ၸဝ်ႈတီႈလိၼ်သူၼ် ဝဵင်းၶူဝ်လမ် 47 ၵေႃႉ ထုၵ်ႇသိုၵ်းလူင်ပွင်ၸိုင်ႈမၢၼ်ႈ ယိုတ်းဢဝ်တီႈလိၼ်သေဢမ်ႇၵႃး ယင်းမၢပ်ႇမႂ်ပႃးဝႃႈပူၼ်ႉပႅၼ် ၶဝ်ႈႁဵတ်းသူၼ် ၽုၵ်ႇသွမ်ႈ ၼႂ်းၼႃႈလိၼ်တပ်ႉသိုၵ်း ၼႆသေ ၸႅင်ႈၵႂၢမ်း (ၸွႆးတြႃး ဢဝ်ၶိုၼ်ႈလုမ်း) ပႃးထႅင်ႈ ဝႃႈၼႆ။

ယူႇတီႈတပ်ႉၶလယ 66 ပႃႈတႂ်ႈတိူင်းသိုၵ်းၶူဝ်လမ် ယလၶ ယိုတ်းဢဝ်တီႈလိၼ်ၶွင်ၵူၼ်းဝၢၼ်ႈ 64 ၵေႃႉ တႃႇ 1,353.33 ဢေႊၶိူဝ်ႊ။ ဝၼ်းတီႈ 9/6/2020 ၼၼ်ႉ ၼႄး ၸဝ်ႈသူၼ် 47 ၵေႃႉ ပူၼ်ႉပႅၼ် ၽုၵ်ႇသွမ်ႈ ၼႂ်းပိုၼ်ႉတီႈ လိၼ် တပ်ႉသိုၵ်းၼႆသေ ၾၢႆႇတပ်ႉသိုၵ်းမၢၼ်ႈတီႈၶူဝ်လမ် ၸွႆးတြႃးၶဝ် ဢဝ်ၶဝ်ၶိုၼ်းလုမ်းတြႃး တီႈၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း။

ဢူးလႃႉထုၼ်း ၸဝ်ႈသူၼ် ဢၼ်ထုၵ်ႇသိုၵ်းမၢၼ်ႈ ယိုတ်းဢဝ်တီႈလိၼ်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ဢၼ်တပ်ႉယိုတ်းဢဝ်ၵႂႃႇတီႈလိၼ်ၼၼ်ႉ တင်းမူတ်း 64 ၵေႃႉ၊ ဢၼ်ၺႃးၸွႆးတြႃးသမ်ႉ 47 ၵေႃႉ” ဝႃႈၼႆ။

တီႈလိၼ်ဢၼ်တပ်ႉသိုၵ်းလူင်ပွင်ၸိုင်ႈမၢၼ်ႈ ယိုတ်းဢဝ်ၼႆႉ ပဵၼ်တီႈလိၼ်ၵူၼ်းဝၢၼ်ႈ ႁဵတ်းၵိၼ်သူၼ် ၽုၵ်ႇသွမ်ႈၼႂ်းမၼ်းမႃး ၶၢဝ်းတၢင်း 40 ပီပၢႆယဝ်ႉ။ ထိုင်မႃး မိူဝ်ႈပီ 2019 လိူၼ်ဢေႃႊၵသ်ႊတ်ၼၼ်ႉ ယူႇတီႈၽူႈၵွၼ်း ၵိင်ႇၸႄႈဝဵင်းၶူဝ်လမ် ႁွင်ႉၸဝ်ႈသူၼ် ၵႂႃႇၶိုၼ်ႈပၢင်ၵုမ်သေ ႁႂ်ႈလူင်းလၢႆးမိုဝ်းပၼ် ဝႃႈပဵၼ်တီႈလိၼ်ၶွင်တပ်ႉ ဝႃႈၼႆ။

ဢူးလႃႉထုၼ်း သိုပ်ႇလၢတ်ႈဝႃႈ “ သိုၵ်းမၢၼ်ႈဝႃႈႁဝ်းၶႃႈၼႆႉ ပူၼ်ႉပႅၼ်ၶဝ်ႈၽုၵ်ႇသွမ်ႈၼႂ်းလိၼ်ၶဝ်ၼႆ။ ႁဝ်းၶႃႈလူင်းလၢႆးမိုဝ်းပၼ်သေ ႁဵတ်းၵိၼ်ၽုၵ်ႇသွမ်ႈၼႂ်းမၼ်းလႆႈယူႇ၊ သင်ဝႃႈ လူင်ပွင်ၸိုင်ႈလူဝ်ႇႁဵတ်းသင်သေပိူင်ပိူင်ၼႆ ၸင်ႇႁႂ်ႈၶၢႆႉပၼ်။ ၵူၺ်းၵႃႈ ႁဝ်းၶႃႈၵူႈၵေႃႉ ဢမ်ႇယွမ်းလူင်းလၢႆးမိုဝ်းပၼ်” ဝႃႈၼႆ။

ဢိင်ၼိူဝ်လွင်ႈၼႆႉသေ တပ်ႉသိုၵ်းမၢၼ်ႈတင်း ၸဝ်ႈသူၼ် လႆႈႁူပ်ႉဢုပ်ႇၵၼ်မႃး မီး 4 ပွၵ်ႈယဝ်ႉ။ ယူႇတီႈတပ်ႉသိုၵ်းမၢၼ်ႈ ၸႂ်ႉၸဝ်ႈသူၼ် လူင်းလၢႆးမိုဝ်းပၼ်ၵူႈၵမ်း ၵူၺ်းၵႃႈ ၸဝ်ႈသူၼ်ဢမ်ႇယွမ်းလူင်းပၼ်သေၵေႃႉ၊ လွင်ႈႁွင်ႉပၢင်ၵုမ်ဢုပ်ႇ ၵၼ်ၵေႃႈ ပွၵ်ႈၼိုင်ႈလႄႈပွၵ်ႈၼိုင်ႈ ၵူၼ်းၸိူဝ်းမႃးၼၼ်ႉ ဢမ်ႇမိူၼ်ၵၼ်။ ထိုင်မႃး ပၢင်ၵုမ်ၵမ်းထီႉ 4 ၼႆႉ ယူႇတီႈတပ်ႉသိုၵ်းမၢၼ်ႈ ၸွႆးတြႃး ၸဝ်ႈသူၼ် 47 ၵေႃႉ ဢၼ်မႃးၶိုၼ်ႈပၢင်ၵုမ်ၼႆႉ လူၺ်ႈမၢႆမီႈ ၶေႃႈ 447 ဝႃႈၼႆ။

ဢူးလႃႉထုၼ်း လၢတ်ႈဝႃႈ “ ၼႂ်းပၢင်ၵုမ် 4 ပွၵ်ႈၼၼ်ႉ ၶဝ်ၸႂ်ႉႁဝ်းၶႃႈလူင်းလၢႆးမိုဝ်း ၵူၺ်းၵႃႈ ႁဝ်းၶႃႈဢမ်ႇယွမ်းလူင်းၶႃႈ။ ယွၼ်ႉၼၼ်လႄႈ ၶဝ်ၸင်ႇပိုတ်ႇလိူင်ႈၸွႆးတြႃးႁဝ်းၶႃႈယဝ်ႉ” ဝႃႈၼႆ။

ဢွင်ႈတီႈဢၼ်တပ်ႉသိုၵ်းလူင်ပွင်ၸိုင်ႈမၢၼ်ႈ ႁုပ်ႈယိုတ်းတီႈလိၼ်ၼၼ်ႉ ပဵၼ်တီႈလိၼ်ၵူၼ်းမိူင်းၽုၵ်ႇသွမ်ႈ ႁဵတ်းၵိၼ်မႃးၵူႈပီသေ ပေႃးဝႃႈသိုၵ်းမၢၼ်ႈ ႁွတ်ႈထိုင်မႃးတီႈၶူဝ်လမ်ၵေႃႈ တႄႇႁၢမ်ႈတပ်ႉမႃးတႃႇသေႇလႄႈ တေႃႈလဵဝ် ၸဝ်ႈသူၼ် ႁူပ်ႉလွင်ႈယၢပ်ႇၽိုတ်ႇလိူဝ်ႁႅင်း လွင်ႈၵၢၼ်ႁႃၵိၼ်လဵင်ႉတွင်ႉၽုၵ်ႇသွမ်ႈၵၼ် ဝႃႈၼႆ။

ၸဝ်ႈသူၼ် ၵေႃႉၼိုင်ႈ ဢမ်ႇၶႂ်ႈဢွၵ်ႇၸိုဝ်ႈတႄႉ လၢတ်ႈဝႃႈ “ ႁဝ်းၶႃႈ လူဝ်ႇႁႃၽူႈတၢင်ၼႃႈ(ရှေ့နေ) သေ တေႃႇသူႇၵႂႃႇၵူၺ်းၶႃႈယဝ်ႉ” ဝႃႈၼႆ။

ဢိင်ၼိူဝ်လွင်ႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုတ်ႇလိူင်ႈၸွႆးတြႃး ၸဝ်ႈသူၼ် 47 ၵေႃႉၼႆႉသေ ယူႇတီႈၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး တီႈၽူႈၵွၼ်းၵိင်ႇၸႄႈဝဵင်းၶူဝ်လမ်လႄႈ တပ်ႉသိုၵ်းမၢၼ်ႈယူႇ၊ ၵူၺ်းၵႃႈၵပ်းၸူးဢမ်ႇလႆႈ။

မိူဝ်ႈႁၢင်လိူၼ်မေႊပူၼ်ႉမႃးၼၼ်ႉၵေႃႈ တီႈၸႄႈဝဵင်းသီႇသႅင်ႇ ၵူၼ်းဝၢၼ်ႈ 5 ဝၢၼ်ႈ မီးလွင်ႈထဵင်မေႃးလွင်ႈတီႈလိၼ် ဢၼ်တပ်ႉသိုၵ်းလူင်ပွင်ၸိုင်ႈ ႁုပ်ႈယိုတ်းဢဝ်ဝႆႉၼၼ်ႉ ယူႇတီႈတပ်ႉသိုၵ်းမၢၼ်ႈ ပိုတ်ႇလိူင်ႈၸွႆႈတြႃးၸဝ်ႈသူၼ်ဝႆႉ 70 ပၢႆ ၼင်ႇၵဝ်ႇ-ဝႃႈၼႆ။

လွင်ႈသိုၵ်းလူင်ပွင်ၸိုင်ႈမၢၼ်ႈ ႁုပ်ႈယိုတ်းဢဝ်တီႈလိၼ်ၵူၼ်းမိူင်းတႆးၼႆႉ ဢမ်ႇၸႂ်ႈၼႂ်းၸိုင်ႈတႆးပွတ်းၸၢၼ်းၵူၺ်း ၼႂ်းၸိုင်ႈတႆးပွတ်းႁွင်ႇၵေႃႈ ထုၵ်ႇယိုတ်းဢဝ်တင်းၼမ်၊ လွင်ႈၼႆႉ ယူႇတီႈၵူၼ်းမိူင်း ၸိူဝ်းၺႃးယိုတ်းတီႈလိၼ် ပဵၼ်ဢၼ် ႁူပ်ႉလွင်ႈယၢပ်ႇၽိုတ်ႇ မႆႈၸႂ်တႄႉတႄႉ- ၼႆယဝ်ႉ။