မူ ၼႂ်းၼွင်ႁၢႆးယႃႈတၢႆၼမ် တုမ်ႉတိူဝ်ႉပႃး လွၵ်းၵၢတ်ႇ ၵၢၼ်ၵႃႉၶၢႆမူ

မူ ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ပဵၼ်ၵႃႇလ – တၢႆၼမ် ထိုင်တီႈပေႃးလႆႈၸီႉသင်ႇပိၵ်ႉဢိုတ်း ႁၢမ်ႈၶၢႆၼိူဝ်ႉမူ ၊ လၢႆလၢႆၸႄႈဝဵင်း ၵေႃႈ တုမ်ႉယွၼ်ႈ ပႃးလွၵ်ၵၢတ်ႇ ၵၢၼ်ၵႃႉၶၢႆမူ တင်း ၼိူဝ်ႉမူ။

တႄႇၶၢဝ်းတၢင်းမွၵ်ႈၼိုင်ႈလိူၼ်မႃးၼႆႉ ဝၢၼ်ႈၵူၼ်း 17 ဝၢၼ်ႈ ဢၼ်မီးၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ႁူပ်ႉပၼ်ႁႃ လွင်ႈမူပဵၼ် တၢင်းပဵၼ်လိူတ်ႈဢွၵ်ႇၶူႈၼင်သေ ပိၼ်ႈလူမ်ႉတၢႆၼမ် ဝႃႈၼႆ။

(ၼၢင်း) ၶၢႆႇဝႃႇဝႃႇ ၸူဝ်း ၵူၼ်းဝၢၼ်ႈဢိင်းပေႃးၶူင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၼွင်ၼႆႉ ဢမ်ႇၶႂ်ႈမီးမူယဝ်ႉ၊ တၢႆၼမ်ၼႃႇလႄႈ မဵၼ်ၵေႃႈမဵၼ်ၼၼ်ႉယဝ်ႉ။ တီႈၶူႈၼင်မူၼၼ်ႉ မီးလိူတ်ႈဢွၵ်ႇမႃး၊ ဢၢႆၵေႃႈမဵၼ်ႁႅင်းၼႃႇ ၵႃႇလမူၵမ်းၼႆႉ ” ဝႃႈၼႆ။

လွင်ႈၵႃႇလမူႇၼႆႉ တႄႇဢဝ် မိူဝ်ႈၵၢင်လိူၼ်မေႊမႃး တေႃႇထိုင်ဝၼ်းတီႈ 1 လိူၼ်ၵျုၼ်ႊၼႆႉ ယူႇတီႈႁွင်ႈၵၢၼ် ၾၢႆႇလိူမ်ႈလႆႇ ၸႄႈဝဵင်းယွင်ႁူၺ်ႈ လူင်းပိုၼ်ႉတီႈၵူတ်ႇထတ်းသေ ႁၢမ်ႈသိုဝ်ႉၶၢႆမူ၊ ၼိူဝ်ႉမူ တေႃႇၵၼ် ဝႆႉၸူဝ်ႈၶၢဝ်း ဝႃႈၼႆ။

ၶၢႆႇဝႃႇဝႃႇၸူဝ်း သိုပ်ႇလၢတ်ႈဝႃႈ “ လွင်ႈမူတၢႆၼႆႉ တေမီးမွၵ်ႈ လိူၼ်႞ယဝ်ႉၶႃႈ။ ၵူၼ်းၼႂ်းၼွင် ၵူႈႁိူၼ်းႁိူၼ်းၼႆႉ လဵင်ႉမူ ႁိူၼ်းလႂ် ဢမ်ႇယွမ်း 5 တူဝ်။ ၼိုင်ႈဝၼ်း တူဝ်႞ သွင်တူဝ် တၢႆယူႇၵူႈဝၼ်း တေႃႇပေႃးမူၺ်ႉၶႃႈယဝ်ႉ” ဝႃႈၼႆ။

လွင်ႈမူလူႉတၢႆၸိူင်ႉၼႆ ၶႂ်ႈဝႃႈမီးယူႇၵူႈပီ၊ ပီၼႆႉ လႆႈဝႃႈ ၼမ်လိူဝ်မိူဝ်ႈၵူႈပီပူၼ်ႉမႃး။ တူဝ်မူတၢႆၸိူဝ်းၼၼ်ႉၵေႃႈ ဢမ်ႇၾင် ပႅတ်ႈပဵၼ်ပၵ်းပဵၼ်လႄႈ ပႅတ်ႈဢဝ်ၵမ်ႉမၼ်းသၢင်ႇတေႃႇယဝ်ႉ – ဝႃႈၼႆ။

“လွင်ႈမူတၢႆၼႆႉသေ ယူႇတီႈႁွင်ႈၵၢၼ်ၾၢႆႇၵဵဝ်ႇၶွင်ႈၶဝ်တႄႉဝႃႈ ပဵၼ်ယွၼ်ႉတၢင်းပဵၼ် ၶႆႈမူဢႅပ်ႊၾရိၵ” ၼႆ ၵူၼ်းပိုၼ်ႉတီႈၼႂ်းၼွင်ႁၢႆးယႃႈတႄႉလၢတ်ႈၼႄၼင်ႇၼႆ။

ဢိင်ၼိူဝ်မူတၢႆၼႂ်းၸႄႈဝဵင်းယွင်ႁူၺ်ႈၼႆႉသေ တုမ်ႉတိူဝ်ႉထိုင် တၢင်းၸႄႈဝဵင်းတူၼ်ႈတီး၊ ၵၢတ်ႇလေႃႉ၊ လွၵ်ႉၸွၵ်ႇ၊ ၾၢႆၶုၼ်၊ ႁူဝ်ပူင်း၊ သီႇသႅင်ႇ၊ ပၢင်လွင်း၊ ပင်းတရႃႉ (ပိၼ်းတယ)လႄႈ ယႂႃႇငၢၼ်ႇ ၸိူဝ်းၼႆႉ။ တၢင်ႇဝဵင်းၵေႃႈ တေႃႈၼင်ႇ ၼၼ် ဢိင်ၼိူဝ်ပၼ်ႁႃ ၵႃႇလမူသေ ႁၢမ်ႈသိုဝ်ႉဢွၵ်ႇၶၢႆသူင်ႇမူ တင်း ၼိူဝ်ႉမူဝႆႉ – ဝႃႈၼႆ။

မိူဝ်ႈပီပူၼ်ႉ တၢင်းၸႄႈဝဵင်းၵဵင်းတုင်လႄႈ တႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ယၢမ်ႈပဵၼ် ၵႃႇလမူႇ၊ သူၼ်လဵင်ႉမူ တၢႆ ပဵၼ်ၶွၵ်ႈ ပဵၼ်ၶွၵ်ႈ တူဝ်မူပေႃးၵေႃႇပေႃးၵွင်လႄႈ ထိုင်တီႈ ၾၢႆႇတေႃႉသူင်ႈ ႁၢမ်ႈႁႄႉ – ဢမ်ႇပၼ်ၽႂ် တေႃႉတၢင်ႇ ဢဝ်ၵႂႃႇ ၼိူဝ်ႉမူ၊ ၼိူဝ်ႉသူမ်ႈမူ ၸိူဝ်းၼႆႉ လႃးလႃး။