ႁႅင်းၵၢၼ် ဢၼ်ၵႂႃႇႁဵတ်းၵၢၼ်မိူင်းထႆးသေ ပွၵ်ႈမႃးလႆႈၶဝ်ႈၵုမ်းတူဝ် Facility Quarantine ဝႆႉတီႈဝဵင်းတူၼ်ႈတီး ႁိမ်းၸမ် 300 ၼၼ်ႉ လႆႈ ၵူတ်ႇထတ်းတၢင်းပဵၼ်သေ ၶေႃႈတွပ်ႇဢွၵ်ႇမႃးယဝ်ႉတင်းမူတ်း ဝႃႈပဵၼ် Negative ဢမ်ႇမီးၸိူဝ်ႉမႅင်း ဝႃႈၼႆ။

တီႈၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼႆႉ ဢွင်ႈတီႈၵုမ်းတူဝ် Facility Quarantine တင်းမူတ်းမီး 10 တီႈ။ ၵူၼ်း ႁိမ်းၸမ် 300 ၼႆႉ လိုဝ်ႈသဝ်းဝႆႉတီႈ ၼႂ်းဢွင်ႈတီႈ ၵၵ်းတူဝ် 2 တီႈ ။

ၵူဝ်ႇဝိၼ်းၼၢႆႇၸူဝ်း ၸုမ်းၸွႆႈထႅမ်ပႂ်ႉတူၺ်း Facility Quarantine လၢတ်ႈတီႈၽူႈတွႆႇႁွၵ်ႈဝႃႈ “ဢၼ်ၵူတ်ႇထတ်းပၼ်မိူဝ်ႈ ဝၼ်းတီႈ 15 ၼႆႉ ပဵၼ်ၵူၼ်းမိူင်း ၸိူဝ်းထုၵ်ႇၶဝ်ႈၵုမ်းတူဝ်ဝႆႉတီႈ ၸၼ်ႉၸွမ်ၶွမ်ႊပိဝ်ႊတိူဝ်ႊတူၼ်ႈတီးလႄႈ တီႈၵမ်ႇပေႃးၸ သႃႇသၼ ပဵၵ်ႉမၢၼ်ႇ (ကမ္ဘောဇ ဿသနာ့ ဗိမာန်) ။ ၶေႃႈတွပ်ႇပဵၼ် Negative တင်းမူတ်း ” ဝႃႈၼႆ။

ယွၼ်ႉပိူဝ်ႈၼၼ်လႄႈ လႆႈႁၢင်ႈႁႅၼ်းရူတ်ႉၵႃး ပၼ်သေ လႆႈသူင်ႇၸိူဝ်းၶဝ်ပွၵ်ႈမိူဝ်း ဝၢၼ်ႈမိူင်းၽႂ်မၼ်းယဝ်ႉ ဝႃႈၼႆ။

ႁႅင်းၵၢၼ် ဢၼ်ယူႇဝႆႉတီႈၸၼ်ႉၸွမ်ၶွမ်ႊပိဝ်ႊတိူဝ်ႊ တီႈတူၼ်ႈတီး တင်းမူတ်းမီး 155 ၵေႃႉ။ တီႈၵမ်ႇပေႃးၸ သႃႇသၼ ပဵၵ်ႉမၢၼ်ႇသမ်ႉမီး 134 ၵေႃႉ ဝႃႈၼႆ။

ၵူဝ်ႇဝိၼ်းၼၢႆႇၸူဝ်း သိုပ်ႇလၢတ်ႈဝႃႈ “တေႃႇထိုင်ဝၼ်းတီႈ 25 ၼႆႉ ႁႅင်းၵၢၼ်တေၶဝ်ႈမႃးထႅင်ႈၵေႃႈ တိုၵ်ႉမီးယူႇ။ ၵမ်ႈၼမ် ဢၼ်ၶဝ်ႈမႃးၼႆႉ လုၵ်ႉတၢင်းပွတ်းမျႃႉဝတီႇပွၵ်ႈမႃး” ဝႃႈၼႆ။

ႁႅင်းၵၢၼ် ဢၼ်ပွၵ်ႈၶဝ်ႈမႃး ၼႂ်းၸႄႈဝဵင်းတူၼ်ႈတီးၼႆႉ လႆႈထုၵ်ႇၶဝ်ႈၵုမ်းတူဝ် Facility Quarantine ဢၼ်ႁဵတ်းဢွင်ႈတီႈဝႆႉ တင်းမူတ်း 10 တီႈၼၼ်ႉ၊ ပေႃးႁွတ်ႈထိုင်မႃးယဝ်ႉ ၶၢဝ်းတၢင်း 5 ဝၼ်းၼႆႉ လႆႈသူင်ႇၵူတ်ႇထတ်းတၢင်းပဵၼ်ၶဝ် ၻွၵ်ႊတိူဝ်ႊမဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်း ၼႂ်းၸုမ်းလူင်ပွင်ၸိုင်ႈမိူင်းတႆး လၢတ်ႈၼႄၼင်ႇၼႆ။