ပလိၵ်ႈမၢၼ်ႈ ၵူတ်ႇထတ်း ၼႂ်းပၢင်သဝ်းၵူၼ်းႁဵတ်းၵၢၼ် တၢင်းဝၢၼ်ႈမိူင်းယု 105 လၵ်း ၼႂ်းၸႄႈဝဵင်းမူႇၸေႊ တီႉလႆႈၵူၼ်းသူႇသမ်းၵိၼ်ယႃႈမဝ်းၵမ် တင်းမူတ်း 27 ၵေႃႉ ဝႃႈၼႆ။
ဝၼ်းတီႈ 26/01/2018 ယၢမ်းၵၢင်ၶမ်ႈ မွၵ်ႈ 5 မူင်း ၸွမ်းၼင်ႇၵူၼ်းမိူင်းပၼ်ၶၢဝ်ႇလႄႈ ပလိၵ်ႈမၢၼ်ႈတင်း တပ်ႉ သိုၵ်းလူင်ပွင်ၸိုင်ႈမၢၼ်ႈ ၸင်ႇလႆႈႁူမ်ႈၵၼ် လူင်းပိုၼ်ႉတီႉၵူတ်ႇထတ်း ပၢင်သဝ်းၵူၼ်းႁဵတ်းၵၢၼ်လႄႈပၢင် ၸဝ်ႈၵႃး မႃးလိုဝ်ႈ တၢင်းၾၢႆႇတူၵ်း သဝ်ၾူၼ်း ႁိမ်းဝၢၼ်ႈမိူင်းယု 105 လၵ်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႆႈ ၵူၼ်းသူႇသမ်း ယႃႈမဝ်းၵမ် ၽူႈၸၢႆး 25 ၵေႃႉလႄႈ ၽူႈယိင်း 2 ၵေႃႉ ဝႃႈၼႆ။
ၵူၼ်းၼုမ်ႇၼႂ်းပိုၼ်ႉတီႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ တီႈၼၼ်ႈ မၼ်းပဵၼ်တီႈၵူၼ်းၵိုၼ်းၶွၼ်ႈၼမ်။ ၵူၼ်း မိူင်းမၢၼ်ႈဢၼ် ၶိုၼ်ႈမႃးႁဵတ်းၵၢၼ်တီႈၼၼ်ႈၵေႃႈၼမ်။ ပၢင်တေႃႇလွင်းၵေႃႈၼမ်၊ ယႃႈမဝ်း ၵမ်ၵေႃႈၼမ်။ ထႅင်ႈၾၢႆႇၼိုင်ႈၵေႃႈ မႄႈမွၵ်ႈယႃႈၵေႃႈၼမ်ယဝ်ႉ။ မၼ်းပဵၼ်တီႈ ၸဝ်ႈၵႃးၶဝ် မႃးၵိုတ်း မႃးယင်ႉၵၼ် ၶႃႈဢေႃႈ တီႈၼၼ်ႈ” ဝႃႈၼႆ။
ၼႂ်းၶၢဝ်ႇ The Voice ဢွၵ်ႇဝႆႉတႄႉ ယူႇတီႈၵူၼ်းၼႂ်းပိုၼ်ႉတီႈၼၼ်ႉသေ ၸႅင်ႈၸူးထိုင် ၾၢႆႇပလိၵ်ႈမၢၼ်ႈ “ယွၼ်ႉႁၼ် ၵူၼ်းၶဝ်ႈဢွၵ်ႇၵၼ် တီႈယုမ်းၾၢႆႇလင် သဝ်ၾူၼ်းၼၼ်ႉ မီးၵူၼ်းသူႇသမ်း ၵိၼ်ယႃႈမဝ်းၵမ်” ဝႃႈၼႆ။
တီႈပၢင်သဝ်းၼၼ်ႉ ပလိၵ်ႈမၢၼ်ႈ တင်း တပ်ႉသိုၵ်းလူင်ပွင်ၸိုင်ႈမၢၼ်ႈ တီႉလႆႈတူဝ်ၵူၼ်းၵူၺ်းသေဢမ်ႇၵႃး တီႉလႆႈပႃး ယႃႈမႃႉ၊ ယႃႈၾိၼ်ႇၽိူၵ်ႇလႄႈ ၶဵမ်သမ်းယႃႈ ၸိူဝ်းၼႆႉ ဝႃႈၼႆ။
တေႃႈလဵဝ် ယူႇတီႈပလိၵ်ႈမၢၼ်ႈ လႆႈသူင်ႇတူဝ်ၵူၼ်းၸိူဝ်းၼႆႉမွပ်ႈပၼ် တီႈႁူင်းပလိၵ်ႈၸႄႈဝဵင်းမူႇၸေႊ ဝႆႉယဝ်ႉ ဝႃႈၼႆ။
