ၸုမ်းတုၺ်ႇ ဢၼ်ပဵၼ်ၸုမ်းတေဢဝ်ပုၼ်ႈၽွၼ်း ၵဵပ်းၽဵဝ်ႈယုၵ်းယၵ်း ၼႂ်းၸႄႈဝဵင်းမူႇၸေႊၼၼ်ႉ လူင်းပိုၼ်ႉတီႈ ႁူပ်ႉထူပ်းၵူၼ်းမိူင်း သပ်းလႅင်းၼႄ ၶၵ်ႉၵၢၼ်ၵဵပ်းယုၵ်းယၵ်းလႄႈ ၵႃႈၸႂ်ႉၸၢႆႇ။

ဝၼ်းတီႈ 7/6/2020  ၸုမ်းတုၺ်ႇ လူင်းပိုၼ်ႉတီႈႁူပ်ႉထူပ်းၵူၼ်းမိူင်း ပွၵ်ႉၸၢၼ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ သပ်းလႅင်းၼႄ ၵူၼ်းပိုၼ်ႉတီႈ လွင်ႈငိုၼ်းယုၵ်းယၵ်း တေလႆႈၵဵပ်းၸိူင်ႉႁိုဝ်/ သႂ်ႇၵၼ်ၸိူင်ႉႁိုဝ်၊ လွင်ႈလွၵ်းလၢႆး ၵဵပ်းၽဵဝ်ႈယုၵ်းယၵ်း ၸႃႉၵႂႃႇၸိူဝ်းၼႆႉ ၼင်ႇႁိုဝ်ၵူၼ်းပိုၼ်ႉတီႈ ပေႃးတေပွင်ႇၸႂ် လႅင်းၸႂ်ၵၼ်ၵႂႃႇ ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႇႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၸုမ်းတုၺ်ႇၼႆႉ တေဢဝ်ပုၼ်ႈၽွၼ်းသေ ႁဵတ်းသၢင်ႈလွင်ႈမူတ်းသႂ် ၵဵပ်းယုၵ်းယၵ်း ၼႂ်းၸႄႈဝဵင်းမူႇၸေႊႁဝ်းၶႃႈၵႂႃႇၶႃႈယဝ်ႉ။ မိူဝ်ႈဝႃးတႄႉ မႃးသပ်းလႅင်းၼႄၵူၼ်းပွၵ်ႉၸၢၼ်းၵႂႃႇ လွင်ႈၵႃႈၶၼ်ငိုၼ်း တေလႆႈသႂ်ႇၵၼ်ၸိူင်ႉႁိုဝ်၊ ယဝ်ႉၵေႃႈ လွင်ႈလွၵ်းလၢႆးၵဵပ်းယုၵ်းယၵ်းၼၼ်ႉ သင်ဝႃႈ လူင်းၵဵပ်းလႄႈ ဢမ်ႇမူတ်းသႂ်ၸိုင် တေပႆႇဢဝ်ငိုၼ်း ၸိူဝ်းၼႆႉ။ မိူဝ်ႈသိုၼ်းၼၼ်ႉသမ်ႉ ၶဝ်လူင်းပိုၼ်ႉတီႈ ႁူပ်ႉထူပ်းၵူၼ်းမိူင်းတၢင်းပွၵ်ႉၵၢတ်ႇ၊ ၵွင်းၼွင်၊ ပွၵ်ႉႁွင်ႇလႄႈ ပွၵ်ႉၼိူဝ် ၸိူဝ်းၼႆႉ။

ယူႇတီႈၸုမ်းတုၺ်ႇၼႆႉသေ တေဢဝ်ပုၼ်ႈၽွၼ်းလူင်းၵဵပ်းယုၵ်းယၵ်း ၼႂ်းၸႄႈဝဵင်းမူႇၸေႊၼႆႉၵႂႃႇ တင်ႈတႄႇဝၼ်း 15/6/2020 ဝႃႈၼႆ။

မိူၼ်ၼင်ႇ လွင်ႈၵဵပ်းငိုၼ်းၵႃႈယုၵ်းယၵ်း တေႃႇလိူၼ်သမ်ႉ ပေႃးပဵၼ်ႁိူၼ်းၸၼ်ႉၼိုင်ႈတေတူၵ်း 3,000 ပျႃး၊ သွင်ၸၼ်ႉ 4,000 ပျႃး၊ ႁွင်ႈၶၢတ်ႈ ၼိုင်ႈႁွင်ႈ1,500 ပျႃး။ ႁူင်းႁႅမ်း 80,000 ပျႃး။ ႁူင်းသဝ်းဢၼ်လူင်(တည်းခိုခန်းကြီး) 60,000 ပျႃး၊ ႁူင်းသဝ်းဢၼ်ၵၢင် 40,000 ပျႃး၊ ႁူင်းသဝ်းဢၼ်ဢွၼ်ႇ 20,000 ပျႃး။ ႁၢၼ်ႉၼမ်ႉၼဵင်ႈၸဵမ်း ၶဝ်ႈသွႆး ႁၢၼ်ႉယႂ်ႇ 20,000 ပျႃး၊ ႁၢၼ်ႉၵၢင် 10,000 ပျႃး၊ ဢွၼ်ႇ 8,000 ပျႃး ၸိူဝ်းၼႆႉ။

လိူဝ်သေၼၼ်ႉ ႁၢၼ်ႉၶၢႆၶဝ်ႈၽၵ်းႁၢၼ်ႉယႂ်ႇလူင် 20,000 ပျႃး၊ ၵၢင် 10,000 ပျႃး၊ ဢွၼ်ႇ 8,000 ပျႃး။ ႁူင်းယႃသုၼ်ႇတူဝ် 50,000 ပျႃး၊ ႁွင်ႈယႃ သုၼ်ႇတူဝ် (ဆေးခန်း) 10,000 ပျႃး။ ႁၢၼ်ႉၶၢႆၶူဝ်းၵုၼ်ႇ 15,000 ပျႃး၊ ၵၢင် 10,000 ပျႃး၊ ဢွၼ်ႇ 8,000 ပျႃး။ ၸိူဝ်းႁဵတ်းဝႆႉ ႁွင်ႈၶၢတ်ႈ မိူၼ်ၼင်ႇႁွင်ႈၾၢႆႈႁွင်ႈဢၢပ်ႇၼမ်ႉ ၸိူဝ်းၼႆႉ ဢၼ်ယႂ်ႇ 10,000 ပျႃး၊ ၵၢင် 8,000 ပျႃးလႄႈ ဢွၵ်ႇ 5,000 ပျႃး။ ႁၢၼ်ႉထၢႆႇVDO ၶႅပ်းႁၢင်ႈၸိူဝ်းၼႆႉ ႁၢၼ်ႉယႂ်ႇ 10,000 ပျႃး၊ ၵၢင် 8,000 ပျႃး၊ ဢွၼ်ႇ 5,000 ပျႃး။

ႁူင်းႁဵၼ်းသုၼ်ႇတူဝ် 50,000 ပျႃး၊ ႁူင်းသဝ်း လုၵ်ႈႁဵၼ်း (ဘော်ဒါဆောင်) 30,000 ပျႃး၊ ႁၢၼ်ႉမႄးရူတ်ႉၵႃး ႁၢၼ်ႉယႂ်ႇ 15,000 ပျႃး၊ ၵၢင်/ ဢွၼ်ႇ 10,000 ပျႃး၊ လႅင်းၵႃးလူင်(ဢွင်ႈတီႈပႂ်ႉႁပ်ႉၵူၼ်း) 15,000 ပျႃး၊ ဢွၼ်ႇ 10,000 ပျႃး။ ႁၢၼ်ႉၶၢႆၼမ်ႉ/ ႁဵတ်းၼမ်ႉၵိၼ် 20,000 ပျႃး၊ ႁၢၼ်ႉၶၢႆၼမ်ႉမၼ်းရူတ်ႉၵႃး 20,000 ပျႃး။ ႁွင်ႈၵၢၼ်ၵူႈလွင်ႈလွင်ႈ(အထွေထွေလုပ်ငန်း) ဢၼ်ၵၢင် 10,000 ပျႃး၊ ဢွၼ်ႇ 8000 ပျႃး။ ပေႃးပဵၼ်ပၢင်ၶႅၵ်ႇသမ်ႉ တေႃႇပၢင် 80,000 ပျႃး ၸိူဝ်းၼႆႉ ၼႆယဝ်ႉ။

တီႈမူႇၸေႊၼႆႉ မိူဝ်ႈဢွၼ်တၢင်းမီးၶွမ်ႊပၼီႊ ဢွင်ႇၵရုၼႃႇ ႁပ်ႉပုၼ်ႈၽွၼ်းၵဵပ်းယုၵ်းယၵ်း။ ၵူၺ်းၵႃႈ ဢမ်ႇၵဵပ်းယုၵ်းယၵ်းပၼ်တႃႇသေႇသေဢမ်ႇၵႃး ပႅတ်ႈယုၵ်းယၵ်းတီႈႁူဝ်ဝဵင်းလႄႈႁဵတ်းႁႂ်ႈ တုမ်ႉတိူဝ်ႉပၢႆးယူႇလီၵူၼ်းမိူင်း။ ၵွပ်ႈၼႆလႄႈ ၵူၼ်းမိူင်းတုၵ်းယွၼ်းႁႂ်ႈယုၵ်ႉလိူၵ်ႈထွႆထွၼ်ပၼ် လႆႈပီပၢႆယဝ်ႉ။ ၼႂ်းၵႄႈၼႆႉ မီးၾၢႆႇလိူမ်ႈလႆႇ မႃးၽဵဝ်ႈပၼ်ယုၵ်းယၵ်းၶိုၼ်းသေ ယၢမ်းလဵဝ်ၸင်ႇတေမီး ၶွမ်ႊပၼီႊတုၺ်ႇ  Twins Co., Ltd မႃးႁပ်ႉ ပုၼ်ႈၽွၼ်းၶိုၼ်း။