ၸုမ်းတူင်ႇဝူင်းတဢၢင်း တုၵ်းယွၼ်းလွင်ႈပဵၼ်ထမ်းတႃႇ ၵူၼ်းပွတ်းႁွင်ႇၸိူဝ်းၺႃးၶႃႈတၢႆ သိပ်းပၢႆ

ၸုမ်းတူင်ႉၼိုင် တူင်ႇဝူင်းတဢၢင်း တုၵ်းယွၼ်းထိုင်ၽူႈၵဵဝ်ႇၶွင်ႈ ၵူႈၾၢႆႇ ၊ ၸဝ်ႈၼႃႈတီႈလူင်ပွင်ၸိုင်ႈမၢၼ်ႈ ႁႂ်ႈၶိုင်ပၼ်တႃႇလႆႈလွင်ႈၽဵင်ႇပဵင်းပဵၼ်ထမ်း တႃႇၵူၼ်းမိူင်းတႆး ပွတ်းႁွင်ႇ ၸိူဝ်းၺႃးၶႃႈႁႅမ်တၢႆ 12 ၵေႃႉၼၼ်ႉ ဝႃႈၼႆ။

ဝၼ်းတီႈ 22/5/2020 ပူၼ်ႉမႃးၼႆႉ ၸုမ်းတူင်ႉၼိုင်တူင်ႇဝူင်းတဢၢင်း ဢွၵ်ႇလိၵ်ႈပိုၼ်ၽၢဝ်ႇဝႃႈ လွင်ႈၵူၼ်းမိူင်းတႆး ပွတ်းႁွင်ႇ 12 ၵေႃႉ လႆႈထုၵ်ႇၶႃႈႁႅမ်တၢႆ ၼႂ်းႁူဝ်ပီ 2020 မႃးၼႆႉၼၼ်ႉ တေႃႇထိုင်ယၢမ်းလဵဝ် ပႆႇတီႉလႆႈ တူဝ်ၵူၼ်းႁၢႆႉ ၵူၼ်းပူၼ်ႉပႅၼ်ႁဵတ်းၽိတ်း ၊ ႁဵတ်းႁႂ်ႈၵူၼ်းမိူင်းလႆႈၵူဝ်ႁႄ ၊ ဢမ်ႇမီးလွင်ႈႁူမ်ႇလူမ်ႈ ၊ ယွၼ်ႉၼၼ်လႄႈ ႁႂ်ႈလႆႈလွင်ႈပဵၼ်ထမ်းတြႃးဝႆးဝႆး ဝႃႈၼႆ။

ၵူၼ်းမိူင်းတႆး ပွတ်းႁွင်ႇ 12 ၵေႃႉ ၸိူဝ်းထုၵ်ႇၶႃႈႁႅမ်တၢႆ ၸိူဝ်းၼၼ်ႉတႄႉ ပဵၼ်ၵူၼ်းမိူင်းၼႂ်းပိုၼ်ႉတီႈ ၸႄႈဝဵင်းသီႇပေႃႉ၊ ၵျွၵ်ႉမႄးလႄႈ ၸႄႈတွၼ်ႈလႃႈသဵဝ်ႈ မိူင်းယႆ ၸိူဝ်းၼႆႉ။

လူၺ်းလႃႉသျၢၼ်ႊ ၽူႈၼမ်းၼႂ်း ၸုမ်းၵူၼ်းၼုမ်ႇလႄႈ လုၵ်ႈႁဵၼ်းတဢၢင်း လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၸိုင်ႈတႆးပွတ်းႁွင်ႇႁဝ်းၶႃႈၼႆႉ ၵႆႉမီးလွင်ႈၶႃႈႁႅမ်ၵၼ်တၢႆၼႃႇ။ ၵူၺ်းၵႃႈ ဢမ်ႇတွၼ်ႉတီႉလႆႈတူဝ်ၵူၼ်းပူၼ်ႉပႅၼ် ၵူၼ်းႁဵတ်းႁၢႆႉမႃးသေပွၵ်ႈ။ ပေႃးသိုပ်ႇပဵၼ်ၵႂႃႇထႅင်ႈၸိုင် တေဢွၼ်ၵၼ်ၸပ်းယၢမ်ႈသေ တေပဵၼ်ၾိင်ႈ ၶႃႈႁႅမ် ၵၼ်ၵႂႃႇတိၵ်းတိၵ်းလႄႈ ႁဵတ်းႁႂ်ႈၵူၼ်းမိူင်းမီးၸႂ်ၵူဝ်ႁႄ” ဝႃႈၼႆ။

ၼႂ်းၸိုင်ႈတႆးပွတ်းႁွင်ႇၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးၼမ်၊ လွင်ႈပၢင်တိုၵ်းသိုၵ်းသိူဝ်ၵေႃႈၼမ်လႄႈ လွင်ႈပူၼ်ႉပႅၼ်သုၼ်ႇလႆႈၵူၼ်းၵေႃႈၼမ်။ ယႃႈမဝ်းၵမ်ၸိူဝ်းၼႆႉၵေႃႈလိူင်ႇ ၊ ၸိူဝ်းၼႆႉႁဵတ်းႁႂ်ႈ တုမ်ႉတိူဝ်ႉၵူၼ်းမိူင်းတႄႉတႄႉဝႃႈဝႃႈယဝ်ႉ- လူၺ်းလႃႉသျၢၼ်း လၢတ်ႈၼႄၼင်ႇၼႆ။

မိူဝ်ႈပူၼ်ႉမႃးပႆႇႁိုင်ၼႆႉၵေႃႈ ၼၢင်းယိင်း 2 ၵေႃႉ ၼႂ်းၸႄႈဝဵင်းၵျွၵ်ႉမႄး ထုၵ်ႇၶႃႈႁႅမ်တၢႆ တီႈသုမ်ႉထဵင် ၼႂ်းသူၼ်ၼဵင်ႈ တေႃႇထိုင်ယၢမ်းလဵဝ် ၽူႈပူၼ်ႉပႅၼ်ၶႃႈႁႅမ်ၼၼ်ႉ ပႆႇတီႉၺွပ်းလႆႈ ။

လွင်ႈၸိူဝ်းၼႆႉမိူၼ်တၢင်း ႁူမ်ႇတူမ်းတၢင်းၽိတ်းပၼ်ၵူၼ်းႁဵတ်းႁၢႆႉၸႃႉသေ မိူၼ်တၢင်းပၼ်ႁႅင်းႁႂ်ႈၶဝ်သိုပ်ႇႁဵတ်းလွင်ႈႁၢႆႉၸႃႉၵႂႃႇထႅင်ႈၼၼ်ႉၵူၺ်း ဝႃႈၼႆ။

မၢႆးၺီႇပုဢေး ၽူႈမီးပုၼ်ႈၽွၼ်းၾၢႆႇမၢတ်ႈမၢႆ ၶၢဝ်ႇငၢဝ်းလႄႈ ၸုမ်းၸွႆႈထႅမ်လွင်ႈပၵ်းပိူင်မၢႆမီႈ တဢၢင်း လၢတ်ႈတီႈ ၽူႈတွႆႇႁွၵ်ႈဝႃႈ “ လိူင်ႈလၢဝ်းၵၢၼ်ၶႃႈႁႅမ်ၵူၼ်းတၢႆၼႆႉ မၼ်းမီးၼမ်ၼႃႇ၊ ၵူၺ်းၵႃႈ ဢမ်ႇတီႉလႆႈၵူၼ်းပူၼ်ႉပႅၼ် ၵေႃႉၶႃႈႁႅမ်ၼၼ်ႉလႆႈမႃးသေပွၵ်ႈ။ မိူၼ်ဝႃႈ လပ်ႉႁႄႉၶဝ်ဝႆႉသေ ပွႆႇဝႆႉၵူၼ်းပူၼ်ႉပႅၼ်ၸိူင်ႉၼၼ်ၵူၺ်း။ ယဝ်ႉၵေႃႈ မိူၼ်ဝႃႈ ဢမ်ႇဢဝ်လိူင်ႈလၢဝ်းသင်ၼၼ်ႉၵူၺ်းၶႃႈယဝ်ႉ” ဝႃႈၼႆ။

မိူဝ်ႈပီႈၵၢႆလႄႈ ပီဢွၼ် သွင်ပီထပ်းၵၼ် ၸဝ်ႈတူၼ်ၶူးၽူႈၼင်ႈၵျွင်းၼႂ်းၸေႈဝဵင်းၵျွၵ်ႉမႄး 2 တူၼ် ၺႃးၵူၼ်းႁၢႆႉယိုဝ်းတၢႆၼႂ်းဝတ်ႉလူးၵွၼ်ႇ။