ၾူၼ်တူၵ်းႁႅင်း ၼမ်ႉႁူၺ်ႈၼမ်ႉလွႆ လေႃႈလူင်းလုပ်ႇထူမ်ႈ ႁိူၼ်းၵူၼ်းဝၢၼ်ႈ ၼႂ်းၸေႈဝဵင်းၵျွၵ်ႉမႄး ။

ဝၼ်းတီႈ 11/6/2020 ယၢမ်းႁူဝ်ၶမ်ႈ မွၵ်ႈ 5 မူင်းၶိုင်ႈၼႆႉၾူၼ်တူၵ်းႁႅင်းလႄႈ ၼမ်ႉလုပ်ႇၼွင်းထူမ်ႈ ႁိူၼ်းယေးၵူၼ်းဝၢၼ်ႈပူးၶႃး ၼႂ်းၵႄႈ ၵျွၵ်ႉမႄး – သီႇပေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ၵူၼ်းဝၢၼ်ႈတႄႉလၢတ်ႈဝႃႈ ယွၼ်ႉပိူဝ်ႈဢမ်ႇမီးႁွင်ႈၼမ်ႉမိူင်ၼမ်ႉတႃႇၼမ်ႉလႆ ဝႃႈၼႆ။

ၸၢႆးဢွၼ်ႇ ၵူၼ်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ တီႈဝၢၼ်ႈပူးၶႃးႁဝ်းၶႃႈၼႆႉ ၶႂ်ႈဝႃႈ ၼမ်ႉထူမ်ႈၵူႈပီၶႃႈယဝ်ႉ။ ဝၢၼ်ႈသမ်ႉယူႇတႅမ်ႇလိူဝ်သဵၼ်ႈတၢင်း၊ ႁႆႈသမ်ႉမီးၾၢႆႇ ၼိူဝ်ဝၢၼ်ႈ ။ ပေႃးၾူၼ်တူၵ်းမႃးႁႅင်းၼႆ ၼမ်ႉႁူၺ်ႈၼမ်ႉလွႆၼႆႉ လႆထူမ်ႈ ၵူႈပီၶႃႈယဝ်ႉ။ ပိူင်လူင် ယွၼ်ႉဢမ်ႇမီးႁွင်ႈၼမ်ႉလႆ လႄႈ ၼမ်ႉလေႃႈလူင်းလွႆသေ လူင်းၸူးႁိူၼ်းၵူၼ်းဝၢၼ်ႈၵမ်းလဵဝ်ၶႃႈယဝ်ႉ ” ဝႃႈၼႆ။

ၶၢဝ်းၼႆႉသမ်ႉ ပဵၼ်ၶၢဝ်းၽုၵ်ႇၶဝ်ႈၵၢပ်ႇလႄႈ ပဵၼ်ၶၢဝ်း ႁႆႈၵဵင်ႈလီ ၊ ၶႅပ်ႇသူၼ်သမ်ႉဢမ်ႇမီးတူၼ်ႈမႆႉ ဢမ်ႇမီးႁွင်ႈၼမ်ႉလႆလႄႈ ပေႃးၾူၼ်တူၵ်း ၼမ်ႉလွႆလႄႈ လိၼ်ႁႆႈလူင်းၸူးဝၢၼ်ႈၵမ်းသိုဝ်ႈ ၸၢႆးဢွၼ်ႇ လၢတ်ႈၼႄၼင်ႇၼႆ။

ၼႂ်းၸႄႈဝဵင်းၵျွၵ်ႉမႄးၼႆႉ ၾူၼ်တူၵ်းၵူႈဝၼ်း၊ မိူဝ်ႈဝႃး ဝၼ်းတီႈ 11 ၼႆႉ တူၵ်းႁႅင်းဝႆႉ -ၼႆယဝ်ႉ။

ဝၢၼ်ႈပူးၶႃးၼႆႉ ယူႇၼႂ်းၵႄႈဝၢၼ်ႈလွႆၶေႃ တင်း ဝၢၼ်ႈၼႃးၶေႃ ႁိမ်းသဵၼ်ႈတၢင်းလူင် သီႇပေႃႉ – ၵျွၵ်ႉမႄး ယၢၼ်ၵႆဝဵင်းၵျွၵ်ႉမႄးမွၵ်ႈ 4 လၵ်းၼႆႉ။

ၼႂ်းႁူဝ်လိူၼ်ၵျုၼ်ႊၼႆႉ ယွၼ်ႉၾူၼ်တူၵ်းထပ်းၵၼ် ႁၢဝ်ႈႁႅင်းလႄႈ ၼႂ်းၸႄႈဝဵင်းၵျွၵ်ႉမႄး မိူၼ်ၼင်ႇ ပွတ်းမိူင်းတၢင်ႈ၊ ၼမ်ႉၸေႃႉ၊ ၸွႆးၵုင်း ဢိၵ်ႇထႅင်ႈလၢႆလၢႆတီႈ ၸိူဝ်းၼႆႉ ၼမ်ႉလုပ်ႇၼွင်းထူမ်ႈႁၢဝ်ႈႁႅင်း၊ မၢင်ၸိူဝ်း ၽႃဢုတ်ႇႁူဝ်ႉ ၸိူဝ်းၼႆႉ လႆႈၵူၼ်ႇပင်းၵေႃႈမီး၊ မၢင်ၸိူဝ်း လိၼ်ၵူၼ်ႇလူင်းႁိမ်းၶၢင်ႈႁိူၼ်း ၸိူဝ်းၼႆႉၵေႃႈမီး ၼႆယဝ်ႉ။