တႆးႁွတ်ႈၵဵင်းမႆႇ ႁႅင်းၵၢၼ်ယၢၼ်မိူင်းၵေႃႉၼိုင်ႈ တူၵ်းၵၢၼ်တူၵ်းငၢၼ်း ဝူၼ်ႉၼမ်သေ ထိုင်တီႈၶႃႈတူဝ်ၸဝ်ႈၵဝ်ႇတၢႆ ၽွင်းတၢင်းပဵၼ်ၶူဝ်ႊဝိတ်ႉ – 19 ၼႆႉ။

ဝၼ်းတီႈ 24/5/2020 ၸၢႆးမျႃႉဢွင်ႇ ဢႃယု 27 ပီ၊ ၵူၼ်းၸႃတိၸႄႈဝဵင်းၵေးသီး ၸႄႈတွၼ်ႈလွႆလႅမ် ၽႅၼ်ၶေႃး ၶႃႈတူဝ်တၢႆ တီႈၼႂ်းဝဵင်းၵဵင်းမႆႇ ၸိုင်ႈထႆး။ မိူဝ်ႈလဵဝ် ၶၢပ်ႈတူဝ်တၢႆမၼ်းၸၢႆး လႆႈဢဝ်မႃးဝႆႉတီႈႁိမ်းဝတ်ႉၻွၼ်ႊၸၼ် ဢိူင်ႇထႃႈသႃလႃး ဝဵင်းၵဵင်းမႆႇ၊ တေပူၼ်ႉၶၢပ်ႈတူဝ် ၼႂ်းဝၼ်းတီႈ 28/5/2020 ၼႆႉ-ၼႆယဝ်ႉ။

ၼၢင်းသႅင်မူၼ်း ၾၢႆႇၸွႆႈလိူဝ်ၵူၼ်းတၢႆ ဢမ်ႇမီးပီႈၼွင်ႉ တီႈဝတ်ႉပႃႇပဝ်ႈ လၢတ်ႈတီႈ ၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မၼ်းၸၢႆးၽႅၼ်ၶေႃးတၢႆ ယွၼ်ႉဢမ်ႇလႆႈႁဵတ်းၵၢၼ် တူၵ်းၵၢၼ်မႃး မီးၶၢဝ်းတၢင်း မွၵ်ႈ 2 လိူၼ်ပၢႆၼႆႉယဝ်ႉ။ ယွၼ်ႉတၢင်းပဵၼ်ၶူဝ်ႊဝိတ်ႉ – 19 ၼႆႉသေ လႆႈၵိုတ်းလိုဝ်ႈၵၢၼ် ဢမ်ႇမီးငိုၼ်းၶဝ်ႈသေ တေဝူၼ်ႉၼမ် ၵေႃႈပိူင်ၼိုင်ႈႁိုဝ်ၵေႃႈ ဢမ်ႇႁူႉ ထိုင်တီႈပေႃးလႆႈႁဵတ်းၸိူင်ႉၼႆ။ ၵၢၼ်ငၢၼ်းဢၼ်မၼ်းၸၢႆးႁဵတ်းတႄႉ ပဵၼ်ၵၢၼ်ၼႂ်း ႁၢၼ်ႉ/လၢၼ်ႉမူႇၵထႃႉ(ပိင်ႈ/ ယၢင်ႈ) တီႈၼႂ်းဝဵင်းၵဵင်းမႆႇၼႆႉ” ဝႃႈၼႆ။

မိူဝ်ႈႁၢင်လိူၼ်ဢေႊပရိူဝ်ႊ 2020 ပူၼ်ႉမႃးၼၼ်ႉၵေႃႈ ႁႅင်းၵၢၼ်တႆး ၼၢင်းယိင်း ၸိုဝ်ႈႁွင်ႉ ၼွင်ႉတီႇ ဢႃယု 21 ပီၼႂ်းဝဵင်းၵဵင်းမႆႇ ၵူၺ်းၼင်ႇၵဝ်ႇ ၼၼ်ႉၵေႃႈ ဝူၼ်ႉၼမ်သေ ထိုင်တီႈၵိၼ်ယႃမိူဝ်ႇၶႃႈတူဝ်တၢႆ ဝႃႈၼႆ။

ၼၢင်းသႅင်မူၼ်း သိုပ်ႇလၢတ်ႈဝႃႈ “ ၶႂ်ႈၾၢင်ႉထိုင် ႁႅင်းၵၢၼ်တႆးႁဝ်းၶႃႈၽွင်ႈ ယၢမ်းလဵဝ်ၼႆႉ ယွၼ်ႉပဵၼ်တၢင်းပဵၼ် ၶူဝ်ႊဝိတ်ႉ – 19 ၼႆႉသေ ႁႅင်းၵၢၼ်တႆးႁဝ်း ဢွၼ်ၵၼ်တူၵ်းၵၢၼ်/ ငၢၼ်းၵၼ်ၵေႃႈၼမ်၊ ယွၼ်ႉၼၼ် ယႃႇပေဝူၼ်ႉပွတ်းသေ ထိုင်တီႈ ၶႃႈတူဝ်ၸဝ်ႈၵဝ်ႇၶႃႈ။ ဢမ်ႇၸႂ်ႈဝႃႈ ပဵၼ်တႆးႁဝ်းၵူၺ်း တူၵ်းတၢင်းယၢပ်ႇၽိုတ်ႇ ၵူၼ်းမိူင်း ၵူၼ်းထႆး ပိူၼ်ႈၵေႃႈ ဢွၼ်ၵၼ် ႁူပ်ႉလွင်ႈယၢပ်ႇၽိုတ်ႇၵိၼ်းၸႂ်လိူဝ်ႁဝ်းၼႆႉ မီးထႅင်ႈတင်းၼမ်ၶႃႈယဝ်ႉ”ဝႃႈၼႆ။

“လိူဝ်ၼၼ်ႉ ယႃႇပေဝႆႉႁူမဝ်သေ ယုမ်ႇပိူၼ်ႈငၢႆႈၶႃႈ ၵူၼ်းႁဵတ်းႁႃၵိၼ် ၸွမ်းပီႈၼွင်ႉတႆးႁဝ်းၼႆႉၵေႃႈ မီးၼမ်ၼႃႇ ၽွင်းတၢင်းပဵၼ်ၶူဝ်ႊဝိတ်ႉ 19 ၼႆႉ၊ လွၵ်ႇႁဝ်းဝႃႈ တေႁႃၵၢၼ်ပၼ်ၼႆ ႁႂ်ႈႁဝ်းၶႃႈ ပၼ်ၵႃႈႁႃၵၢၼ် 500 – 1000 ဝၢတ်ႇၸိူဝ်းၼႆႉ ယႃႇပေႁဵတ်းလႃးလႃးၶႃႈ။ လွင်ႈၸိူင်ႉၼႆ ပီႈၼွင်ႉတႆးႁဝ်း ၺႃးပႅတ်ႉမႃးၼမ်ၼႃႇယဝ်ႉ။ တႆးႁဝ်း တေႃႇတႆးႁဝ်းၵေႃႈ ပႅတ်ႉၵိၼ်ၵၼ် လွၵ်ႇၵၼ်ၸိူင်ႉၼႆၵေႃႈမီးၼမ်ၼႃႇ ၶႂ်ႈႁႂ်ႈဝႆႉသတိၵၼ်သေ ထတ်းသၢင်တူၺ်းၽွင်ႈ၊ ယႃႇပေယုမ်ႇပိူၼ်ႈငၢႆႈ ၵူဝ်တူၵ်းပဵၼ်ယိူဝ်ႈပိူၼ်ႈၶႃႈဢေႃႈ” ၼၢင်းသႅင်မူၼ်း ပၼ်ၾၢင်ႉလၢတ်ႈၼႄၼင်ႇၼႆ။