ပၢင်ပွၼ်ႈထမ်း/တြႃး လွင်ႈပိုၼ်းပဵၼ်မႃးဝၼ်းလိူၼ် 3 မူၼ်း၊ လွင်ႈၽွမ်ႉႁူမ်ႈလႄႈ လွင်ႈၵႆယၢၼ် ၽေးယႃႈမဝ်းၵမ် တီႈၼႂ်းဢိူင်ႇၼွင်ၵေႃႈ ၸႄႈဝဵင်းသီႇပေႃႉ မီးၵူၼ်းၶဝ်ႈႁူမ်ႈထွမ်ႇငိၼ်း 500 ပၢႆ။
မိူဝ်ႈဝၼ်းပုတ်ႉတီႈ 31/01/2018 (ဝၼ်းလိူၼ်သၢမ်မူၼ်း) ၸဝ်ႈၶူးသီႇရိထမ်ႇမ လႆႈယေႃးတူဝ်ၵႂႃႇႁေႃးထမ်း/ တြႃး လွင်ႈပဵၼ်မႃးဝၼ်းလိူၼ် 3 မူၼ်း၊ လွင်ႈၽွမ်ႉႁူမ်ႈလႄႈ လွင်ႈၽေးယႃႈမဝ်းၵမ် ပၼ်တၢင်းႁူႉၵူၼ်းမိူင်း တီႈဝၢၼ်ႈၵွၵ်ႇတႅင် ဢိူင်ႇၼွင်ၵေႃႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ပၢင်ထမ်းတြႃးပွၵ်ႈၼႆႉ မီးၽူႈၶဝ်ႈႁူမ်ႈထွမ်ႇငိၼ်းမွၵ်ႈ 500 ပၢႆ-ၼႆယဝ်ႉ။
ၸဝ်ႈၶူးသီႇရိထမ်ႇမ ၽူႈလႆႈႁပ်ႉသူး/ရၢင်းဝလ်း ၸဝ်ႈၼၢင်းသူႉၸၼ်ႇတီႇ လၢတ်ႈဝႃႈ- “ၸွမ်းၼင်ႇ ဢၼ်ၶဝ်ၸဝ်ႈ/ သြႃႇတၵ်ႉၵႃႇတီႈၼႆႈ ယၢမ်ႈလႆႈႁၼ်ဢၼ်ၸဝ်ႈႁဝ်းႁေႃးထမ်းတြႃးမႃးၼႂ်းမိူင်းတႆး လွင်ႈၽွမ်ႉႁူမ်ႈ၊ လွင်ႈယႃႈမဝ်းၵမ်၊ လွင်ႈတူင်ႇဝူင်းၵူၼ်းၸိူဝ်းၼႆႉသေ ပီႈၼွင်ႉတၢင်းဝၢၼ်ႈၵွၵ်ႇတႅင် ဢိူင်ႇၼွင်ၵေႃႈ ၸႄႈဝဵင်းသီႇပေႃႉၼႆႉၵေႃႈ ယွၼ်ႉပိူဝ်ႈၶႂ်ႈႁႂ်ႈပီႈၼွင်ႉၼႂ်းဝၢၼ်ႈၼႂ်းဢိူင်ႇ လႆႈႁူႉႁႂ်ႈလႆႈငိၼ်း လွင်ႈၽေးယႃႈမဝ်းၵမ်၊ လွင်ႈၽွမ်ႉႁူမ်ႈ၊ လွင်ႈထမ်းတြႃးပိုၼ်းပဵၼ်မႃးဝၼ်းလိူၼ်သၢမ်မိူၼ်ၸိူဝ်းၼႆႉလႄႈ ၸင်ႇလႆႈၼိမၼ်တၼ ပၢင်းၸဝ်ႈႁဝ်းမႃးႁေႃးပၼ်။ ယိူင်းဢၢၼ်းတႃႇႁႂ်ႈၵူၼ်းဝၢၼ်ႈၵူၼ်းမိူင်း ပေႃးလႆႈထွမ်ႇထမ်းလႄႈ မေႃၶဝ်ႈဢွၵ်ႇမေႃၽွမ်ႉႁူမ်ႈၵၼ် ဢိၵ်ႇႁူႉၽေးႁၢႆႉယႃႈမဝ်းၵမ်”-ဝႃႈၼႆ။
ပၢင်ပွႆးထမ်းတြႃးပွၵ်ႈၼႆႉ ၽူႈႁပ်ႉပဵၼ်ၸဝ်ႈတႃႇၼလူင် ဢွၼ်ႁူဝ်ၼမ်းၼႃႈၸတ်းႁဵတ်း ပဵၼ်လုင်းမုၼ်တေႃး-ပႃႈမုၼ်သေး လႄႈလုင်းၸၢင်းၵုင်ႇၶိူဝ်း-ၼၢင်းၵဵင်ၶမ်း ပွၵ်ႉ 12 ဝဵင်းလႃႈသဵဝ်ႈ၊ ဢိၵ်ႇႁူမ်ႈပီႈၼွင်ႉဝၢၼ်ႈၵွၵ်ႇတႅင် ဢိူင်ႇၼွင်ၵေႃႈ တင်းမူတ်းတင်းသဵင်ႈ-ၼႆယဝ်ႉ။
ဢွၼ်ၼႃႈၼႆႉ ၶမ်ႈၶိုၼ်းဝၼ်းတီႈ 30/01/2018 ၵေႃႈ ၸဝ်ႈတူၼ်ၶူးသီႇရိထမ်ႇမ လႆႈယေႃးတူဝ်ၵႂႃႇ မဵတ်ႉတႃႇထမ်း တီႈၼႂ်းပၢင်ပွႆးယွင်ႈၵုင်ႇ/ယေႃးမုၼ် ၸဝ်ႈၶူးၽူႈဢွင်ႇယဝ်ႉၸၼ်ႉ BA ၸၼ်ႉၸွမ်မိူင်းထႆး 3 ၸဝ်ႈ၊ ၸဝ်ႈၶူးဝိမလ၊ ၸဝ်ႈၶူးသေႃးၽၼ၊ ၸဝ်ႈၶူးၸိၼ်ႇတႃႇၵဝိ ၸိူဝ်းၼႆႉ တီႈဝတ်ႉၼွင်မူဝ် ဢိူင်ႇဝဵင်းၵဝ်ႇ ၸႄႈဝဵင်းမိူင်းၼွင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
