ၵူၼ်းမိူင်းႁူမ်ႈတုမ် ဢၼ်ထႆးသူင်ႇတူဝ် ပွၵ်ႈၶဝ်ႈမႃးတၢင်းတႃႈၶီႈလဵၵ်း 76 ၵေႃႉ မိူဝ်ႈႁၢင်လိူၼ်မေႊၼၼ်ႉ ၵူတ်ႇထတ်းဢမ်ႇႁၼ်ၸိူဝ်ႉမႅင်းၶူဝ်ႊဝိတ်ႉယဝ်ႉလႄႈ လႆႈၶႂၢင်ႉပွၵ်ႈမိူဝ်းဢွင်ႈတီႈဝဵင်းၽႂ်မၼ်းယဝ်ႉ။

ၵူၼ်း 76 ၵေႃႉၼႆႉ လူင်ပွင်ၸိုင်ႈထႆးသူင်ႇတူဝ်ပွၵ်ႈၶိုၼ်းတႃႈၶီႈလဵၵ်းမိူဝ်ႈဝၼ်းတီႈ 29/5/2020၊ ၵုမ်းတူဝ်ယူႇဝႆႉတီႈ ႁူမ်ႈယဵၼ်မူဝ်းၵူၵ်ႉဝိပသ်ႉသၼႃ ၸႄႈဝဵင်းတႃႈၶီႈလဵၵ်း။ ၾၢႆႇပၢႆးယူႇလီလႆႈၵူတ်ႇထတ်းၼမ်ႉမုၵ်ႈ ၼမ်းလၢႆး ပၼ်သေ ၶေႃႈတွပ်ႇ ဢွၵ်ႇမႃး ယၢမ်းဝၢႆးဝၼ်း မိူဝ်ႈဝႃး 2/6/2020 ဝႃႈ ပဵၼ် Negative တင်းမူတ်းလႄႈ လႆႈၶႂၢင်ႉပွၵ်ႈမိူဝ်းႁိူၼ်းၽႂ်မၼ်းတင်းမူတ်း – ဝႃႈၼႆ။

ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းတႃႈၶီႈလဵၵ်း လႄႈ ၸုမ်းၸွႆႈထႅမ် ႁႅင်းၵၢၼ် လႅၼ်လိၼ်တႆး-ထႆး လၢတ်ႈတီႈၽူႈတွႆႇႁွၵ်ႈဝႃႈ- “တီႈမူဝ်းၵူၵ်ႉဝိပသ်ႉသၼႃတႄႉ ဢွၼ်ၵၼ်ပွၵ်ႈမိူဝ်းသဵင်ႈယဝ်ႉ။ ယူႇတီႈၽူႈမီးပုၼ်ႈၽွၼ်း တႃႈၶီႈလဵၵ်း ဢွၵ်ႇလိၵ်ႈပၼ်ဝႂ်ဢၼ်ဝႃႈ ပဵၼ် Negative ဢမ်ႇမီးၸိူဝ်ႉမႅင်းၼၼ်ႉ ပၼ်ၵူႈၵေႃႉယဝ်ႉသေ ပၼ်ၶႂၢင်ႉပွၵ်ႈမိူဝ်းယဝ်ႉ။ ၵူၺ်းၵႃႈ ပေႃးၽႅဝ်တီႈၶဝ်ယူႇၼၼ်ႉတႄႉ ၶဝ်တေလႆႈမိူဝ်းၵုမ်းတူဝ်ယူႇဝႆႉတီႈၼႂ်းႁိူၼ်းယေး ၽႂ်မၼ်း သေၵွၼ်ႇ ၸင်ႇတေဢွၵ်ႇၵႂႃႇမႃးတၢင်းၼွၵ်ႈ” ဝႃႈၼႆ။

ၵူၼ်းမိူင်းႁူမ်ႈတုမ် 76 ၵေႃႉၼၼ်ႉ ပႃးၵူၼ်းတူၵ်းၶွၵ်ႈ 28 ၵေႃႉ၊ ႁႅင်းၵၢၼ်လႄႈ ၵူၼ်းမိူင်း ဢၼ်ၶမ်ဝႆႉတီႈမႄႈသၢႆ တင်းမူတ်း 48 ။

ၸၢႆးၼုမ်ႇတုၺ်ႈ သိုပ်ႇလၢတ်ႈဝႃႈ “ မိူဝ်ႈၼႆႉ ဝၼ်းတီႈ 2 ယၢမ်းဝၢႆးဝၼ်း 2 မူင်းၼႆႉ ၵူၼ်းမိူင်းႁူမ်ႈတုမ် ဢၼ်တူၵ်းၶွၵ်ႈဝႆႉ တၢင်းၾင်ႇမိူင်းထႆးၼၼ်ႉ တေသူင်ႇပွၵ်ႈမႃး တႃႇ 32 ၵေႃႉ။ ယဝ်ႉၵေႃႈ ႁႅင်းၵၢၼ် ဢၼ်လုၵ်ႉၵဵင်းမႆႇမႃးသမ်ႉ မီး 40 ပၢႆ။ မွၵ်ႈ 4 မူင်းဝၢႆးဝၼ်းၼႆႉ တေၶၢမ်ႈမႃးတၢင်းၾင်ႇတႃႈၶီႈလဵၵ်းၼႆႉၶႃႈယဝ်ႉ” ဝႃႈၼႆ။

ၶူဝ်လႅၼ်လိၼ် တႃႈၶီႈလဵၵ်းမႄႈသၢႆၼႆႉ ၾၢႆႇထႆးသင်ႇပိၵ်ႉဢိုတ်းၸဵမ်မိူဝ်ႈ ႁၢင်လိူၼ်မၢတ်ႉၶျ် ။ ဢမ်ႇပၼ်ၵူၼ်းၶၢမ်ႈၵႂႃႇမႃးယဝ်ႉ။ ၶူဝ်းၶွင်တေႃႉသူင်ႇၵႃႉၶၢႆသွင်ၾင်ႇၸိုင်ႈမိူင်းတႄႉလႆႈၶၢမ်ႈၶူဝ်မၢႆသွင်။ ၵူၺ်းၵႃႈၵူၼ်းမိူင်းဢၼ်ၶမ်ဝႆႉသွင်ၾင်ႇၸိုင်ႈမိူင်းၵေႃႈ ၸဝ်ႈၼႃႈတီႈသွင်ၾင်ႇၵူတ်ႇထတ်းပၢႆးယူႇလီပၼ်သေ သူင်ႇပွၵ်ႈၶိုၼ်းယူႇ။