ပၢင်ၵုမ်သၽႃး ၸႄႈမိူင်းတႆး ဢၼ်တေၸတ်းဝူင်ႈတေမႃးၼႃႈၼႆႉ တေႁဵတ်းၸွမ်းပိူင် ၵႅတ်ႇၵင်ႈ တၢင်းပဵၼ် ၶူဝ်ႊဝိတ်ႉ 19 ။
ဝၼ်းတီႈ 22/6/2020 ဝၼ်းၸၼ် ဝူင်ႈတေမႃးၼႃႈၼႆႉ ပၢင်ၵုမ်သၽႃး ၸႄႈမိူင်းတႆး ၵမ်းထူၼ်ႈ 2 ပွၵ်ႈထီႉ 19 တေၸတ်းႁဵတ်းတီႈ လုမ်းသၽႃးမိူင်းတႆး တီႈ ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း – ၼႂ်းပၢင်ၵုမ်တေႉ တေဢုပ်ႇလွင်ႈငိုၼ်းတွင်း တင်း ပၵ်းပိူင်မၢႆမီႈ ၵမ်ႈၽွင်ႈဝႃႈၼႆ။
ၼၢင်းမျႃႉထူၺ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းလွႆလႅမ် လၢတ်ႈတီႈၽူႈတွႆႇႁွၵ်ႈဝႃႈ “ပဵၼ်ပၢင်ၵုမ် ဢၼ်ယၢမ်ႈၸတ်းမႃးသေႇသေႇၼၼ်ႉၵူၺ်း (ပုံမှန်အစည်းအဝေး)။ ၼႂ်းပၢင်ၵုမ်တႄႉၵေႃႈ တေမီး ၶေႃႈတၢင်ႇထိုင်လႄႈ ၶေႃႈတွင်ႈထၢမ် ၸိူဝ်းၼႆႉ” ဝႃႈၼႆ။
တေႃႈလဵဝ် ယွၼ်ႉဝႃႈ ပဵၼ်ၶၢဝ်း တိုၵ်ႉမႆႈၸႂ်တၢင်းပဵၼ်ၶူဝ်ႊဝိတ်ႉ – 19 လႄႈ ပၢင်ၵုမ်သၽႃး ၵေႃႈ တေၸတ်းႁဵတ်းၸွမ်း ၶေႃႈၸီႉသင်ႇ ဢၼ်ႁွင်ႈၵၢၼ်ပၢႆးယူႇလီတမ်းဝၢင်းဝႆႉပၼ်ၼၼ်ႉၵႂႃႇ၊ ပၢင်ၵုမ်သၽႃး ၸႄႈမိူင်းတႆးၼႆႉ ၸတ်းႁဵတ်းသွင် လိူၼ်ၼိုင်ႈပွၵ်ႈ ဝႃႈၼႆ။
ပၢင်ၵုမ်သၽႃးၸႄႈမိူင်းတႆး ၵမ်းထူၼ်ႈ 2 ၼႆႉ ၽူႈတႅၼ်းသၽႃး တင်းမူတ်း မီး 139 ၵေႃႉ၊ လႆႈၸတ်းႁဵတ်းပၢင်ၵုမ် ၸွမ်းၼင်ႇၽႅၼ်ၵၢၼ် 18 ပွၵ်ႈ၊ ပၢင်ၵုမ်ၶိုၵ်ႉၶၵ်ႉ(ဢယေးပေႃႇ) သမ်ႉ 3 ပွၵ်ႈ လႄႈ ပၢင်ၵုမ်ၶိုၵ်ႉတွၼ်း(ဢထူး)သမ်ႉ 2 ပွၵ်ႈ ႁူမ်ႈၵၼ် ပဵၼ် 23 ပွၵ်ႈ- ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ