ၾၢႆႇတတ်းသိၼ်တြႃး ပိုတ်ႇလုမ်းတႅပ်းတတ်းတြႃးပၼ် ၼႂ်းၸႄႈဝဵင်းႁူဝ်ပူင်း မီးၽူႈယႂ်ႇၵူၼ်းလူင်ၼႂ်းၶႃႈႁၢပ်ႇၵၢၼ် လူင်ပွင်ၸိုင်ႈ မိူင်းတႆးၶဝ်ႈႁူမ်ႈ ပိုတ်ႇပၢင်ၵႂႃႇ ဝႃႈၼႆ။
ပၢင်ၵႅဝ်ႈပိုတ်ႇလုမ်းတႅပ်းတတ်းတြႃးၸတ်းႁဵတ်းတီႈဝဵင်းႁူဝ်ပူင်း ဝၼ်းတီႈ 27/01/2018 ယၢမ်းၵၢင်ၼႂ် 9 မူင်း ၼႂ်းၼႃႈလိၼ်ၽွင်းငမ်းတူဝ်ၵဝ်ႇပဢူဝ်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ၵႅမ်ႁူဝ်ပဝ်ႈ သၽႃးမိူင်းတႆး၊ ၽူႈ တႅပ်းတတ်းတြႃးၼႂ်းသၽႃးမိူင်းတႆး၊ ၽူႈတႅၼ်းသၽႃးၸိူဝ်ႉၸၢတ်ႈ၊ ႁူဝ်ပဝ်ႈၼႃႈလိၼ်ၽွင်းငမ်းတူဝ်ၵဝ်ႇ ပဢူဝ်း လႄႈ ၽူႈၵွၼ်းတိူင်းသိုၵ်း တူၼ်ႈတီး ၸိူဝ်းၼႆႉ ၶဝ်ႈႁူမ်ႈ ၵႅတ်းမႆလၢႆႈ ပိုတ်ႇပၢင်။ ယူႇတီႈၸွမ်ၽွင်းလူင် မိူင်းတႆး ၻွၵ်ႊတိူဝ်ႊလိၼ်းထုတ်ႉသမ်ႉ ပိုတ်ႇပၢႆႉလုမ်းတႅပ်းတတ်းတြႃးၵႂႃႇ ဝႃႈၼႆ။
ၻွၵ်ႊတိူဝ်ႊလိၼ်းထုတ်ႉ ၸွမ်ၽွင်းလူင်မိူင်းတႆး မွၵ်ႇလၢတ်ႈၶေႃႈၵႂၢမ်းဝႃႈ “ ၼႂ်းပိူင်ငဝ်ႈပိုင်းမိူင်း 2008 မၢႆမီႈမတ်ႉတႃ 56 ၼၼ်ႉ ပၼ်သုၼ်ႇၽွင်းငမ်းတူဝ်ၵဝ်ႇၼႂ်းတိူင်း 1 ဢၼ်လႄႈ ၼႂ်းၸႄႈမိူင်းမီး 4 ဢၼ်။ ၼႂ်းမတ်ႉတႃ 196 ၼၼ်ႉ မွပ်ႈပၼ်ဢမ်းၼၢတ်ႈတႃႇၸတ်းပွင်မၢႆမီႈၼႂ်းၼႃႈလိၼ်ၽွင်းငမ်းတူဝ်ၵဝ်ႇ။ ၼႂ်းမတ်ႉတႃ 293 သမ်ႉပၼ်သုၼ်ႇတႃႇ ပိုတ်ႇလုမ်းတႅပ်းတတ်းတြႃး ၼႂ်းၼႃႈလိၼ်ၽွင်းငမ်းတူဝ်ၵဝ်ႇ။ ၵွပ်ႈၼၼ်လႄႈ ၸင်ႇလႆႈပိုတ်ႇလုမ်းပၼ် ဝႃႈၼႆ။
ယူႇတီႈႁူဝ်ပဝ်ႈၼႃးလိၼ်ၽွင်းငမ်းတူဝ်ၵဝ်ႇ ပဢူဝ်း မွၵ်ႇလၢတ်ႈၶေႃႈၵႂၢမ်းယိၼ်းၸူမ်းၶွပ်ႈၸႂ် ထိုင် တီႈၽူႈယႂ်ႇၵူၼ်း လူင် ဢၼ်လႆႈပိုတ်ႇပၢင်ပွႆးယဝ်ႉတူဝ်ႈလီငၢမ်းၵႂႃႇယဝ်ႉ။ ယဝ်ႉၵေႃႈ ၼင်ႇႁိုဝ်တေပဵၼ် တီႈမၢႆတွင်းၼႆသေ သိုပ်ႇယိုၼ်ႈ မွပ်ႈၶွင်ၾၢၵ်ႇပၼ် ၼႂ်းပၢင်ပိုတ်ႇလုမ်းၼၼ်ႉၵႂႃႇ ဝႃႈၼႆ။
ၶေႃႈမုလ်း – kanbawzatainews.com
