ၽၵ်းတူ/ ၶူဝ်လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) ပိၵ်ႉဢိုတ်းမႃး ၸမ်တေတဵမ် 3 လိူၼ်ယဝ်ႉ ပႆႇပိုတ်ႇၶိုၼ်း၊ ၵူၼ်းမိူင်း ၸိူဝ်းယူႇၸွမ်းလႅၼ်လိၼ် ဢိၵ်ႇတၢင်းမိူင်းတႆး မုင်းမွင်းပႂ်ႉ ႁႂ်ႈၸဵဝ်းပိုတ်ႇၶူဝ်ဝႆးဝႆး ဝႃႈၼႆ။

ၶူဝ်လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ပိၵ်ႉဢိုတ်းတင်ႈတႄႇ  ဝၼ်းတီႈ 23/3/2020 မႃး တေႃႇထိုင် ဝၼ်းမိူဝ်ႈၼႆႉဝၼ်းတီႈ 13/6/2020   မီးၶၢဝ်းတၢင်း 2 လိူၼ်ပၢႆ ၸမ် 3 လိူၼ် ယင်းပႆႇပိုတ်ႇၶိုၼ်း။  ၸဝ်ႈၵုၼ်ႇ ၵူၼ်းၵႃႉ ၵူၼ်းပိုၼ်ႉတီႈ  မုင်ႈမွင်းပႂ်ႉ ႁႂ်ႈၸဵဝ်းပိုတ်ႇၽၵ်းတူ/ ၶူဝ်လႅၼ်လိၼ်ၽႂ်းၽႂ်းယူႇ -ၼႆယဝ်ႉ။

ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “လွင်ႈပိုတ်ႇၶူဝ်ၼႆႉ မၼ်းယူႇတီႈ တၢင်းလူင်ပွင်ၸိုင်ႈမိူင်းထႆး။ တၢင်းမိူင်းတႆးႁဝ်းၶႃႈတႄႉ တိုၼ်းၽွမ်ႉပိုတ်ႇယူႇၶႃႈယဝ်ႉ။ လွင်ႈဢိုတ်းၽၵ်းတူၼႆႉ ႁၢမ်ႈၵူၼ်းၶဝ်ႈဢွၵ်ႇၵႂႃႇမႃးဢၼ်လဵဝ်ၵူၺ်း၊ လွင်ႈၶူဝ်ၵုၼ်ႇတႄႉ တေႃႉတၢင်ႇၶဝ်ႈဢွၵ်ႇၵႂႃႇမႃးလႆႈ မိူၼ်ပၵ်းၵဝ်ႇပိူင်ၵဝ်ႇယူႇ၊ ၵူၺ်းၵႃႈ လႆႈသႂ်ႇၶွၼ်ႇၵႃႈႁႅင်း ။ ပေႃးပဵၼ်ၶူဝ်မၢႆ 1 တႄႉ ပေႃးပဵၼ်ၶူဝ်းမွၵ်ႈႁဝ်းယုၵ်ႉလႆႈ ပေႉလႆႈၼၼ်ႉၵူၺ်းတႄႉ ဢမ်ႇလႆႈသဵင်ႈၵႃႈၶွၼ်ႇသင်” ဝႃႈၼႆ။

ၼင်ႇႁိုဝ်တေၵုမ်း လႆႈတၢင်းပဵၼ်ၶူဝ်ႊဝိတ်ႉ – 19 ပေႃးတေဢမ်ႇလၢမ်းၽႄႈႁၢဝ်ႈႁႅင်းၼၼ်ႉ လူင်ပွင်ၸိုင်ႈမိူင်းထႆး ၸီႉသင်ႇႁႂ်ႈပိၵ်ႉဢိုတ်းၽၵ်းတူ ၶူဝ်လႅၼ်လိၼ်ၵူႈတီႈ ၸွမ်းသဵၼ်ႈတၢင်းၶဝ်ႈလႅၼ်လိၼ် ၽၵ်းတူ ပဵၼ်တၢင်းၵၢၼ် ဢမ်ႇပဵၼ်တၢင်းၵၢၼ်ၸိူဝ်းၼႆႉ၊ ပႃးၸဵမ်တီႈ မႄႈသၢႆ လႅၼ်လိၼ်တႆး – ထႆး။

ၸၢႆးသၢမ် ၵူၼ်းႁပ်ႉတေႃႉသူင်ႇၶူဝ်းၵုၼ်ႇၶဝ်ႈဢွၵ်ႇ တၢင်းတႃႈၶီႈလဵၵ်း – မႄႈသၢႆ လၢတ်ႈတီႈၽူႈတွႆႇႁွၵ်ႈဝႃႈ “လႆႈငိၼ်းဝႃႈ တၢင်းၾင်ႇမိူင်းထႆး ပေႃႈၵႃႉ(ၵူၼ်းၵႃႉ) ၶၢႆၶဝ်တႄႉၶႂ်ႈလုၵ်ႉႁိုၼ်ႇၼႄၵၢင်ၸႂ်ၵွၼ်ႇၼႆ။ ၵူၺ်းၵႃႈ ထႅင်ႈၾၢႆႇၼိုင်ႈၵေႃႈ တုၵ်းယွၼ်းထိုင် လူင်ပွင်ၸိုင်ႈမိူင်းထႆး ႁႂ်ႈၸဵဝ်းပိုတ်ႇၶူဝ်ၼၼ်ႉယူႇ” ဝႃႈၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ 19 သေ ၵၢၼ်သိုဝ်ႉၵၢၼ်ၶၢႆဢမ်ႇပေႃးပဵၼ်ၵၢၼ် မိူၼ်မိူဝ်ႈၵူႈပွၵ်ႈ၊ တုမ်ႉတိူဝ်ႉၵၢၼ်ပၢႆးမၢၵ်ႈမီး ၸွမ်းလႅၼ်လိၼ်တႄႉတႄႉ ဝႃႈၼႆ။

ၸၢႆးတုၺ်ႈ ၵူၼ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၵႃႈၸူဝ်ႈပဵၼ်မႃးၶူဝ်ႊဝိတ်ႉ – 19 ၼႆႉ ၵၢၼ်ၵႃႉၶၢႆႁဝ်းၶႃႈ ၸွမ်းလႅၼ်လိၼ်ၼႆႉ တိုၼ်းဝႃႈ တုမ်ႉတိူဝ်ႉၵၼ်ၵူႈၵေႃႉၶႃႈယဝ်ႉ ဢမ်ႇၼမ်လႄႈဢေႇ၊ ဢမ်ႇၸႂ်ႈဝႃႈ တုမ်ႉတိူဝ်ႉၵေႃႉလဵဝ် တီႈလဵဝ်ၵူၺ်း တိုၼ်းဝႃႈတုမ်ႉတိူဝ်ႉၵူႈတီႈ ၵူႈၵေႃႉၶႃႈယဝ်ႉ” ဝႃႈၼႆ။

ဢိင်ၼိူဝ်လူင်ပွင်ၸိုင်ႈထႆး ၸီႉသင်ႇပိၵ်ႉဢိုတ်းတၢင်းၶဝ်ႈဢွၵ်ႇ ၸွမ်းလႅၼ်လိၼ်တႆး – ထႆးသေ ႁႅင်းၵၢၼ်တႆး ၸိူဝ်းပွၵ်ႈမႃး သူႇၸႂ်းႁိူၼ်းယေး ၼႂ်းမိူင်းတႆး ၽွင်းၼႃႈၶၢဝ်းသွၼ်းၼမ်ႉၸိူဝ်းၼၼ်ႉ ဢွၼ်ၵၼ် ၵိုတ်းၶမ်ဝႆႉတင်းၼမ်။ ယၢမ်းလဵဝ် ၶႂ်ႈဢွၼ်ၵၼ်ပွၵ်ႈၶဝ်ႈၵႂႃႇႁဵတ်းၵၢၼ်ၶိုၼ်းၼႂ်းမိူင်းထႆး ၸိူဝ်းၼႆႉမီးတင်းၼမ်။

ၸၢႆးလိူၼ် ၵူၼ်းမိူင်းသူႈ ဢၼ်လုၵ်ႉမိူင်းထႆး ပွၵ်ႈမႃးသူႇၸႂ်းႁိူၼ်းယေးၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းၶႃႈတႄႉ ၶႂ်ႈၶဝ်ႈမိူဝ်းႁဵတ်းၵၢၼ် တၢင်းမိူင်းထႆးၶိုၼ်းၶႃႈယဝ်ႉ၊ ပႂ်ႉပိူၼ်ႈပိုတ်ႇၽၵ်းတူလႅၼ်လိၼ်ၵူၺ်းၶႃႈဢေႃႈ။ ယူႇတီႈမိူင်းႁဝ်း ၶႃႈၵေႃႈ ၶဝ်ႈၼမ်ႉတၢင်းၵိၼ်တႄႉ ဢမ်ႇဢိုပ်းၼင်ႇၵဝ်ႇၶႃႈ၊ ၵူၺ်းၵႃႈ မၼ်းၶၢတ်ႇငိုၼ်းလၢႆးလႆႈ တႃလႆႈငိုၼ်း၊ ဢမ်ႇမီးငိုၼ်းၶဝ်ႈၵူႈလိူၼ် ၵူႈဝၼ်း၊ ႁိုင်ႁိုင်ၼၢၼ်းၼၢၼ်း ပေႃးလႆႈၶၢႆၶူဝ်းၼႂ်းသူၼ် ၶဝ်ႈၸိူဝ်းၼႆႉၵွၼ်ႇၸင်ႇတေလႆႈ၊ မၢင်ပွၵ်ႈမႃးပၢႆသုမ်းထႅင်ႈၵွၼ်ႇ။ လိူဝ်ၼၼ်ႉ တေၶၢႆဝူဝ်းၵႂၢႆးၼႆၵေႃႈ မိူဝ်ႈလဵဝ်ၼႆႉ ပိူၼ်ႈတဵၵ်းၶၼ်မၼ်းထႅင်ႈၵွၼ်ႇ မိူင်းႁဝ်းၶႃႈၼႆႉ” ဝႃႈၼႆ။