ၵူၼ်းဝၢၼ်ႈငႅၼ်း မိူင်းၵဵင်းတုင်သွင်ၵေႃႉ ဢိၵ်ႇၵူၼ်းသိုၵ်း RCSS သွင်ၵေႃႉ ဢၼ်ထုၵ်ႇသိုၵ်းလူင်ပွင်ၸိုင်ႈ တီႉၺွပ်းၵုမ်းတူဝ်ဝႆႉမိူဝ်ႈလိူၼ်ပူၼ်ႉ လုမ်းတြႃးတတ်းသိၼ်မိူဝ်ႈၼႆႉ။

ဝၼ်းတီႈ 17/6/2020 မိူဝ်ႈၼႆႉ ဢၼ်သိုၵ်းလူင်ပွင်ၸိုင်ႈတီႉၺွပ်းၵူၼ်းဝၢၼ်ႈလႄႈ သိုၵ်း RCSS/SSA ဝႆႉၼၼ်ႉတဵမ် 28 ဝၼ်းယဝ်ႉလႄႈ လုမ်းတြႃးတေတႅပ်းတတ်း ဝႃႈၼႆ။

ၵဵဝ်ႇၵပ်းလွင်ႈၼႆႉ ၸဝ်ႈသိုၵ်း ၸူဝ်းမိူင်း ၽူႈၼင်ႈလုမ်းၵပ်းသၢၼ် RCSS တီႈၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈၼႆႉ ႁဝ်းၶႃႈတေၵႂႃႇ ၶိုၼ်ႈလုမ်းတြႃးၶႃႈယဝ်ႉ။ လွင်ႈဢၼ်ၶဝ်ၵၢဝ်ႇၼႄး တီႉၺွပ်းၵူၼ်းသိုၵ်းႁဝ်းၶႃႈလႄႈ ၵူၼ်းဝၢၼ်ႈငႅၼ်းၼႆႉ မၼ်းဢမ်ႇထုၵ်ႇမႅၼ်ႈၸွမ်း ပၵ်းပိူင်ထမ်းတြႃးသင်။ မိူဝ်ႈၼႆႉ ႁဝ်းၶႃႈတေၶိုၼ်ႈလုမ်းတြႃးသေ ထွမ်ႇတူၺ်းငဝ်းလၢႆးမၼ်းၶႃႈယဝ်ႉ” ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 18/5/2020 ၊ ယၢမ်းၵၢင်ၶိုၼ်း မွၵ်ႈ 11 မူင်း တပ်ႉသိုၵ်းလူင်ပွင်ၸိုင်ႈမၢၼ်ႈတင်း ပလိၵ်ႈမၢၼ်ႈ ႁူမ်ႈၵၼ်သေ ၶဝ်ႈသွၵ်ႈတဝ် ႁိူၼ်းၵူၼ်းဝၢၼ်ႈငႅၼ်းလင်ၼိုင်ႈ ၼႂ်းဢိူင်ႇၵၢတ်ႇတဝ်ႇ ၸႄႈဝဵင်းၵဵင်းတုင်၊ ၵူတ်ႇထတ်းႁၼ်ငိုၼ်းမၢၼ်ႈ 2 ပၢၵ်ႇသႅၼ်၊ မၢပ်ႇၼႄးဝႃႈ ၵုမ်း/ယိပ်းဝႆႉပၼ် ငိုၼ်းၵဵပ်းၶွၼ်ႇၶွင်သိုၵ်းတႆး RCSS ၵဵဝ်ႇၶွင်ႈသိုၵ်းတႆးၼႆသေ ၵူၼ်းႁိူၼ်းၼၼ်ႉ 2 ၵေႃႉ ထုၵ်ႇတီႉၺွပ်းၵုမ်းၶင်တူဝ်ဝႆႉတီႈ တိူင်းသိုၵ်းသၢမ်ၸဵင်ႇ ၵဵင်းတုင်-ၼႆယဝ်ႉ။

ၸဝ်ႈသိုၵ်း ၸူဝ်းမိူင်း သိုပ်ႇလၢတ်ႈဝႃႈ “ငိုၼ်းၵူၼ်းဝၢၼ်ႈ 200 ပၢၵ်ႇသႅၼ်ၼၼ်ႉ မၼ်းလုၵ်ႉတီႈလႂ်မႃး ၶဝ်ဢမ်ႇႁူႉလူး၊ ၵူၼ်းဝၢၼ်ႈႁဝ်းၶႃႈၵေႃႈ မီးၼႃး/ သူၼ် ၵႃႉၶၢႆႁင်းၵူၺ်းၶဝ်သေ လႆႈမႃးၵေႃႈပဵၼ်လႆႈ ငိုၼ်းၸိူဝ်းၼႆႉ။ သိုၵ်းမၢၼ်ႈၶဝ် ယႄးၶဝ် မႃးသႂ်ႇႁၢႆႉႁဝ်းဝႃႈ ပဵၼ်ငိုၼ်းၵဵပ်းၶွၼ်ႇၵူၼ်းမိူင်းၼႆ၊ လွင်ႈၼႆႉ ႁဝ်းၶႃႈဢဝ်ၽူႈတၢင်ၼႃႈ(ရှေ့နေ) သေ တိုၵ်ႉတေႃႇသူႈၵၼ်ဝႆႉယူႇ” ဝႃႈၼႆ။

လွင်ႈၼႆႉတႄႉ ႁဝ်းၶႃႈ တေႁဵတ်းၸွမ်းပၵ်းပိူင်မၢႆမီႈဝၢၼ်ႈမိူင်းမီး၊ ဢၼ်သိုၵ်းလူင်ပွင်ၸိုင်ႈမၢၼ်ႈ ၶဝ်ႈၵႂႃႇၵူတ်ႇႁိူၼ်းၵူၼ်းဝၢၼ်ႈတီႈဝၢၼ်ႈငႅၼ်းၼၼ်ႉ ၶဝ်ဢမ်ႇမီးဝႂ်ၶူၼ်ႉသွၵ်ႈ၊ ယဝ်ႉၵေႃႈ မၼ်းဢမ်ႇၸႂ်ႈၼႃႈတီႈၶဝ် မၼ်းပဵၼ်ၼႃႈတီႈပုၼ်ႈၽွၼ်း ယႄးလႄႈ ၾၢႆႇဢုပ်ႉပိူင်ႇ။ ဢၼ်သိုၵ်းၵႂႃႇၵူတ်ႇၼႂ်းႁိူၼ်းၵူၼ်းဝၢၼ်ႈၼႆႉ မၼ်းဢမ်ႇထုၵ်ႇ ၸဝ်ႈသိုၵ်း ၸူဝ်းမိူင်း လၢတ်ႈၼႄ ၼင်ႇၼႆ။

ၼႂ်းဝၼ်းတီႈ 18/5/2020 ၼၼ်ႉ လိူဝ်သေတီႉၺွပ်း ၵူၼ်းဝၢၼ်ႈငႅၼ်း 2 ၵေႃႉယဝ်ႉ တီႉၺွပ်းပႃးၵူၼ်းသိုၵ်း RCSS သွင်ၵေႃႉထႅင်ႈသေ ႁူမ်ႈၵၼ် ပဵၼ် 4 ၵေႃႉ။ တေႃႇထိုင်ယၢမ်းလဵဝ် ပႆႇပွႆႇတူဝ် တိုၵ်ႉၵုမ်းၶင်တူဝ်ဝႆႉယူႇ တေတဵမ် 1 လိူၼ်ယဝ်ႉ ၼႆယဝ်ႉ။