ႁူင်းႁဵၼ်းထမ်မ ၵျွင်းၵၢင်မိူင်း ၸတ်းႁဵတ်းပၢင်လူင်းလိုဝ်ႈပၢင်သွၼ်လႄႈ တွၼ်ႈသူး လုၵ်ႈႁဵၼ်းၸိူဝ်းၵတ်ႉၶႅၼ်ႇဢွင်ႇ ပူၼ်ႉၸၼ်ႉ ဢၼ်လႆႈၸတ်းႁဵတ်းမႃး ၶၢဝ်းတၢင်းသၢမ်လိူၼ်ပၢႆ တီႈဝဵင်းမိူင်းသူႈ ၸိုင်ႈတႆးပွတ်းၸၢၼ်း။

ဝၼ်းတီႈ 28/01/2018 ၶၢဝ်းယၢမ်းၵၢင်ၼႂ် မွၵ်ႈ 9 မူင်း ယူႇတီႈၵေႃႉပဵၼ်ႁူဝ်ပဝ်ႈသင်ၶ ႁူင်းႁဵၼ်းထမ်မ ဝဵင်းမိူင်းသူႈ သြႃႇၸဝ်ႈသုၸႃႇလိင်ႇ ဢွၼ်ႁူဝ်ၸတ်းႁဵတ်း ပၢင်လူင်းလိုဝ်ႈ ပၢင်သွၼ်ထမ်မလႄႈ တွၼ်ႈသူးလုၵ်ႈႁဵၼ်း ဢွင်ႇ ပူၼ်ႉၸၼ်ႉ ဢၼ်ၸတ်းႁဵတ်းမႃး တင်ႈတႄႇ ဝၼ်းတီႈ 15/10/2017 တေႃႇ 28/01/2018 ၼႂ်းၶၢဝ်းတၢင်း သၢမ် လိူၼ်ပၢႆ။ ၽႃသႃဢၼ်ပူင်သွၼ်ပၼ်တႄႉ ပိုၼ်းၽြႃးပဵၼ်ၸဝ်ႈလႄႈ လွင်ႈလၢတ်ႈတၢင်းၸႃ၊ ပၢႆးႁႂ်ႈမေႃႁၵ်ႉသႃ သိင်ႇဝႅတ်ႉလွမ်ႉ ၸဵမ်ၸိူဝ်းၼႆႉ မီးလုၵ်ႈႁဵၼ်း ၶဝ်ႈႁဵၼ်း 400 ပၢႆ ဢၼ်ၶဝ်ႈတွပ်ႇလိၵ်ႈ မီး 68 ၵေႃႉ ဢၼ်ဢွင်ႇ ပူၼ်ႉၸၼ်ႉ မီး 52 ၵေႃႉ၊ ၶူးပူင်သွၼ်မီး 3 ၸဝ်ႈ ၸဝ်ႈၶူးသဝၼ လႄႈၸဝ်ႈၶူးၸၼ်ႇတႃႇဝရ ၸဝ်ႈၶူး ဝီႉရႃႇသၵ်ႉၵ ၶဝ်ၸဝ်ႈၸိူဝ်းၼႆႉ ပူင်သွၼ်ပၼ် ဝႃႈၼႆ။

ၼႂ်းဝၼ်းလိုဝ်ႈပၢင်သွၼ်ၼႆႉ မီးသင်ၶၸဝ်ႈလႄႈပေႃႈမႄႈ ဢိၵ်ႇလုၵ်ႈႁဵၼ်းၶိုၼ်ႈႁွတ်ႈမီးယူႇ ပၢၵ်ႇပၢႆ။

သြႃႇၸဝ်ႈဢူးၵႃႇဝိင်ႇတႃႉ ၽူႈၵွၼ်းဝတ်ႉၵၢင်မိူင်း မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵႂႃႇဝႃႈ “ ၵူၼ်းႁဝ်းလူဝ်ႇမေႃ ဝူၼ်ႉလီ လီသေ ၸင်ႇတႅပ်းတတ်း လွင်ႈၵိူဝ်းယမ် လွင်ႈၽႃႇသႃႇၵေႃႈ ႁႂ်ႈမေႃလဵပ်ႈႁဵၼ်းလီလီသေ ၼပ်ႉထိုဝ်ၵိူဝ်းယမ်ၵႂႃႇ တီႈ ဢၼ်ၵိုင်ႇလီၼပ်ႉယမ် ၸင်ႇၼပ်ႉယမ် တီႈဢမ်ႇၵိုင်ႇလီၼပ်ႉယမ်ၵေႃႈ ယႃႇပေၼပ်ႉယမ် တႃႇတေပဵၼ်ၽူႈဢွၼ် ႁူဝ်မိူဝ်းၼႃႈၼၼ်ႉ မိူဝ်ႈၼႆႉ ၵိုင်ႇလီမေႃလဵပ်ႈႁဵၼ်းၼမ်ၼမ်မီးပိုၼ်ႉႁူႉၼမ်ၼမ်” ဝႃႈၼႆ။

ယိင်းၶမ်းၶိၼ်ႇ ၵေႃႉၶဝ်ႈႁူမ်ႈပၢင်သွၼ် လၢတ်ႈဝႃႈ “ ငိၼ်းၸူမ်းတႄႉတႄႉ တီႈလႆႈမီးပၢင်သွၼ်လိၵ်ႈထမ်မၸိူဝ်းၼႆႉ ပီ ၼႃႈမႃးၵေႃႈ ၶႂ်ႈႁႂ်ႈမီးထႅင်ႈ ယွၼ်ႉဝႃႈ ႁဵတ်းႁႂ်ႈလုၵ်ႈဢွၼ်ႇၼုမ်ႇႁဝ်း ႁူႉတီႈပွင်ႇလွင်ႈယဵၼ်ႇငႄႈသေ မေႃၼပ်ႉယမ်မႃး တွၼ်ႈတႃႇလုၵ်ႈဢွၼ်ႇႁဝ်းၵေႃႈ တေဢမ်ႇလိူင်းသေဢမ်ႇၵႃး မေႃႁူႉၸၵ်း လွင်ႈၵိူဝ်းယမ်မီးမဵတ်ႉတႃႇ ဢိၵ်ႇ ႁၵ်ႉသႃပႃးသိင်ႇဝႅတ်ႉလွမ်ႉ ၸိူဝ်းၼႆႉထႅင်ႈၵွၼ်ႇ ႁဝ်းၶႃႈယိၼ်းၸူမ်းတႄႉတႄႉ” ဝႃႈၼႆ။

ဢၼ်လႆႈပိုတ်ႇပၢင်သွၼ်ႁူင်းႁဵၼ်းထမ်မၼႆႉ ယိူင်းဢၢၼ်းယွၼ်ႉၶႂ်ႈႁႂ်ႈလုၵ်ႈဢွၼ်ႇႁဝ်း မီးလွင်ႈယဵၼ်ႇငႄႈ ႁူႉၸၵ်း ၽြႃးတြႃးသင်ၶ တႃႇတေပဵၼ်ၽူႈဢွၼ်ႁူဝ်ႁဝ်းမိူဝ်းၼႃႈၼႆႉ လုၵ်ႈဢွၼ်ႇႁဝ်း လူဝ်ႇလႆႈမီးသတိ ဝိရိယ ၵိုၵ်းတူဝ်/ႁႂ်ႈၸႂ် ၼိမ် မီးသမ်မႃထိ ၵွပ်ႈၼၼ် ႁူင်းႁဵၼ်းထမ်မၼႆႉ လမ်ႇလွင်ႈတႄႉတႄႉ ဝႃႈၼႆ။

ပၢင်သွၼ် ႁူင်းႁဵၼ်းထမ်မ ဝဵင်းမိူင်းသူႈၼႆႉ လႆႈပိုတ်ႇၽုၺ်ႇမႃး မိူဝ်ႈပီ 2016 ပီ 2017 တႄႉ ယွၼ်ႉမီးပၢင်ပွႆး ပီၵွၼ်းငိုၼ်းလႄႈ ဢမ်ႇလႆႈၸတ်းႁဵတ်း ပီၼႆႉ ၸင်ႇၶိုၼ်းလႆႈမႃးပိုတ်ႇၶိုၼ်း ၼင်ႇႁိုဝ် ပၢင်သွၼ်ႁူင်းႁဵၼ်းထမ်မ ပေႃးတေၵႂၢင်ႈၶႂၢင် ၵႂႃႇၼၼ်ႉတႄႉ ပီၼႃႈမႃး တေၶတ်းၸႂ်သေ သိုပ်ႇႁဵတ်းၵႂႃႇထႅင်ႈယူႇ ဝႃႈၼႆ။

ၶႅပ်းႁၢင်ႈ – တႆးႁုၼ်ႈမႂ်ႇ