ၵႃးတၢႆႇၼႃႇလမ်းၼိုင်ႈ တၢင်ႇၵူၼ်းႁဵတ်းၵၢၼ် မႄး/သႂ်ႇသၢႆၾႆးၾႃႉ ပိၼ်ႈတူၵ်းႁူၺ်ႈ ၾၢႆႇဢွၵ်ႇၶူင်း၊ ၼႂ်းၸႄႈဝဵင်းမိူင်းပဵင်း မီးၵူၼ်းလူႉတၢႆ 2 ၵေႃႉ မၢတ်ႇၸဵပ်းလၢႆလၢႆၵေႃႉ။
မိူဝ်ႈၼႆႉ ဝၼ်းတီႈ 4/6/2020 ယၢမ်းၵၢင်ဝၼ်း 11 မူင်းၶိုင်ႈၼႆႉ ၵႃးတၢႆႇၼႃႇ တၢင်ႇၵူၼ်းႁဵတ်းၵၢၼ် မႄးၾႆး/ သႂ်ႇသၢႆၾႆးၾႃႉ တင်းမူတ်း 30 ၵေႃႉ ၶီႇမႃးၸွမ်းၵၼ် ပိၼ်ႈတူၵ်းႁူၺ်ႈၵႂႃႇတီႈတၢင်းၶဝ်ႈဝဵင်းတူင်ႈတႃႈ ၸႄႈဝဵင်းမိူင်းပဵင်း ၸႄႈတွၼ်ႈ ၵဵင်းတုင် ၸိုင်ႈတႆးပွတ်းဢွၵ်ႇၶူင်း၊ ယွၼ်ႉပရိၵ်ႈၵႃးပွင်ႇသေ ပိၼ်ႈတူၵ်းၵႂႃႇၼႂ်းႁူၺ်ႈ တၢင်းလိုၵ်ႉတေမီး မွၵ်ႈ 50 ထတ်း။ ၵူၼ်းၶီႇမႃးၸွမ်း လႆႈလူႉတၢႆ 2 ၵေႃႉ မၢတ်ႇၸဵပ်းႁၢဝ်ႈႁႅင်း 8 ၵေႃႉ၊ လိူဝ်ၼၼ်ႉ မၢတ်ႇၸဵပ်းၸွမ်းဢိတ်းဢွတ်း ဝႃႈၼႆ။
ၸုမ်းၵူၼ်းႁဵတ်းၵၢၼ် သႂ်ႇသၢႆၾႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လုၵ်ႉတၢင်းၵဵင်းတုင်သေ တေၵႂႃႇသႂ်ႇသၢႆၾႆး ပၼ်တၢင်းတူင်ႈတႃႈ၊ လႆႈပဵၼ်ၽေးဢုပၢတ်ႈ ၵႃးပိၼ်ႈတူၵ်းႁူၺ်ႈၵႂႃႇ တီႈတၢင်းၶဝ်ႈဝဵင်းတူင်ႈတႃႈၼၼ်ႉ တၢင်းလိုၵ်ႉႁူၺ်ႈ တေမီးမွၵ်ႈ 50 ထတ်း/ ပေႇၼႆႉ။ မီးၵူၼ်းမၢတ်ႇၸဵပ်းႁၢဝ်ႈႁႅင်း တင်းမူတ်း 10 ၵေႃႉ၊ ၼႂ်း 10 ၵေႃႉၼၼ်ႉ လႆႈလူႉတၢႆ 2 ၵေႃႉ။ တေႃႈလဵဝ် ၵူၼ်းၸဵပ်းႁၢဝ်ႈႁႅင်းၸိူဝ်းၼၼ်ႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃ လူင်ၵဵင်းတုင်”ဝႃႈၼႆ။
သိုပ်ႇလၢတ်ႈဝႃႈ “ၵူၼ်းမၢတ်ႇၸဵပ်းၸွမ်း ဢိတ်းဢွတ်း ဢမ်ႇပေႃးႁၢဝ်ႈႁႅင်း ၸိူဝ်းၼၼ်ႉတႄႉ လႆႈသူင်ႇယူတ်းယႃ တူဝ်ဝႆႉတီႈႁူင်းယႃဝဵင်းမိူင်းပဵင်းဝႆႉယဝ်ႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းၸွႆႈထႅမ်ဝဵင်းတူင်ႈတႃႈလႄႈ ၾၢႆႇတပ်ႉသိုၵ်းလူင်ပွင်ၸိုင်ႈ လႆႈမႃးၸွႆႈၵၼ်ဢဝ်ၵူၼ်း ၸိူဝ်းတူၵ်း ႁူၺ်ႈၵႂႃႇၸိူဝ်းၼၼ်ႉ ဢွၵ်ႇမႃး။
သဵၼ်ႈတၢင်း မိူင်းတႆး ပွတ်းၸၢၼ်း ၶၢမ်ႈၶူင်း ၵၢႆႇၸူးမိူင်းတႆး ပွတ်းဢွၵ်ႇၼႆႉ သဵၼ်ႈတၢင်း တူၼ်ႈတီး – လၢင်းၶိူဝ်း – မိူင်းပၼ်ႇ – တႃႈသၢင်း- မိူင်းတူၼ် – မိူင်းသၢတ်ႇ – တႃႈၶီႈလဵၵ်း သၢႆၼိုင်ႈ၊ သဵၼ်ႈတၢင်း တူၼ်ႈတီး – ၵုၼ်ႁဵင် – ၵႃလိ – တႃႈၵေႃႈ – မိူင်းပဵင်း – ၵဵင်းတုင် – တႃႈၶီႈလဵၵ်း သၢႆၼိုင်ႈ၊ တင်းသွင်သၢႆၼႆႉ ႁူၺ်ႈလိုၵ်ႉလွႆသုင်၊ ပေႃးဢမ်ႇမီးတူဝ်ထူပ်း ၵၢၼ်ႁေႃၵႃး၊ လီဝႆႉသတိ ဝႆႉၼၵ်းပၵ်းၸႂ် သေႁေႃႈ။ ပၼ်ႁႃ ရူတ်ႉၵႃး ပိၼ်ႈတူင်းႁူၺ်ႈ ၵႆႉမီးယူႇသေႇသေႇ။
