ႁၢင်လိူၼ်မေႊ ၼႆႉ ပလိၵ်ႈမၢၼ်ႈ သိုၵ်းမၢၼ်ႈ တင်ႈလၢၼ်ႇၵူတ်ႇထတ်းၵူၼ်းမိူင်းၵႂႃႇမႃး ၼႂ်းၸႄႈဝဵင်းမူႇၸေႊ ႁၢဝ်ႈႁႅင်း ႁဵတ်းႁႂ်ႈ ၵူၼ်းမိူင်း ၸိူဝ်းဢမ်ႇႁူႉ ၵႂၢမ်းမၢၼ်ႈ ႁူပ်ႉတၢင်းယၢပ်ႇၽိုတ်ႇ လွင်ႈၵႂႃႇလွင်ႈမႃး။
ဝၼ်းတီႈ 26/5/2020 ယၢမ်းဝၢႆးဝၼ်း မွၵ်ႈ 1 မူင်းပၢႆၼၼ်ႉ ယူႇတီႈၽူႈမီးပုၼ်ႈၽွၼ်း ၼႂ်းၸႄႈဝဵင်းမူႇၸေႊ လၢႆလၢႆၾၢႆႇ ႁူမ်ႈၵၼ်တင်ႈလၢၼ်ႇ ပႂ်ႉၵူတ်ႇထတ်း ၵူၼ်းၵႂႃႇမႃးၼိူဝ်သဵၼ်ႈတၢင်း မိူၼ်ၼင်ႇ တီႈတၢင်းၵူတ်ႉ (တၢင်းၶူင်ႉ)ဝဵင်းမူႇၸေႊ တီႈၼိုင်ႈ၊ ပၢင်ႇႁိူဝ်းမိၼ်ၵဝ်ႇ တီႈၼိုင်ႈ၊ တီႈၼႃႈႁူင်းယႄး တီႈၼိုင်ႈလႄႈ တီႈသဵၼ်ႈတၢင်းၽႄ ၵမ်ႉၵေႃႇ တီႈၼိုင်ႈ။ ဢၼ်ႁဵတ်းၸိူင်ႉၼႆၼႆႉ ဝၢႆးမၢၵ်ႇတႅၵ်ႇ တီႈပွၵ်ႉၸွၼ်ႊၸူဝ်ႇယဝ်ႉ ၵေႃႈ ၾၢႆႇတပ်ႉပလိၵ်ႈမၢၼ်ႈ သိုၵ်းမၢၼ်ႈ ၵူတ်ႇထတ်းၵူၼ်းၵႂႃႇမႃးႁၢဝ်ႈႁႅင်း။
ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ဝၢႆးသေမၢၵ်ႇတႅၵ်ႈတီႈပွၵ်ႉၸွၼ်ႊၸူဝ်ႇ 2 လုၵ်ႈယဝ်ႉၼၼ်ႉ ၸဵမ်ယႄး ပလိၵ်ႈ သိုၵ်းၶဝ် လၢႆလၢႆၾၢႆႇသေ ပႂ်ႉၵူထ်ႇထတ်းၵူၼ်းၵႂႃႇမႃး၊ ထတ်းရူတ်ႉၶိူင်ႈ၊ ထတ်းၵႃး ၸိူဝ်း ၼႆႉ ။ ပေႃးပဵၼ်ၵူၼ်းၸၢဝ်းၶႄႇၼႆ ပၢႆၵူတ်ႇထတ်းပႃး မၢႆၾၢင်ၶဝ်ထႅင်ႈလူးၵွၼ်ႇ၊ ၵူၼ်းဢမ်ႇမေႃ ၵႂၢမ်းမၢၼ်ႈ ၵေႃႈ ယၢပ်ႇ ၸႂ်ဝႆႉ” ဝႃႈၼႆ။
သိုပ်ႇလၢတ်ႈဝႃႈ “ လွင်ႈၶဝ်ထတ်းၼၼ်ႉ လႅပ်ႈတေပႂ်ႉၵူတ်ႇထတ်း ၵူၼ်းႁၢႆႉ ဢၼ်မႃးဢဝ်မၢၵ်ႇပွႆႇသႂ်ႇတီႈပွၵ်ႉၸွၼ်ႊၸူဝ်ႇ ၵေႃႈၸၢင်ႈပဵၼ်လႆႈ၊ ၵူၺ်းၵႃႈ ႁၼ်ၶဝ်ၵူတ်ႇထတ်းႁၢဝ်းႁႅင်းယူႇသေတႃႉ ဢမ်ႇလႆႈငိၼ်းဝႃႈ ၶဝ်တီႉၺွပ်းလႆႈၵူၼ်းႁၢႆႉ ဢၼ်မႃးပွႆႇမၢၵ်ႇ” ဝႃႈၼႆ။
မိူဝ်ႈဝႃး ဝၼ်းတီႈ 26/5/2020 ယၢမ်းဝၢႆးဝၼ်း မွၵ်ႈ 1 မူင်းၼၼ်ႉ မၢၵ်ႇတႅၵ်ႇတီႈပွၵ်ႉၸွၼ်ႊၸူဝ်ႇ 2 လုၵ်ႈထပ်းၵၼ်၊ ႁဵတ်းႁႂ်ႈၵူၼ်းပိုၼ်ႉတီႈ တူၵ်းၸႂ်လႂ်တိုၼ်ႇၵၼ်။ ၵူၼ်းမႃးပွႆႇၼၼ်ႉၵေႃႈ ၶီႇရူတ်ႉၶိူင်ႈမႃးၸွမ်းၵၼ် 2 ၵေႃႉ မႃးဝိုတ်ႉထိုမ်ႈသႂ်ႇ ႁိမ်းတၢင်းမၢၼ်ႈဝဵင်း ပွၵ်ႉၸွၼ်ႊၸူဝ်ႇ လႄႈ ပႂ်ႉၵူတ်ႇထတ်း ၵူၼ်းႁၢႆႉၵေႃႈ ၸၢင်ႈပဵၼ်လႆႈ ၼႆ လုင်းသႅင်ၶမ်းႁိူၼ်း ၵူၼ်းမူႇၸေႊ လၢတ်ႈၼႄၼင်ႇၼႆ။
“ၼႂ်းၸႄႈဝဵင်းမူႇၸေႊ ႁဝ်းၶႃႈၼႆႉ ဢမ်ႇတွၼ်ႉ တီႉလႆႈတူဝ်ၵူၼ်းႁၢႆႉသေပွၵ်ႈ လွတ်ႈၵႂႃႇယူႇသေႇသေႇ၊ တေႃႈလဵဝ် တီႈမူႇၸေႊၼႆႉ ဢမ်ႇၶႂ်ႈလီယူႇ မိူၼ်မိူဝ်ႈၵူႈပွၵ်ႈ ယဝ်ႉၶႃႈ။ ၵူႈဝၼ်းဝၼ်းၼႆႉ ႁူပ်ႉလွင်ႈပၼ်ႁႃ ဝၢၼ်ႈမိူင်းဢမ်ႇမီးလွင်ႈ ၼိမ်သဝ်းၵတ်းယဵၼ်သင် သုၵ်ႉယုင်ႈယူႇတႃႇသေႇ၊ ဢၼ်ၵူတ်ႇထတ်းႁၢဝ်ႈႁႅင်းတႄႉ တႄႇမႃးမိူဝ်ႈဝႃး ဝၢႆးမၢၵ်ႇတႅၵ်ႇယဝ်ႉ” ဝႃႈၼႆ။
မိူဝ်ႈဝၼ်းတီႈ 11/5/2020 ယၢမ်းၵၢင်ၶမ်ႈ မွၵ်ႈ 8 မူင်းၶိုင်ႈၼၼ်ႉ မၢၵ်ႇတႅၵ်ႇတီႈၵဵတ်ႉ/ လၢၼ်ႇ (တိုးဂိတ်) တၢင်းၶဝ်ႈဝဵင်း မူႇၸေႊ ၸိုင်ႈတႆးပွတ်းႁွင်ႇ လုၵ်ႈၼိုင်ႈ။ မိူဝ်ႈဝၼ်းတီႈ 12 ယၢမ်းၸမ်တဵင်ႈၶိုၼ်းၵေႃႈ တႅၵ်ႇထပ်းၵၼ် သွင်လုၵ်ႈ။ ၾၢႆႇတပ်ႉပလိၵ်ႈမၢၼ်ႈ သိုၵ်းမၢၼ်ႈ ၶဵင်ႈၶဵင်ၵူၼ်းၵႂႃႇမႃး သေတႃႉ ဢမ်ႇတွၼ်ႉလႆႈႁၼ်တီႉလႆႈ တူဝ်ၵူၼ်းႁၢႆႉ ၸိူဝ်းၶဝ်ႈယိုဝ်း ၶဝ်ႈပွႆႇမၢၵ်ႇ ၼႂ်းၸႄႈဝဵင်းမူႇၸေႊ သေ ပွၵ်ႈ ၵူၼ်းမိူင်း ပွင်ႉလၢတ်ႈၵၼ်ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ