ပလိၵ်ႈမၢၼ်ႈဝဵင်းၵဵင်းတုင် တီႉၺွပ်းၽူႈၸၢႆးထႆးၵေႃႉၼိုင်ႈ ဢၼ်ပၢႆႈၸဝ်ႈၼႃႈတီႈထႆး သေၶဝ်ႈသေႃႉၼႂ်းမိူင်းတႆး။

ၸၢႆးထဝတ်ႊၶျႆႊ ဢွမ်ႊသူမ်ႊၽူႊ ဢႃယု 29 ပီ ပဵၼ် ၵူၼ်းမိူင်း ပထုမ်ႊထႃႊၼီႊ ၸိုင်ႈထႆးပၢႆႈၶဝ်ႈ သွၼ်ႉတူဝ်ယူႇၼႂ်းဝဵင်းၵဵင်းတုင်ၸိုင်ႈတႆး မၼ်းၸၢႆးၼႆႉ လုမ်းတြႃးၸႄႈ တွၼ်ႈပထုမ်ႊ ထႃႊၼီႊလႄႈ လုမ်းတြႃးၸႄႈတွၼ်ႈ သီႊသၵဵတ်ႊ ဢွၵ်ႇလိၵ်ႈတီႉၺွပ်း ၸွမ်းၼင်ႇ တၢင်းၽိတ်း ၵဵဝ်ႇၶွင်ႈယႃႈ မဝ်းၵမ်ၼႆ သိုဝ်ႇၶၢဝ်ႇထႆး MGR Online ပိုၼ်ၽၢဝ်ႇမိူဝ်ႈဝၼ်းတီႈ28/01/2018 ။

မၼ်းၸၢႆးၼႆႉ ၺႃးၸဝ်ႈၼႃႈတီႈပလိၵ်ႈမၢၼ်ႈတီႉမိူဝ်ႈဝၼ်းတီႈ 24/01/2018 ၼိူဝ်သဵၼ်ႈတၢင်း ၵဵင်းတုင် – တႃႈၶီႈလဵၵ်း ၽွင်းႁေႃႈၵႃး ၵႂႃႇၵဵင်းတုင် ။ ၼႂ်းၵႃးၼၼ်ႉမီးပႃးၽူႈယိင်းထႅင်ႈသွင်ၵေႃႉ ၊ ၵွင်ႈလႄႈ မၢၵ်ႇၵွင်ႈ ။ တၢင်းၾၢႆႇၸဝ်ႈၼႃႈတီႈၸင်ႇတီႉၺွပ်းတူဝ်မၼ်းၸၢႆး သူင်ႇႁူင်းပလိၵ်ႈၵဵင်းတုင် ၸိုင်ႈတႆးပွတ်းဢွၵ်ႇ။

ၶၢဝ်ႇထႆးဢွၵ်ႇဝႆႉဝႃႈ ၸၢႆးထဝတ်ႊၶျႆႊ ဢွမ်ႊသူမ်ႊၽူႊၼႆႉ ပဵၼ်ၵူၼ်းဢၼ်ၸွႆႈထႅမ် ၼၢင်းသၢဝ်ပဵဝ်ႉ ဢၼ်ၶႃႈႁႅမ်ၵူၼ်းသေပၢႆႈၶဝ်ႈတႃႈၶီႈလဵၵ်းမိူဝ်ႈပီၵၢႆ။ ယၢမ်းလဵဝ်တၢင်းၾၢႆႇၸဝ်ႈၼႃႈတီႈတင်း သွင်ၸိုင်ႈမိူင်းၵေႃႈ တေၵပ်းသၢၼ်ၵၼ်ပိူဝ်ႈပၼ်တူတ်ႈတၢမ်ႇၸွမ်းၼင်ႇပၵ်းပိူင်မၢႆမီႈ ဝၢၼ်ႈမိူင်းမီး ၼၼ်ႉဝႃႈၼႆ။

Photo Cr. Maesai news