ၵူၼ်းၼုမ်ႇၵေႃတႆး လူင်းပိုၼ်ႉတီႈႁူပ်ႉထူပ်းၵူၼ်းမိူင်း ဢိူင်ႇၼမ်ႉပွင်ႈ တင်း ၼွင်လႅင်(လွႆမေႃႇ)သေ သပ်းလႅင်း ၼႄလွင်ႈၵေႃတႆး၊ လွင်ႈၵူၼ်းမိူင်းလီ၊ လွင်ႈသုၼ်ႇလႆႈသုၼ်ႇပဵၼ်ၵူၼ်းလႄႈ လွင်ႈတီႇမူဝ်ႇၶရေႇသီႇ ၵူၼ်းမိူင်းၶဝ်ႈ ႁူမ်ႈထွမ်ႇငိၼ်း ႁိမ်း 200 ၵေႃႉ ဝႃႈၼႆ။
ဝၼ်းတီႈ 31/01/2018 ယၢမ်းၵၢင်ၼႂ် 10 မူင်းထိုင် 3:30 မူင်း ဝၢႆးဝၼ်း ၵူၼ်းၼုမ်ႇတႆး ဢိူင်ႇၼမ်ႉပွင်ႈတင်း ၼွင် လႅင် ဢၼ်ၵႂႃႇ ႁဵၼ်းတီႈႁူင်းႁဵၼ်းၵေႃတႆးသေ ပွၵ်ႈမႃးၼၼ်ႉ ႁူမ်ႈႁႅင်းၵၼ်သေ လူင်းႁူပ်ႉထူပ်းၵူၼ်းမိူင်း တီႈဝတ်ႉဝိႁၢရ်ၼမ်ႉပွင်ႈ ဢိူင်ႇၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ တႃႇတေ ပဵၼ်မႃးပၢင်ႁူပ်ႉထူပ်းၼႆႉ ယူႇတီႈပေႃႈမႄႈလုၵ်ႈႁဵၼ်း၊ ၵူၼ်းၼုမ်ႇၼမ်ႉပွင်ႈတင်း ၵေႃလိၵ်ႈလၢႆး လႄႈ ၾိင်ႈငႄႈတႆး သၢၼ်မိုဝ်းၵၼ်သေ ဢွၼ်ၸတ်းႁဵတ်း ဝႃႈၼႆ။
ၸၢႆးလႃႉထူၺ်း ဢိူင်ႇၼမ်ႉပွင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ပဵၼ်ၵူၼ်းၼုမ်ႇတႆးႁဝ်း ၼႂ်းဢိူင်ႇၼမ်ႉပွင်ႈ တင်းၼွင်လႅင် ႁူမ်ႈၵၼ်သေ လူင်းႁူပ်ႉထူပ်းၵူၼ်းမိူင်း သပ်းလႅင်းၼႄ လွင်ႈဢၼ်ၶဝ်ၵႂႃႇႁဵၼ်းယဝ်ႉမႃးတီႈ ႁူင်းႁဵၼ်းၸိူဝ်ႉၸၢတ်ႈတႆး တီႈၵေႃတႆးသေ လၢတ်ႈလွင်ႈၵေႃတႆးပဵၼ်သင်၊ လၵ်းၼမ်း ၵေႃတႆး၊ တႆးသိုပ်ႇပဵၼ်တႆးလႄႈ ၵၢၼ်ပဵၼ်ၵူၼ်းမိူင်းလီ။ ယဝ်ႉၵေႃႈ လၢတ်ႈၼႄ လွၵ်းလၢႆးႁဵတ်းၾုၼ်ႇသၽႃဝတႃႇၸႂ်ႉၼႂ်းႁႆႈၼႂ်းၼႃး ၸဵမ်ၸိူဝ်းၼႆႉ” ဝႃႈၼႆ။
ၼွၵ်ႈလိူဝ်ၼၼ်ႉ သပ်းလႅင်းလၢတ်ႈၼႄထႅင်ႈ လွင်ႈသုၼ်ႇလႆႈသုၼ်ႇပဵၼ်ၵူၼ်း တင်း တီႇမူဝ်ႇၶရေႇသီႇ ၸဵမ်ၸိူဝ်းၼႆႉ ဝႃႈၼႆ။
ၵူၼ်းၼုမ်ႇတႆး ဢၼ်လူင်းႁူပ်ႉထူပ်းၵူၼ်းမိူင်းၸိူဝ်းၼၼ်ႉတႄႉ ၼၢင်းၽူၺ်းယွတ်ႈၾႃႉ၊ ၸၢႆးၵေႃၾႃႉ၊ ၸၢႆးပိုၼ်းသိူဝ်၊ ၸၢႆးသိူဝ် ႁၢၼ်ၶိူဝ်း ၸဵမ်ၸိူဝ်းၼႆႉ။ ယိူင်းဢၢၼ်းတႄႉတႃႇလႅၵ်ႈလၢႆႈတၢင်းႁူႉပၼ် ၵူၼ်းၼႂ်းပိုၼ်ႉတီႈ ဝႃႈၼႆ။
ၵူၼ်းၸိူဝ်းမႃးထွမ်ႇငိၼ်းၸွမ်းတႄႉ ပဵၼ်ၵူၼ်းဝၢၼ်ႈၸႄႈ၊ တၢင်ႉယႃႉ၊ မိူင်းတိူၼ်း၊ ၵုင်းၵဝ်ႇ၊ ဝၢၼ်ႈမႂ်ႇ ပဵင်းႁုင်း၊ ၼမ်ႉလိၼ်းၶမ်း၊ ၼမ်ႉႁူးၵူင်၊ ၽႃၸူၵ်ႉ ၸဵမ်ၸိူဝ်းၼႆႉ ဝႃႈၼႆ။
