ၵူၼ်းမိူင်းသူႈ 2 ၽူဝ်မေးၵႂႃႇႁဵတ်းသူၼ် ၵဵပ်းႁဵပ်းမႃးၵိၼ် ၺႃးႁဵပ်းမိူဝ်ႇ၊ ယူတ်းယႃဢမ်ႇလႆႈ လူႉတၢႆပႅတ်ႈတင်း 2 ၵေႃႉ ဝႃႈၼႆ။
မိူဝ်ႈဝၼ်းတီႈ 4/6/2020 သွင်ၽူဝ်မေး လုင်းတီႉ ဢႃယု 49 ပီ တင်း ပႃႈဢွင်ႇ ဢႃယု 47 ပီ ၵူၼ်းဝၢၼ်ႈၼႃးၵွၼ် ဢိူင်ႇၼႃးၵွၼ် ၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း။ ၵႂႃႇႁဵတ်းသူၼ်ၶဝ်ႈၵၢပ်ႇယဝ်ႉ ဝႄႉႁႃႁဵပ်းၵဵပ်းႁဵပ်းမႃးတူမ်ႈႁုင်မိုဝ်ႉၵႅင်ၵိၼ်၊ ၺႃးႁဵပ်းမိူဝ်ႇ လႆႈလူႉတၢႆၵႂႃႇ တင်းသွင်ၵေႃႉၽူဝ်မေး ၼႆယဝ်ႉ။
ၸၢႆးၸွမ် ၵူၼ်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်သွင်ၵေႃႉၽူဝ်မေး ၵႂႃႇႁဵတ်းသူၼ်ၶဝ်ႈၵၢပ်ႇၶဝ် သေ ဝႄႉၵဵပ်းႁဵပ်းမႃးတူမ်ႈႁုင်ၸွမ်းၽၵ်းပၵ်ႉ၊ ၵူၺ်းၵႃႈ ႁဵပ်းၼၼ်ႉ ပဵၼ်ႁဵပ်းမိူဝ်ႇ။ ထိုင်မႃး ဝၼ်းတီႈ 5 ၼၼ်ႉ လႆႈဢဝ်ၶႃသွင်ၽူဝ်မေး ၵႂႃႇယူတ်းယႃတီႈႁူင်းယႃမိူင်းၵၢဝ်။ ဝႃႈၸိုၼ်ႈၶႅၼ်းယဝ်ႉၼႆ လူင်းႁူင်းယႃမႃးယူႇႁိူၼ်းၶိုၼ်း။ ၵူၺ်းၵႃႈယွၼ်ႉၵွင်ႉႁဵပ်းၼၼ်ႉ ပႆႇၸၢႆႇႁၢႆလီလႄႈ ဝၼ်းတီႈ 8 မႃး လႆႈသူင်ႇယူတ်းယႃတူဝ်တီႈႁူင်းယႃမိူင်းသူႈ၊ ဢမ်ႇၸိုၼ်ႈၶႅၼ်းမႃးၵူၺ်းဢမ်ႇၵႃး လႆႈလူႉတၢႆပႅတ်ႈတင်းသွင်ၵေႃႉပူႇဢွၵ်ႇၶႃႈယဝ်ႉ”ဝႃႈၼႆ။
ၵေႃႉပဵၼ်ပႃႈဢွင်ႇၼၼ်ႉတႄႉ လႆႈလူႉတၢႆၵႂႃႇ မိူဝ်ႈဝၼ်းတီႈ 9/6/2020 ယၢမ်းဝၢႆးဝၼ်း 3 မူင်း၊ ထိုင်မႃး ဝၼ်းတီႈ 11/6/2020 ယၢမ်းၵၢင်ၼႂ် မွၵ်ႈ 6 မူင်းၼႆႉ ၵေႃႉပဵၼ်လုင်းတီႉၵေႃႈ ယူတ်းယႃဢမ်ႇလႆႈထႅင်ႈသေ လႆႈလူႉတၢႆၵႂႃႇ ၼင်ႇၵၼ် ဝႃႈၼႆ။
ယူႇတီႈႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်း SSPP ၽဵတ်ႉၿုၵ်ႉ SSPP Info ၼၼ်ႉ ဢွၵ်ႇဝႆႉဝႃႈ ႁဵပ်းဢၼ်ၶဝ်ၽူဝ်မေးၵိၼ်ၺႃးၼၼ်ႉ ပဵၼ်ႁဵပ်းၶႆႇၼူၵ်ႉယုင်း ၶဝ်ႁုင်လေႃးၽၵ်းပၵ်ႉသေၵိၼ် ဝႃႈၼႆ။
လုင်းတီႉ တင်းပႃႈဢွင်ႇၼႆႉ မီးလုၵ်ႈလၢင်းႁူမ်ႈၵၼ် တင်းမူတ်း 6 ၵေႃႉ ၸၢႆး 3 ၵေႃႉ၊ ယိင်း 3 ၵေႃႉ။ ၶဝ်သွင်ၵေႃႉၽူဝ်မေးမႃးႁဵတ်းသူၼ်ၶဝ်ႈၵၢပ်ႇ တီႈႁိမ်းဝၢၼ်ႈလွႆလႅမ် ဢိူင်ႇၼမ်ႉလပ်ႉ ၸႄႈဝဵင်းတၢင်ႉယၢၼ်း- ႁွင်ႈၵၢၼ်ပိုၼ်ၽၢဝ်ႇ SSPP ဢွၵ်ႇဝႆႉၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 8-9/6/2020 ၼၼ်ႉၵေႃႈ သွင်ၵေႃႉၽူဝ်မေး ၵူၼ်းဝၢၼ်ႈၼမ်ႉပၢတ်ႈ ဢိူင်ႇၼမ်ႉလပ်ႉ ၸႄႈဝဵင်းတၢင်ႉယၢၼ်း ၵႂႃႇၵဵပ်းႁဵပ်းမႃးၵိၼ် ၺႃးႁဵပ်းမိူဝ်ႇသေ လႆႈလူႉတၢႆ တင်းသွင်ၵေႃႉၽူဝ်မေးၵမ်းလဵဝ် ဝႃႈၼႆ။
