ဝဵင်းမိူင်းပဵင်း ၼႂ်းၸိုင်ႈတႆးပွတ်းဢွၵ်ႇၶူင်း လႆႈၾႆးၾႃႉ 24 ၸူဝ်ႈမူင်းယဝ်ႉ၊ ဢမ်ႇႁိုင်သင် ၵဵင်းတုင် ၵေႃႈတေလႆႈၼင်ႇၵဝ်ႇ။
တေႃႈလဵဝ် ၼႂ်းၸႄႈဝဵင်းမိူင်းပဵင်း တင်း 3 ပွၵ်ႉ လႆႈၾႆးၾႃႉ 24 ၸူဝ်ႈမူင်းယဝ်ႉ။ တွၼ်ႈတႃႇ တၢင်းၸႄႈဝဵင်းၵဵင်းတုင်ၵေႃႈ ၼင်ႇႁိုဝ် တေလႆႈၾႆးၾႃႉ 24 ၸူဝ်ႈမူင်းၼၼ်ႉ ယူႇတီႈလူင်ပွင်ၸိုင်ႈ တိုၵ်ႉၶတ်းၸႂ်ယူႇ ဝႃႈၼႆ။
ၸၢႆးလႃႉဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းပဵင်း လၢတ်ႈတီႈၽူႈတွႆႇႁွၵ်ႈဝႃႈ “ၼႂ်းၸႄႈဝဵင်းမိူင်းပဵင်းႁဝ်းၶႃႈၼႆႉ ပဵၼ်ပွၵ်ႈၵမ်းႁႅၵ်ႈၶႃႈယဝ်ႉ ဢၼ်လႆႈၾႆးၾႃႉ 24 ၸူဝ်ႈမူင်းၼႆႉ” ဝႃႈၼႆ။
ပူၼ်ႉမႃး မိူဝ်ႈပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 18 ၼၼ်ႉ ယူႇတီႈၽူႈတႅၼ်းသၽႃး လႆႈတၢင်ႇၼႂ်းသၽႃးသေ ယူႇတီႈၽွင်းလူင်ၾၢႆႇၾႆးၾႃႉဝႃႈ ၼႂ်းလိူၼ်ဢေႊပရိူဝ်ႊ တေလႆႈၾႆးၾႃႉယဝ်ႉ ၸၢႆးလႃႉဝိၼ်း လၢတ်ႈၼႄၼင်ႇၼႆ။
ထိုင်မႃးဝၼ်းတီႈ 7 လိူၼ်ၵျုၼ်ႊၼႆႉ ၼႂ်းၸႄႈဝဵင်းမိူင်းပဵင်း ၾႆးၾႃႉ ၸင်ႇတႄႇလႆႈမႃး ဝႃႈၼႆ။
ၸၢႆးလႃႉဝိၼ်း သိုပ်ႇလၢတ်ႈဝႃႈ “ၼင်ႇႁိုဝ်ၸႄႈဝဵင်းမိူင်းပဵင်း 3 ပွၵ်ႉ ပေႃးတေလႆႈ ၾႆးၾႃႉ 24 ၸူဝ်ႈမူင်းၼႆႉ လႆႈသိုပ်ႇၽႄဢဝ်မႃးႁႅင်းၾႆးၾႃႉ တီႈၼမ်ႉၸၢင် တၢင်းႁႅင်း 66KV ” ဝႃႈၼႆ။
ၼႂ်းၸႄႈဝဵင်းမိူင်းပဵင်းၼႆႉ မိူဝ်ႈပူၼ်ႉမႃး လႆႈၾႆးၾႃႉ ၼိုင်ႈၶမ်ႈလႂ် 3-4 ၸူဝ်ႈမူင်း လႆႈပၼ်ႇၸၢၵ်ႈၾႆးသေ ပၼ်ၾႆးၾႃႉၵူၺ်း ဝႃႈၼႆ။
လိူဝ်သေၼၼ်ႉ တၢင်းၸႄႈဝဵင်းၵဵင်းတုင်ၵေႃႈ ဢမ်ႇႁိုင်သင်ၼႆႉ တေလႆႈၾႆးၾႃႉ 24 ၸူဝ်ႈမူင်းယဝ်ႉ၊ တေႃႈလဵဝ် သၢႆၾႆးၾႃႉ တိုၵ်ႉတေႃႇဢဝ် တၢင်းမိူင်းပဵင်းၼႆႉသေ တိုၵ်ႉသိုပ်ႇၸူးတၢင်းၵဵင်းတုင်ယူႇ၊ ယူႇတီႈဢူးၸူဝ်းၺုၼ်ႉလုၼ်ႇ ၽွင်းလူင်ၾၢႆႇၵၢၼ်ငိုၼ်းလႄႈ ၶူင်းၵၢၼ် (သျှမ်းပြည်နယ်အစိုးရ ပြောခွင့်ရ စီမံကိန်း နှင့် ဘဏ္ဍရေးဝန်ကြီး) ၸႄႈမိူင်းတႆး တႅမ်ႈတၢင်ႇဝႆႉၼိူဝ်ၾဵတ်ႉၿုၵ်ႉ ၼင်ႇၼႆ။
ၼၢင်းဝၼ်း ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “တီႈၵဵင်းတုင်ႁဝ်းၶႃႈၼႆႉ ဢမ်ႇလႆႈၸႂ်ႉၾႆးၾႃႉ လူင်ပွင်ၸိုင်ႈ။ ဢၼ်ၸႂ်ႉယူႇတေႃႈလဵဝ်ၼႆႉ ပဵၼ်ၾႆးၾႃႉ ၶွမ်ႊပၼီႊၶဝ်ၵူၺ်း၊ ဢမ်ႇလႆႈ 24 ၸူဝ်ႈမူင်း ၼိုင်ႈဝၼ်းလႂ်လႆႈလၢႆ ၸူဝ်ႈမူင်းၵူၺ်း၊ ၵႃႈၾႆးၾႃႉၵေႃႈ ၼိုင်ႈယူႊၼီႊလႂ် 100 ပျႃး” ဝႃႈၼႆ။
ၼႂ်းၸိုင်ႈတႆးပွတ်းဢွၵ်ႇၶူင်းၼႆႉ မိူၼ်ၼင်ႇ ၸႄႈဝဵင်းၵဵင်းတုင်၊ မိူင်းၽျၢၵ်ႈ၊ မိူင်းယွင်း၊ မိူင်းယၢင်း၊ မိူင်းၶၢၵ်ႇလႄႈ မိူင်းသၢတ်ႇ မိူင်းတူၼ် ၸိူဝ်းၼႆႉ ဢမ်ႇလႆႈၾႆးၾႃႉ 24 ၸူဝ်ႈမူင်း၊ ၼိုင်ႈဝၼ်းၼႆႉ လႆႈၾႆးၾႃႉၸွမ်းၶၢဝ်းယၢမ်း ပဵၼ်ၸူဝ်ႈမူင်းမၼ်းၵူၺ်း။ ယွၼ်ႉၼၼ် ၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ်ႁူပ်ႉလွင်ႈယၢပ်ႇၽိုတ်ႇ ၼႆယဝ်ႉ။
