ၵူၼ်းမိူင်းတၢင်ႉယၢၼ်း သွင်ၽူဝ်မေး ၵႂႃႇႁဵတ်းႁႆႈႁဵတ်းသူၼ် ႁၼ်ႁဵပ်းဢွၵ်ႇၼႂ်းထိူၼ်ႇ ၵဵပ်းမႃးၵိၼ် ၺႃးႁဵပ်းမိူဝ်ႇ လူႉတၢႆတင်းသွင်ၵေႃႉပူႇဢွၵ်ႇ ဝႃႈၼႆ။
ဝၼ်းတီႈ 8-9/6/2020 သွင်ၵေႃႉၽူဝ်မေး ၵူၼ်းဝၢၼ်ႈၼမ်ႉပၢတ်ႈ ဢိူင်ႇၼမ်ႉလပ်ႉ ၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ၊ ၵႂႃႇၵဵပ်းႁဵပ်းမႃးၵိၼ် ၺႃးႁဵပ်းမိူဝ်ႇသေ လႆႈလူႉတၢႆ တင်းသွင်ၵေႃႉ ၽူဝ်မေးၵမ်းလဵဝ်။
ၸၢႆးၸွမ် ၵူၼ်းပိုၼ်ႉတီႈ တၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ “ပဵၼ်သွင်ၵေႃႉ ၽူဝ်မေးၶႃႈဢေႃႈ ဢၼ်လႆႈလူႉတၢႆ ၵႂႃႇၼၼ်ႉ၊ ၵႂႃႇၵဵပ်းႁဵပ်းမႃးၵိၼ် ၵူၺ်းၵႃႈ ဢမ်ႇႁူႉဝႃႈ ပဵၼ်ႁဵပ်းမိူဝ်ႇၼၼ်ႉၶႃႈၼႃႇ။ ႁဵတ်းၼၼ်သေ လႆႈလူႉတၢႆ တင်းသွင်ၵေႃႉၽူဝ်မေး ၶႃႈယဝ်ႉ” ဝႃႈၼႆ။
ၵူၼ်းဝၢၼ်ႈၼမ်ႉပၢတ်ႈ သွင်ၽူဝ်မေး ၼႆႉ ၵေႃႉၽူဝ် ၸိုဝ်ႈ ၶိင်းမွၵ်ႇသႅင် ဢႃယု 70 ပီလႄႈ ၵေႃႉပဵၼ်မေး ၸိုဝ်ႈႁွင်ႉ ၼၢႆးမွၵ်ႇသႅင်။ ၶိင်းမွၵ်ႇသႅင် လႆႈလူႉတၢႆ ၵႂႃႇမိူဝ်ႈဝၼ်းတီႈ 8/6/2020 ယၢမ်းၵၢင်ၼႂ် 6 မူင်း။ ၵေႃႉပဵၼ်ၽူႈယိင်းၼၼ်ႉသမ်ႉ လႆႈလူႉတၢႆၵႂႃႇ မိူဝ်ႈဝၼ်းတီႈ 9/6/2020 ယၢမ်းၵၢင်ၶမ်ႈ 8 မူင်း ဝႃႈၼႆ။
မိူဝ်ႈဝၼ်းတီႈ 6/6/2020 ၼၼ်ႉ သွင်ၽူဝ်မေးၵႂႃႇႁဵတ်းၵၢၼ်ႁႆႈၵၢၼ်သူၼ်သေ ၵဵပ်းႁဵပ်းဢၼ်ဢွၵ်ႇၸွမ်းၼႂ်းထိူၼ်ႇ ၸိူဝ်းၼၼ်ႉ မႃးၵိၼ်၊ ၵူၺ်းၵႃႈ ပဵၼ်ႁဵပ်းမိူဝ်ႇ ဝႃႈၼႆ။
ၸၢႆးၸွမ် သိုပ်ႇလၢတ်ႈဝႃႈ “တေႃႈလဵဝ်ၼႆႉ ပဵၼ်ၶၢဝ်းၾူၼ်ယဝ်ႉလႄႈ ၸွမ်းၼင်ႇသၽႃႇဝ ၸွမ်းၼႂ်းထိူၼ်ႇတႄႉ တေဢွၵ်ႇႁဵပ်း၊ ၵူၺ်းၵႃႈ ၵူၼ်းမိူင်းႁဝ်းၶႃႈသမ်ႉ ဢမ်ႇႁူႉဝႃႈ ဢၼ်လႂ်ပဵၼ်ႁဵပ်းမိူဝ်ႇ ဢမ်ႇမိူဝ်ႇဢၼ်ဝႃႈၼၼ်ႉ ၵဵပ်းမႃးၵိၼ်ၵၼ်ၶႃႈဢေႃႈ။ ယွၼ်ႉၼၼ် ၶႂ်ႈယွၼ်းၾၢၵ်ႇထိုင်ဝႃႈ ႁဵပ်းဢၼ်ဢွၵ်ႇယူႇၼႆႉ ယႃႇပေလႃႈလီႈဢဝ်မႃးၵိၼ်၊ လဵပ်ႈႁဵၼ်းတူၺ်းလီလီၵွၼ်ႇ သင်ဢမ်ႇႁူႉဝႃႈပဵၼ်ႁဵပ်းသင်ၼႆ ယႃႇပေဢဝ်မႃးၵိၼ်လႃးလႃး ၵူဝ်ပဵၼ်ႁဵပ်းမိူဝ်ႇၶႃႈဢေႃႈ” ဝႃႈၼႆ။
တီႈဢိူင်ႇၼမ်ႉလပ်ႉၼႆႉ ပဵၼ်ၼႂ်းၼႃႈတီႈ SSPP ၵုမ်းၵမ်ဝႆႉ လွင်ႈၵၢၼ်ၽုၵ်ႇသွမ်ႈ ႁႃၵိၼ်လဵင်ႉတွင်ႉ တႃႇၵူၼ်းမိူင်းတႄႉ ယူႇတီႈ SSPP လႆႈၸွႆႈၸိူဝ်ႉ ၸွႆႈၾၼ်းၶဝ်ႈပၼ်၊ လွင်ႈသဵၼ်ႈတႃႈသၢႆတၢင်း ၸိူဝ်းၼႆႉၵေႃႈ လႆႈၵမ်ႉၸွႆႈႁဵတ်းသၢင်ႈပူၵ်းပွင် ပၼ်မႃး။ လွင်းတၢင်းပဵၼ်ၶူဝ်ႊဝိတ်ႉ 19 ၼင်ႇႁိုဝ် ပေႃးတေဢမ်ႇလၢမ်းၽႄႈ တိတ်းၸပ်း ၵူၼ်းမိူင်းၵေႃႈ ယူႇတီႈၽူႈမီးပုၼ်ႈၽွၼ်းၶဝ် လႆႈၵူတ်ႇထတ်းပႂ်ႉတူၺ်းပၼ်ၶႅမ်ႉလႅပ်ႈလီ ၵူၼ်းမိူင်းၼႂ်းဢိူင်ႇၼမ်ႉလပ်ႉ လၢတ်ႈၼႄၼင်ႇၼႆ။
