တႄႇဢဝ်ႁူဝ်လိူၼ်ၵျုၼ်ႊၼႆႉမႃး သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇ ၶိူဝ်းယႂ်း ဢမ်ႇယွမ်း 11 ပွၵ်ႈ။
မိူဝ်ႈဝၼ်းတီႈ 8/6/2020 ၼၼ်ႉ သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ ၼႂ်းဝၼ်းလဵဝ် ပဵၼ်ပၢင်တိုၵ်းၵၼ် 2 ပွၵ်ႈ။ တႄႇဢဝ် ဝၼ်းတီႈ 1 လိူၼ်ၵျုၼ်ႊ တေႃႇထိုင် ဝၼ်းတီႈ 8 ၼႆႉ သွင်ၾၢႆႇပဵၼ်ပၢင်တိုၵ်းၵၼ် တင်းမူတ်းဢမ်ႇယွမ်း 11 ပွၵ်ႈယဝ်ႉ၊ မိူၼ်ၼင်ႇ ၼႂ်းၸႄႈဝဵင်းၼမ်ႉၶမ်း၊ မူႇၸေႊ၊ ၵူတ်ႉၶၢႆလႄႈ မၢၼ်ႈတူင်ႈ ၸိူဝ်းၼႆႉ – ယူႇတီႈႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းတဢၢင်း ဢွၵ်ႇဝႆႉၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 6/6/2020 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းၶၢင် KIA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၾၢႆႇၼိုင်ႈတၢင်းၼိုင်ႈ ၼႂ်းဝၼ်းလဵဝ်ၵၼ်ၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း TNLA ၵေႃႈ ပဵၼ်ပၢင်တိုၵ်းၵၼ် တၢင်းၸႄႈဝဵင်းမၢၼ်ႈတူင်ႈထႅင်ႈ ၼႆယဝ်ႉ။
လုင်းသႅင်ၶမ်းႁိူင်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “လွင်ႈသိုၵ်းမၢၼ်ႈတင်း သိုၵ်းၶၢင် ပဵၼ်ပၢင်တိုၵ်းၵၼ် တီႈမူႇၸေႊၼႆႉ ပဵၼ်ယူႇ။ ၵူၺ်းၵႃႈ မၼ်းၵႆဝဵင်းမူႇၸေႊလႄႈ လွင်ႈႁူဝ်ယွႆႈမၼ်းတႄႉ ဢမ်ႇလႆႈႁူႉ။ တင်ႈတႄႇသိုၵ်းမၢၼ်ႈ ထုၵ်ႇယိုဝ်းတီႈၵူတ်ႉၶၢႆ မိူဝ်ႈႁၢင်လိူၼ်မေႊပူၼ်ႉမႃးၼၼ်ႉသေ ပၢင်တိုၵ်းၼႆႉ ၶႂ်ႈဝႃႈပဵၼ်ယူႇၵူႈဝၼ်းယူႇ တၢင်းပွတ်းႁွင်ႇၼႆႉ ဢမ်ႇတီႈၼိုင်ႈၵေႃႈတီႈၼိုင်ႈ” ဝႃႈၼႆ။
မိူဝ်ႈဝၼ်းတီႈ 29/5/2020 ၼၼ်ႉ တပ်ႉသိုၵ်းတဢၢင်း TNLA ပိုတ်းယိုဝ်းရူတ်ႉၵႃးသိုၵ်းမၢၼ်ႈ ၼႂ်းၵႄႈ မၢၼ်ႈလွႆ တင်း မူႇၸေႊ ၸႄႈဝဵင်းၵူတ်ႇၶၢႆ ၼိူဝ်သဵၼ်ႈတၢင်းလူင် ၵူတ်ႇၶၢႆ – မူႇၸေႊ ဝႃႈၼႆ။
ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဢွၵ်ႇဝႃႈ ၵိုတ်းတိုၵ်း တႄႇဢဝ်ဝၼ်းတီႈ 10 လိူၼ်မေႊ 2020 မႃး ၶၢဝ်းတၢင်း 3 လိူၼ်။ တၢင်းၾၢႆႇၸုမ်းဢူၺ်းလီပွတ်းႁွင်ႇ 3 ၸုမ်း တပ်ႉသိုၵ်းတဢၢင်း TNLA ၊ ၵဝ်ႈၵၢင်ႉ MNDAA လႄႈ ရၶႅင်ႇ (AA) ၵေႃႈႁူမ်ႈၵၼ်သေ ပိုၼ်ၽၢဝ်ႇၵိုတ်းတိုၵ်း တႃႇၶၢဝ်းတၢင်း 3 လိူၼ် တႄႇဢဝ် ဝၼ်းတီႈ 1 လိူၼ်ၵျုၼ်ႊ ထိုင် 31 လိူၼ် ဢေႃႊၵတ်ႊသ် 2020 ဝႃႈၼႆသေတႃႉ ၵူၺ်းၵႃႈ တိုၵ်ႉသိုပ်ႇပဵၼ်ပၢင်တိုၵ်းၵၼ်ယူႇ ၶိူဝ်းယႂ်း ၼႂ်းၸိုင်ႈတႆးပွတ်းႁွင်ႇ။
