶႄႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ဢၼ်ပဵၼ်ယူႇယၢမ်းလဵဝ်ၼႆႉ ဝႃႈၼႆ။

ဝၼ်းတီႈ 16/6/2020 ယၢမ်းဝၢႆးဝၼ်း 1 မူင်း ထိုင် 2 မူင်းၶိုင်ႈၼၼ်ႉ ယူႇတီႈၶွမ်ႊမတီႊ တႃႇၵႅတ်ႇၶႄႁႄႉၵင်ႈၵုမ်းၵမ် ၶူဝ်ႊဝိတ်ႉ – 19 လူင်ပွင်ၸိုင်ႈလႄႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းႁဵတ်း ပၢင်ၵုမ်ၵၼ် ၼိူဝ်ဢွၼ်ႊလၢႆႊသေ ဢုပ်ႇဢူဝ်းၶႆႈၼႄၵၼ် လွင်ႈတူင်ႉၼိုင်တင်းသွင်ၾၢႆႇ ဢၼ်လႆႈႁဵတ်းသၢင်ႈမႃး ၸိူဝ်းၼၼ်ႉ၊ ပႃးၸဵမ်လွင်ႈၸွႆႈထႅမ်ၵူၼ်းမိူင်း ၽွင်းတၢင်းပဵၼ်ၶူဝ်ႊဝိတ်ႉ – 19 ဢိၵ်ႇထႅင်ႈလၢႆလၢႆလွင်ႈ ၸိူဝ်းၼႆႉ ၼႆယဝ်ႉ။

ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ လႆႈဢုပ်ႇဢူဝ်းၵၼ် မီးဝႆႉယူႇလၢႆလၢႆ တွၼ်ႈၶႃႈယဝ်ႉ။ ဢွၼ်တၢင်းသုတ်းတႄႉ တေၽေႃႇၼမ်ႉၽေႃႇတူဝ် ၸွမ်းၼင်ႇၾၢႆႇၸုမ်း EAO လႄႈ တင်း ၶွမ်ႊမတီႊၶူဝ်ႊဝိတ်ႉ 19 လူင်ပွင်ၸိုင်ႈ လႆႈၸႂ်ၵၼ်ဝႆႉ ၸိူဝ်းၼၼ်ႉ” ဝႃႈၼႆ။

လိူဝ်ၼၼ်ႉ ယူႇတီႈတၢင်းၶွမ်ႊမတီႊ ၾၢႆႇၵႅတ်ႇၶႄႁႄႉၵင်ႈၵုမ်းၵမ် ၶူဝ်ႊဝိတ်ႉ 19 လူင်ပွင်ၸိုင်ႈၵေႃႈ လၢတ်ႈၼႄ ၵဵဝ်ႇလူၺ်ႈလွင်ႈႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ လႆႈတူင်ႉၼိုင်ႁဵတ်းသၢင်ႈမႃးသင်လၢႆလၢႆ၊ ဢိၵ်ႇ တၢင်းၾၢႆႇ RCSS သမ်ႉ လႆႈတူင်ႉၼိုင်ႁဵတ်းသၢင်ႈမႃးသင်လၢႆလၢႆ ၸိူဝ်းၼႆႉ။

ၸဝ်ႈသိုၵ်း ဢုမ်ႈၶိူဝ်း သိုပ်ႇလၢတ်ႈဝႃႈ “ တင်းသွင်ၾၢႆႇ ဢုပ်ႇဢူဝ်း Update ၼႄၵၼ် လွင်ႈလႆႈတူင်ႉၼိုင်မႃး ၵဵဝ်ႇလူၺ်ႈတၢင်းပဵၼ်ၶူဝ်ႊဝိတ်ႉ 19 ၼႆႉသေ တႃႇတေသိုပ်ႇၵႂႃႇထႅင်ႈတၢင်းၼႃႈၼႆႉသမ်ႉ တေသိုပ်ႇႁဵတ်းတူင်ႉၼိုင်ၵႂႃႇ ၸိူင်ႉႁိုဝ်ထႅင်ႈ ၸိူဝ်းၼႆႉ။ လိူဝ်သေၼၼ်ႉ ယူႇတီႈလူင်ပွင်ၸိုင်ႈၶဝ်ၵေႃႈ တေၸွႆႈမႃးပၼ် ၶိူင်ႈၶူဝ်းၵမ်ႉထႅမ် တၢင်းပဵၼ်ၶူဝ်ႊဝိတ်ႉ 19 ၼႆႉ တီႈ RCSS ႁဝ်းၶႃႈထႅင်ႈ” ဝႃႈၼႆ။

ယူႇတီႈၾၢႆႇမေႃယႃ RCSS/SSA လူင်းပိုၼ်ႇတီႈ ပၼ်ပိုၼ်ႉႁူႉၵူၼ်းမိူင်း လွင်ႈလွၵ်းလၢႆး တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 လႄႈ ၵူတ်ႇထတ်းပၢႆးယူႇလီၵူၼ်းမိူင်းမႃး ၼႂ်းပိုၼ်ႉတီႈ RCSS တူင်ႉၼိုင်ယူႇဝႆႉ ၸိူဝ်းၼၼ်ႉ တင်ႈတႄႇ ႁၢင်လိူၼ်မတ်ႉၶျ် တေႃႇထိုင်ယၢမ်းလဵဝ်ၼႆႉ မီးႁူဝ်ၵူၼ်း 64,000 ၵေႃႉပၢႆယဝ်ႉ ဝႃႈၼႆ။

လိူဝ်ၼၼ်ႉ တီႈပၢင်ၵုမ်ဢွၼ်ႊလၢႆႊ မိူဝ်ႈဝႃးၼၼ်ႉ လႆႈဢုပ်ႇၵၼ်ပႃး လွင်ႈတပ်ႉသိုၵ်းလူင်ပွင်ၸိုင်ႈ တင်း RCSS/SSA ပိုတ်းယိုဝ်းၵၼ်၊ ၼင်ႇႁိုဝ် တေဢမ်ႇသိုပ်ႇပဵၼ်ပၢင်တိုၵ်းၵၼ်ၵႂႃႇ ၸိူဝ်းၼၼ်ႉၵေႃႈ ဢုပ်ႇၵၼ်ပႃး ၼႆယဝ်ႉ။

ၸဝ်ႈသိုၵ်း ဢုမ်ႈၶိူဝ်း လၢတ်ႈဝႃႈ “ လိူဝ်သေ ဢုပ်ႇဢူဝ်းၵၼ် လွင်ႈၵႅတ်ႇၶႄႁႄႉၵင်ႈၽႄးၶူဝ်ႊဝိတ်ႉ 19 ၼႆႉယဝ်ႉ တွၼ်ႈတပ်ႉသိုၵ်း လူင်ပွင်ၸိုင်ႈမၢၼ်ႈလႄႈတင်း RCSS ႁဝ်း ယႃႇပေႁႂ်ႈသိုပ်ႇပဵၼ်ပၢင်တိုၵ်းၵၼ်ထႅင်ႈၼၼ်ႉ တင်းသွင်ၾၢႆႇ ႁႂ်ႈဢွၼ်ၵၼ်ၵုမ်းထိင်းၵၼ်ၵႂႃႇ။ ၼႆႉတႄႉ ၾၢႆႇတင်းလူင်ပွင်ၸိုင်ႈမၢၼ်ႈလၢတ်ႈမႃး” ဝႃႈၼႆ။

“ယူႇတီႈၾၢႆႇႁဝ်းၶႃႈၵေႃႈ တုၵ်းယွၼ်းဝႆႉပႃးဝႃႈ ၾၢႆႇတပ်ႉမတေႃႇၶဝ် ၵမ်းၵမ်းၺွပ်းၵူၼ်းႁဝ်းၶႃႈဝႆႉၸိူဝ်းၼၼ်ႉ ႁႂ်ႈလႆႈပွႆႇပၼ်ၶိုၼ်း ၸိူဝ်းၼႆႉ။ ဢိင်ၼိူဝ်လွင်ႈတုၵ်းယွၼ်းၼႆႉ ယူႇတီႈတၢင်းၾၢႆႇလူင်ပွင်ၸိုင်ႈၵေႃႈ လၢတ်ႈဝႃႈ တေၸွႆႈငူပ်ႉငီႉလၢတ်ႈပၼ်ၵႂႃႇ” ၸဝ်ႈသိုၵ်းဢုမ်ႈၶိူဝ်း လၢတ်ႈၼႄၼင်ႇၼႆ။

ပၢင်ဢုပ်ႇဢူဝ်းၵၼ်ၼိူဝ်ဢွၼ်ႊလၢႆႊၼႆႉ တၢင်းၾၢႆႇ RCSS ၸွမ်ႁၢၼ်ပွင်ၶိူဝ်း ဢွၼ်ႁူဝ်သေ မီးၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း(2) ၊ ၸဝ်ႈသိုၵ်းၸၢႆးႁၢၼ်၊ ၸဝ်ႈႁၢၼ်ၸိူင်းသႅၼ်မႂ်ႇ၊ ၸၢႆးလႅင်းလႄႈ ၸၢႆးၸၢႆးငိုၼ်း ၽူႈၵိူဝ်းၵုမ် ၵေႃၵမ်ၵၢၼ်ပွင်သၢင်ႈလွင်ႈငမ်းယဵၼ် (PMC) RCSS ။ တၢင်းၾၢႆႇလူင်ပွင်ၸိုင်ႈသမ်ႉ ပဵၼ် ၻွၵ်ႊတိူဝ်ႊတိၼ်ႇမဵဝ်းဝိၼ်း၊ ဢူးတဵင်းၸေႃႇ၊ ၶိၼ်ႇၸေႃႇဢူး၊ မူဝ်းၸေႃႇဢူး၊ လႃႉမွင်ႇဢူး၊ လႃႉမွင်ႇသူၺ်ႇလႄႈ ဢူးၵျေႃႇလိၼ်းဢူး ၸိူဝ်းၼႆႉ ၼႆယဝ်ႉ။