ၽူႈယႂ်ႇၵူၼ်းလူင် ၼႂ်းတပ်ႉသိုၵ်း RCSS/SSA တင်း ၵူၼ်းမိူင်း ဢွၼ်ၵၼ်ပႂ်ႉႁပ်ႉတွၼ်ႈ ၸွမ်သိုၵ်းလူင် ယွတ်ႈသိုၵ်း ဢၼ်လႆႈၵႂႃႇႁပ်ႉၸုမ်ႈၶူး M.A တီႈၸၼ်ႉၸွမ်ပထုမ်းထႃးၼီး ၸိုင်ႈထႆးၼၼ်ႉသေ ႁွတ်ႈၽႅဝ်ၶိုၼ်းတီႈငဝ်ႈၸိုင်ႈလွႆ တႆးလႅင်း ၵူၼ်းၼပ်ႉႁူဝ်ႁဵင် ႁူမ်ၸူမ်းႁပ်ႉတွၼ်ႈ။
ဝၼ်းတီႈ 30/01/2018 ယၢမ်းဝၢႆးဝၼ်း 12 မူင်းပၢႆၼၼ်ႉ ၵႅမ်ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၸဝ်ႈသိုၵ်း ၸၢႆးယီႈလႄႈ ၸဝ်ႈႁၢၼ်ၶိူဝ်းငိုၼ်း ဢွၼ်ႁူဝ်ၼမ်းၼႃႈ ၽူႈယႂ်ႇၵူၼ်းလူင် ၵူႈႁွင်ႈၵၢၼ်သေ ဢမ်ႇၵႃး ႁူမ်ႈပႃးၵေႃႉသိုၵ်းၵေႃႉႁၢၼ်၊ ၵူၼ်းမိူင်းလႄႈ ၶူးသွၼ်/မေႃသွၼ် တင်းလုၵ်ႈႁဵၼ်း ဢွၼ်ၵၼ် ပႂ်ႉႁူမ်ၸူမ်း ႁပ်ႉတွၼ်ႈ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တီႈတၢင်း ၶဝ်ႈငဝ်ႈၸိုင်ႈလွႆတႆးလႅင်း လႅၼ်လိၼ် တႆး-ထႆး ဝႃႈၼႆ။
ၽူႈမီးၸၼ်ႉ ၸဝ်ႈၼိုင်ႈၼႂ်းတပ်ႉသိုၵ်း RCSS/SSA လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၵူၼ်းသိုၵ်းႁဝ်း လွႆတႆး လႅင်း ၼႂ်းပၢင်ႇမၢႆ 3 ပႃးၸဵမ်ၽူႈၽွင်းငမ်းပၢင်သဝ်းႁဝ်းတင်းမူတ်း မႃးပႂ်ႉႁပ်ႉႁူမ်ၸူမ်းၶႃႈ။ လိူဝ်ၼၼ်ႉ ၵူၼ်းလူင် ၵူႈၸၼ်ႉၸၼ်ႉ၊ ၵူႈႁွင်ႈၵၢၼ် မႃးပႂ်ႉႁပ်ႉ ပေႃးတဵမ်တၢင်းဢေႃႈ။ ႁဝ်းၶႃႈ ဢွၼ်ၵၼ်ၵႂႃႇပႂ်ႉ ၸဝ်ႈႁူဝ်ပဝ်ႈႁဝ်း တီႈလၢၼ်ႇတႆး-ထႆး တၢင်းၶဝ်ႈမႃးတီႈငဝ်ႈၸိုင်ႈၵမ်းလဵဝ်ၼၼ်ႉၶႃႈ” ဝႃႈၼႆ။
ၼႂ်းပၢင်ႁူမ်ၸူမ်းႁပ်ႉတွၼ်ႈ ၸွမ်သိုၵ်းလူင် ယွတ်ႈသိုၵ်း ဢၼ်လႆႈဝၢႆႇပွၵ်ႈၶိုၼ်းတီႈငဝ်ႈၸိုင်ႈလွႆတႆးလႅင်းၼႆႉ မီးၽူႈ ယႂ်ႇၵူၼ်းလူင် လၢႆလၢႆၸဝ်ႈ တၢင်တူဝ်ၵေႃႉသိုၵ်းႁၢၼ်လႄႈ ၵူၼ်းမိူင်းသေ မွပ်ႈယိုၼ်ႈ ၶူဝ်ႉမွၵ်ႇ။ ၼွၵ်ႈလိူဝ်ၼၼ်ႉ ၸုမ်းလုၵ်ႈႁဵၼ်း ၼႂ်းႁူင်းႁဵၼ်းၸိူဝ်ႉၸၢတ်ႈၵေႃႈ လႆႈဢဝ်တၢင်းၵႃႈၾိင်ႈႁိတ်ႈႁွႆးတႆးသေ ၵႃႈမူၼ်ႈ/သူင်သိူဝ်း ႁပ်ႉတွၼ်ႈၵႂႃႇ ဝႃႈၼႆ။
ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆႉ ယဝ်ႉ ၵၢၼ်ႁဵၼ်း ၸၼ်ႉ M.A ၾၢႆႇၵၢၼ်မိူင်းလႄႈ ၵၢၼ်ၽွင်းငမ်း တီႈၸၼ်ႉၸွမ်ပထုမ်းထႃးၼီး ၸိုင်ႈထႆးသေ လႆႈႁပ်ႉ ၸုမ်ႈၶူး မိူဝ်ႈဝၼ်းတီႈ 28/01/2018 ပူၼ်ႉမႃးၼၼ်ႉ ဝႃႈၼႆ။
ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်ႈၸိုင်ႈတႆးၼႆႉ လႆႈၶိုၼ်ႈႁူင်းႁဵၼ်းလူင် ပွင်ၸိုင်ႈမၢၼ်ႈ တီႈၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း လႆႈႁဵၼ်းထိုင် ၸၼ်ႉ 8 ၼႆသေတႃႉ ၵၢၼ်ႁဵၼ်းမိူင်း ထႆးတႄႉ မၼ်းၸဝ်ႈႁဵၼ်းပၢႆးပၺ်ၺႃၵၢင်ၶမ်ႈ/ ႁဵၼ်းတီႈၵႆ/ ပႃးၸဵမ် (ၵေႃးသေႃႊၼေႃး) ၵၢၼ်ႁဵၼ်းၼွၵ်ႈ ၶၢဝ်းယၢမ်း ၸိူဝ်းၼႆႉသေ လႆႈႁဵၼ်းမႃးလၢႆၶၵ်ႉလၢႆတွၼ်ႈ၊ တွၼ်ႈ M.A ၼႆႉတႄႉ လႆႈၾင်တူဝ်ၾင် ၸႂ်ႁဵၼ်းဢဝ်ႁိုင် 3 ပီ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ