ၼႂ်းလိူၼ်ၵျုၼ်ႊၼႆႉၵူၺ်း ၶွင်ႇသီႇဢဝ်ၶိုၼ်းၸိုင်ႈတႆး RCSS ထုၵ်ႇသိုၵ်းမၢၼ်ႈ ပိုတ်ႇၼႃႈသိုၵ်းၸူး 2 ပွၵ်ႈ၊ ၼႂ်းၸႄႈဝဵင်းသီႇပေႃႉပွၵ်ႈၼိုင်ႈ ဢိၵ်ႇ ၼႂ်းၸႄႈဝဵင်းမိူင်းတူၼ် ပွၵ်ႈၼိုင်ႈ။
ဝၼ်းတီႈ 10/6/2020 ယၢမ်းႁူဝ်ၶမ်ႈ 4 မူင်းၶိုင်ႈ တေႃႇထိုင် 5 မူင်းပၢႆၼၼ်ႉ သိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 326 ဢဵၼ်ႁႅင်း မွၵ်ႈ 40 ပၢႆ တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ် တီႈလွႆပၢင်ၶႃး ဢိူင်ႇမိူင်းတုင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ပွၵ်ႈၼိုင်ႈ။
ဢွၼ်ၼႃႈၼႆႉ မိူဝ်ႈဝၼ်းတီႈ 3/6/2020 ယၢမ်းၵၢင်ၼႂ် မွၵ်ႈ 8 မူင်းပၢႆ ထိုင် 10 မူင်းၼၼ်ႉၵေႃႈ သိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 65 တင်း တပ်ႉပႂ်ႉလႅၼ်လိၼ် BGF 1007 (ၸုမ်းၵျပီးၵွႆႇ) ႁူမ်ႈၵၼ် ဢဵၼ်ႁႅင်း 100 ပၢႆ ပိုတ်ႇၼႃႈသိုၵ်းၸူး RCSS/SSA တီႈၵိဝ်ႇၼမ်ႉၶမ်း ဢိူင်ႇၼႃးၵွင်းမူး ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇၶူင်း ပွၵ်ႈၼိုင်ႈ -ၼႆယဝ်ႉ။
“လွင်ႈပၢင်တိုၵ်းတၢင်းသီႇပေႃႉၼၼ်ႉတႄႉ လွင်ႈတူင်ႉၼိုင်သိုၵ်းမၢၼ်ႈၶဝ် ဢမ်ႇမီးၵၢၼ်ထႅမ်ႁႅင်းသိုၵ်းသင်၊ ၾၢႆႇ RCSS ႁဝ်းၶႃႈတႄႉ ယွၼ်ႉပဵၼ်ၼႂ်းပိုၼ်ႉတီႈႁဝ်းလႄႈ ယူႇမိူၼ်ၵဝ်ႇ တူင်ႉၼိုင်မိူၼ်ၵဝ်ႇၵူၺ်း ဢမ်ႇမီးလွင်ႈလႅၵ်ႈလၢႆႈ သုတ်ႉၶၢႆႉ ထွၼ်သင်။ ၵဵဝ်ႇၵပ်းလွင်ႈၼႆႉ ယူႇတီႈလုမ်းၵပ်းသၢၼ် တီႈတူၼ်ႈတီးႁဝ်းၶႃႈၵေႃႈ လႆႈၵပ်းသၢၼ်ပွင်ႇပၼ်တၢင်းၾၢႆႇ သိုၵ်းမၢၼ်ႈၶဝ်ယူႇ” ဝႃႈၼႆ။
လွင်ႈသိုၵ်းလူင်ပွင်ၸိုင်ႈမၢၼ်ႈ ပိုတ်ႇၼႃႈသိုၵ်းၸူး ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈဝႃႈ သိုၵ်းမၢၼ်ႈ ပူၼ်ႉပႅၼ်လိၵ်ႈၵိၼ်ၵႅၼ်ႇၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) ဝႃႈၼႆ။
“လွင်ႈဢၼ်သိုၵ်းမၢၼ်ႈ ပိုတ်ႇၼႃႈသိုၵ်းၸူးႁဝ်းၶႃႈၼႆႉ တေလႆႈဝႃႈ ပူၼ်ႉပႅၼ် NCA ၶႃႈယဝ်ႉ။ သိုၵ်းမၢၼ်ႈၶဝ် ဢမ်ႇပွင်ႇၶၢဝ်ႇၸူးႁဝ်း လတ်းထိူၼ်ႇလတ်းၶိူဝ်းၶဝ်ႈမႃးလႄႈ ၸင်ႇလႆႈပဵၼ်ပၢင်တိုၵ်းၵၼ်။ ယူႇတီႈမုၵ်ႉၸုမ်းႁဝ်းၶႃႈတႄႉ တိုၼ်းၸုၵ်းမၼ်ႈၼိူဝ် NCA လႄႈ တေဢဝ်လွင်ႈဢုပ်ႇဢူဝ်းသေ ၵႄႈလိတ်ႈၵႂႃႇၵူၺ်း” ဝႃႈၼႆ။
ဢၼ်သိုၵ်းလူင်ပွင်ၸိုင်ႈမၢၼ်ႈ ပိုတ်ႇၼႃႇသိုၵ်းၸူး RCSS/SSA ၼႆႉ ၵမ်ႈၼမ် ဢမ်ႇပွင်ႇၶၢဝ်ႇၸူး တၢင်း RCSS သေ တင်ႈၸႂ် သွၵ်ႈတဝ်ထိူၼ်ႇ တီႈဢၼ်မီးတပ်ႉသိုၵ်း RCSS ယူႇဝႆႉ တူင်ႉၼိုင်ဝႆႉ ၸိူဝ်းၼၼ်ႉလႄႈ ၸင်ႇလႆႈၽႃႇၺႃးၵၼ်သေ လႆႈပဵၼ်ပၢင်တိုၵ်းၵၼ်မႃး ယူႇတႃႇသေႇ ၼႆယဝ်ႉ။
ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉ တူဝ်ႈမိူင်း NCA ၸုမ်းၼိုင်ႈ။
ႁွင်ႈၵၢၼ်ပိုၼ်ၽၢဝ်ႇ ၶွင် RCSS/SSA ဝႅပ်ႉသၢႆႉတႆးလွတ်ႈလႅဝ်း ဢွၵ်ႇဝႆႉဝႃႈ တင်ႈတႄႇ ၶွင်ႇသီႇဢဝ်ၶိုၼ်းၸိုင်ႈတႆး RCSS လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA မႃး တႄႇဢဝ် ဝၼ်းတီႈ 31/12/2015 တေႃႇထိုင် 3/6/2020 ၼႂ်းၶၢဝ်းတၢင်း 4 ပီ သိုၵ်းလူင်ပွင်ၸိုင်ႈမၢၼ်ႈတင်း သိုၵ်း RCSS သွင်ၾၢႆႇလႆႈပဵၼ်ပၢင်တိုၵ်းၵၼ်မႃး 87 ပွၵ်ႈ ဝႃႈၼႆ။
ၼႂ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 10 ၸုမ်း ဢၼ်လူင်းလၢႆးမိုဝ်း NCA တင်းသဵင်ႈၼႆႉ RCSS/SSA လႆႈပဵၼ်ပၢင်တိုၵ်းၵၼ် တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ၼမ်လိူဝ်ပိူၼ်ႈ ၼႆယဝ်ႉ။
