ၸဝ်ႈၶူးဝႃးတိုၼ်းတႆး ဢွၼ်ႁူဝ်ၼမ်းၼႃႈ လုမ်းပုတ်ႉထသႃႇသၼႃႇ မိူင်းမၢဝ်းလႄႈ လုၵ်ႈၼွင်ႉတပေး ဢိၵ်ႇ တၵ်ႉၵႃႇလူႇတၢၼ်းၸွႆႈထႅမ် Mask တူမ်းသူပ်း တီႈဝဵင်းမူႇၸေႊလႄႈၼမ်ႉၶမ်း ႁူမ်ႈ 5 မိုၼ်ႇဢၼ်ပၢႆ။

ဝၼ်းတီႈ 7/6/2020 ယၢမ်းၵၢင်ၼႂ် Dr. ၸဝ်ႈၶူးဝႃးတိုၼ်းတႆး ဢွၼ်ႁူဝ်ၼမ်းၼႃႈ ၽူႈပွင်ၵၢၼ်လုမ်း ပုတ်ႉထသႃႇသၼႃႇ မိူင်းမၢဝ်းသေ လူႇတၢၼ်း Mask တီႈမူႇၸုမ်းသင်ႇၶၼႃႇယၵ တူင်ႇဝဵင်းမူႇၸေႊလႄႈတူင်ႇဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။

ယွၼ်ႉတၢင်းပဵၼ် COVID-19 လႄႈ ၽၵ်းတူမိူင်းလူင် တီႈၸေႊၵဝ်ႇ ပႆႇပိုတ်ႇၽုၺ်ႇၶိုၼ်း ၊ ၽူႈတၢင်တူဝ် လုမ်းပုတ်ႉထသႃႇသၼႃႇမိူင်းမၢဝ်း၊ မူႇၸုမ်းသင်ႇၶၼႃႇယၵ တူင်ႇဝဵင်းမူႇၸေႊ၊ တူင်ႇဝဵင်းၼမ်ႉၶမ်း ၸင်ႇႁူပ်ႉထူပ်းၵၼ်တီႈလႅၼ်လိၼ် ၽၵ်းတူမိူင်းဝဵင်းၸေႊၵဝ်ႇသေ လူႇမွပ်ႈပၼ်ၵၼ်တီႈၼၼ်ႈ ။

ၾၢႆႇတၢင်းမိူင်းမၢဝ်း မီးႁူဝ်ပဝ်ႈလုမ်းပုတ်ႉထ သႃႇသၼႃႇ ဢိူင်ႇတႂ်ႈၶူင်း Dr. ၸဝ်ႈၶူးဝႃးတိုၼ်းတႆး ပႃးၸဵမ်ၵႅမ်ႁူဝ်ပဝ်ႈ လုမ်းၽႃႇသႃႇ မိူင်းမၢဝ်း ၸၢႆးဢၢႆႈမူၼ်း၊ ၵႅမ်ႁူဝ်ပဝ်ႈ လုမ်းပုတ်ႉသႃႇသၼႃႇမိူင်းမၢဝ်း ၸဝ်ႈသြႃႇမုၼိၼ်ႇတ ၸေႊၵဝ်ႇ၊ ၸဝ်ႈသြႃႇဢႃႇတိတ်ႉ ဝတ်ႉတိုင်းၶမ်းလူင်၊ ၸဝ်ႈသြႃႇဝိမလ ဝတ်ႉၼွင်မူဝ်တူင်ႊ၊ ၸၢႆးမၢဝ်းၸႅတ်ႈလႄႈႁူမ်ႈပႃးၽူႈပွင်ၵၢၼ်လၢႆလၢႆၸဝ်ႈ။

တၢင်တူဝ်တၢင်းၾၢႆႇမူႇၸေႊသမ်ႉ မီးၽူႈၼမ်းၼႂ်းမူႇၸုမ်းသင်ႇၶၼႃႇယၵ တူင်ႇဝဵင်းမူႇၸေႊ ၸဝ်ႈၶူးပၺႃႇၽေႃးၵလႄႈၸဝ်ႈသြႃႇသုၶမ်း၊ ၸဝ်ႈသြႃႇဝိသုတ်ႉထလႄႈ ႁူမ်ႈလူၺ်ႈ ၵူၼ်းလုမ်းၽႃႇသႃႇလႄႈ လဝၵ တႄႇၵႂႃႇၸိူဝ်းၼႆႉ။

ၽူႈတၢင်တူဝ်တၢင်းၼမ်ႉၶမ်းသမ်ႉ မီးႁူဝ်ပဝ်ႈလူင်မုၵ်ႉၸုမ်းသင်ႇၶၼႃႇယၵ တူင်ႇဝဵင်းၼမ်ႉၶမ်း ၸဝ်ႈတူၼ်ၶူးလူင် Dr. ဝိၼယႃႇၸႃႇရ ဝတ်ႉမူဝ်ၶမ်း၊ ႁူဝ်ပဝ်ႈသင်ႇၶထုင်ႉမၢဝ်း ၸဝ်ႈၶူးထမ်ႇမသီႇရိ ဝတ်ႉမူဝ်ၶမ်း၊ ႁူမ်ႈလူၺ်ႈၸဝ်ႈၶူးၶဝ် လၢႆလၢႆၸဝ်ႈ ဢိၵ်ႇတင်း ႁူဝ်ၼႃႈမူႇၸုမ်းတူင်ႇဝူင်းၵူၼ်းလၢႆလၢႆၸုမ်း ၸိူဝ်းၼႆႉ။

ၼႂ်းပၢင် ယိုၼ်ႈတွၼ်ႈၶူဝ်းၶွင်ၵၼ်ၼၼ်ႉ Dr. ၸဝ်ႈၶူးဝႃးတိုၼ်းတႆး လၢတ်ႈဝႃႈ ” မိူဝ်ႈၼႆႉ ၶဝ်ႈပဵၼ် ဝၼ်းလီဝၼ်းငၢမ်း လုမ်းပုတ်ႉထသႃႇသၼႃႇႁဝ်း မိူင်းမၢဝ်း မီးၼမ်ႉၸႂ် ၼပ်ႉယမ်၊ ႁၵ်ႉႁွမ်ၵၼ်တင်း ၸဝ်ႈပီႈၸဝ်ႈၼွင်ႉၵူၼ်းမိူင်းႁဝ်းၶဝ် သေ လႆႈမႃးလူႇတွၼ်ႈဢၼ်ထွပ်ႈသူပ်းႁႄႉၾၢင်ႉမႅင်းတၢင်းပဵၼ်(51,000)ဢၼ် ။ ပဵၵ်ႉသမ်ႉႁဝ်းယူႇႁၢင်ႇၵၼ် သွင်မိူင်းၵေႃႈ မိူၼ်မိူင်းလဵဝ်ၵၼ်၊ ၶဝ်ႈဢွၵ်ႇၵၼ်၊ ၸွႆႈထႅမ်ၵၼ်၊ ၼမ်ႉၸႂ်ႁဝ်းၵေႃႈမိူၼ်ၵူၼ်းႁိူၼ်းလဵဝ်တႃႇသေႇ။ ၵမ်းၼႆႉထူပ်းၺႃးၽေးၶဵၼ်တၢင်းပဵၼ်မႃးၵေႃႈ ပႅင်ႈၼင်ႇၸွႆႈထႅမ်ၵၼ်လႆႈ ႁဝ်းတေလႆႈၸွႆႈထႅမ်ၵၼ်ၵႂႃႇ။ ယဝ်ႉၵေႃႈ ၶွပ်ႈၸႂ်ထိုင်ၸဝ်ႈသြႃႇသင်ႇၶႁဝ်းၶဝ်လႄႈ တၵ်ႉၵႃႇသထႃးႁဝ်းၶဝ်တီႈမူႇၸေႊၼမ်ႉၶမ်းတင်းသဵင်ႈ ဢၼ်လႆႈႁၵ်ႉႁွမ်၊ တူၺ်းထိုင်၊ ၸွႆႈထႅမ်ၾၢႆႇၵၢၼ်သႃႇသၼႃႇ တီႈမိူင်းမၢဝ်းႁဝ်းမႃးတႃႇသေႇ။ ယွၼ်းသူးႁႂ်ႈႁဝ်းပီႈႁဝ်းၼွင်ႉၵၢင်းၵႆ တၢင်းပဵၼ် လွတ်ႈသေၽေးၶဵၼ်ႁၢႆႉၸႃႉၵႂႃႇႁိုင်ယၢဝ်း၊ ႁႂ်ႈႁဝ်းႁႃးလႆႈႁၵ်ႉႁွမ်ၶွတ်ႇၾၼ်ႈၵၼ်ၵႂႃႇၵူႈၶၢဝ်းမိူဝ်းၼႃႈ သေၵမ်းဢေႃႈ” ၼႆယဝ်ႉ။

ၸဝ်ႈသြႃႇသုၶမ်းၵေႃႈတၢင်တူဝ်သင်ႇၶၸဝ်ႈလႄႈ ၵူၼ်းမိူင်းမူႇၸေႊသေလၢတ်ႈဝႃႈ- “မိူဝ်ႈၼႆႉ 7.6.2020 ၵၢင်ၼႂ် Dr. ၸဝ်ႈၶူးဝႃးတိုၼ်းတႆး ဢွၼ်ႁူဝ်ၼမ်းၼႃႈ လုမ်းပုတ်ႉထသႃႇသၼႃႇ မိူင်းမၢဝ်း ႁၼ်ထိုင် တႃႇတေပဵၼ်လွင်ႈၵႅတ်ႇၶႄ ႁႄႉတၢင်းပဵၼ်ၼႆႉလႄႈ လႆႈမႃးလူႇတၢၼ်းၸွႆႈထႅမ် ဢၼ်တွမ်ႈသူပ်း (51,000)ဢၼ် တွၼ်ႈတႃႇသင်ႇၶႃႇလႄႈ ပီႈၼွင်ႉမူႇၸေႊၼမ်ႉၶမ်းၼႆႉ ၸိူဝ်းႁဝ်းယူႇတၢင်းၽၢၵ်ႇၼႆႉ မီးတၢင်းၸူမ်းသိူဝ်းၶွပ်ႈၸႂ်တႄႉတႄႉ။ ႁဝ်းၼႆႉ ပဵၵ်ႉသမ်ႉဝႃႈ ၼမ်ႉလိၼ်ႁိၼ်ၽႃၶႅၼ်ႈၵၼ်ၵေႃႈ တိုၼ်းၸွႆႈထႅမ်တူၺ်းထိုင်ၵၼ်မႃးတႃႇသေႇ။ တၢင်းပဵၼ် (COVID- 19) မၼ်းၵပ်းၵၢႆႇၵၼ် တင်းၵမ်ႇၽႃႇလႄႈ ၸိူဝ်းယူႇၵႂ်ႈၵိၼ်ၸမ်ၵၼ် ထုၵ်ႇလႆႈၾၢင်ႉတူဝ်ၵၼ်၊ ၸွႆႈထႅမ်ၵၼ်ယဝ်ႉ။ ယွၼ်းသူး ႁႂ်ႈၸဵဝ်းလွတ်ႈပူၼ်ႉၽေးၶဵၼ်တၢင်းပဵၼ် ( COVID- 19) ရေႃးၵၼ်ႇတရၵၢပ်ႈၼႆႉၶၼ်ၶၼ်ဝႆးဝႆးၵူႈမၢၼ်ႈၵူႈမိူင်း သေၵမ်းတီႈၶႃႈ ” ၼႆယဝ်ႉ။

ၸဝ်ႈတူၼ်ၶူးလူင် Dr. ဝိၼယႃႇၸႃႇရ ဝတ်ႉမူဝ်ၶမ်းၵေႃႈလၢတ်ႈဝႃႈ ” ၸူမ်းသိူဝ်းၶွပ်ႈၸႂ် ဢၼ် Dr. ၸဝ်ႈၶူးဝႃးတိုၼ်းတႆး ဢွၼ်ႁူဝ်ၼမ်းၼႃႈ လုမ်းပုတ်ႉထသႃႇသၼႃႇ လႆႈမႃးလူႇတၢၼ်းၸွႆႈထႅမ် (Mask) ဢၼ်ထွပ်ႈသူပ်း (51,000)ဢၼ်ၼႆႉ တႄႉတႄႉ။ တၢင်းပဵၼ်ရေႃးၵႃႇလူင်ၼႆႉ မၼ်းလၢမ်းၸွတ်ႇဝႆႉတင်းၵမ်ႇၽႃႇသေယႃႉၵဝ်းၸူဝ်ႈၵၢၼ်ႁဵၼ်း၊ ၵၢၼ်မၢၵ်ႈမီး ၵူႈ လွင်ႈလႄႈ ဢမ်ႇၾၢင်ႉမၼ်းၵေႃႈဢမ်ႇလႆႈ၊ ဢမ်ႇၵူဝ်မၼ်းၵေႃႈဢမ်ႇလႆႈ။ ၵွပ်ႈၼႆတေလႆႈၾၢင်ႉ တူဝ်ၽႂ်တူဝ်မၼ်းဢမ်ႇၵႃး တေလႆႈၸွမ်းၾိင်ႈၸွမ်းပိူင် ဢၼ်ၽူႈမီးပုၼ်ႈၽွၼ်းၶဝ်ပူင်တမ်းမႃးၼၼ်ႉသေယူႇသဝ်းၵႂႃႇ။ ယွၼ်းသူးႁႂ်ႈ Dr. ၸဝ်ႈၶူးဝႃးတိုၼ်းတႆး လႄႈလုမ်းပုတ်ႉထသႃႇသၼႃႇ မိူင်းမၢဝ်း ႁိူဝ်ႈႁိူင်းပိူင်းသႂ် ၊ ယွၼ်းသူးႁႂ်ႈ ၽေးၶဵၼ်တၢင်းပဵၼ်လူင်ၼႆႉ ၸဵဝ်းႁၢႆဝၢႆးၵႂႃႇၼႂ်းလူၵ်ႈၵမ်ႇၽႃႇၼႆႉသေၵမ်း” ၼႆယဝ်ႉ။

ဝၢႆးပၢင်ယိုၼ်ႈဢၢပ်ႈၶူဝ်းၶွင်ၵၼ်ယဝ်ႉ ၼင်ႇႁိုဝ်ၽေးၶဵၼ်တေၸဵဝ်းႁၢႆၵႂႃႇ သႃႇသၼႃႇတေလႆႈမၼ်ႈၵိုမ်းႁိူဝ်ႈႁိူင်းၼၼ်ႉ သင်ႇၶၸဝ်ႈသွင်မိူင်း ႁူမ်ႈႁေႃးၽဝတုလႄႈပုတ်ႉထသႃႊသၼမ်ႊၵႂႃႇတီႈလႅၼ်လိၼ်သွင်မိူင်းၼၼ်ႉ- ၼႆယဝ်ႉ။