Thursday, March 28, 2024

TNLA တင်း RCSS/SSA ႁူပ်ႉဢုပ်ႇၵၼ်ပဵၼ်တၢင်းၵၢၼ် ပဵၼ်ပွၵ်ႈၵမ်းႁႅၵ်ႈ

Must read

တပ်ႉသိုၵ်းတဢၢင်း TNLA တင်း တပ်ႉသိုၵ်းတႆး RCSS/SSA ႁူပ်ႉထူပ်းၵၼ် ပဵၼ်ပွၵ်ႈၵမ်းႁႅၵ်ႈ တီႈလႅၼ်လိၼ်တႆး-ၶႄႇ ဝႃႈၼႆ။

ဝၼ်းတီႈ 26/01/2018 ယူႇတီႈၾၢႆႇတပ်ႉသိုၵ်းတဢၢင်း PSLF/TNLA ဢွၵ်ႇလိၵ်ႈပိုၼ်ၽၢဝ်ႇ လွင်ႈတပ်ႉသိုၵ်း တဢၢင်း TNLA တင်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA တႄႇႁူပ်ႉထူပ်းဢုပ်ႇဢူဝ်းၵၼ် တႃႇႁႃ လၢႆးၵႄႈလိတ်ႈပၼ်ႁႃတင်းသွင်ၾၢႆႇတီႈလႅၼ်လိၼ်တႆး-ၶႄႇ တီႈၼိုင်ႈ ဝႃႈၼႆ။

- Subscription -

လွင်ႈႁူပ်ႉထူပ်းၵၼ်ၼႆႉ ယူႇတီႈတၢင်း RCSS/SSA သမ်ႉ ၸဝ်ႈသိုၵ်း ၸၢႆးဢူး ဢွၼ်ႁူဝ် တူဝ်တႅၼ်း 5 ၵေႃႉ။ တၢင်းၾၢႆႇတပ်ႉသိုၵ်းတဢၢင်း TNLA သမ်ႉ တႃႉဢၢႆႈမၢဝ်း၊ တႃႉပၢၼ်းလႃႉ၊ တႃႉၵလူး ဢွၼ်ႁူဝ် 5 ၵေႃႉ ႁူပ်ႉထူပ်း ၵၼ်။ ႁူပ်ႉၵၼ်မိူဝ်ႈဝၼ်းတီႈ 22 လိူၼ်ၵျႅၼ်ႊၼိဝ်ႊရီႊ 2018 ပူၼ်ႉ မႃးၼႆႉ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ၼင်ႇႁိုဝ် တင်းသွင်ၾၢႆႇပေႃးတေႁူမ်ႈၵၼ်လူတ်းယွမ်းပၢင်တိုၵ်းသိုၵ်းသိူဝ်တေႃႇၵၼ်သေ ယူႇတီႈ ၽူႈၼမ်း တင်းသွင်ၾၢႆႇ ပေႃးတေလႆႈႁူပ်ႉ ဢုပ်ႇဢူဝ်းၵၼ်ၵႂႃႇၼၼ်ႉ လိူၼ်တေမႃး တေႁူပ်ႉၵၼ်ထႅင်ႈၵမ်း ၼိုင်ႈ ဝႃႈၼႆ။

တပ်ႉသိုၵ်းTNLA တင်း RCSS/SSA ၼႆႉ တႄႇပဵၼ်ပၢင်တိုၵ်းၵၼ် မိူဝ်ႈပီ 2015 လိူၼ်ၼူဝ်ႊဝိမ်ႊၿိူဝ်ႊ ၶၢဝ်းတၢင်း 2 ပီပၢႆ တိုၵ်ႉႁႃႁူပ်ႉထူပ်းဢုပ်ႇဢူဝ်းၵၼ်ပဵၼ်တၢင်းၵၢၼ်ပွၵ်ႈၼႆႉ ပဵၼ်ပွၵ်ႈၵမ်းႁႅၵ်ႈ ဝႃႈၼႆ။

ၽွင်းၽူႈၼမ်းသႅၼ်းပၢၼ်ၵၢင်ႁူပ်ႉဢုပ်ႇၵၼ်ၼၼ်ႉ သိုၵ်းတဢၢင်း TNLA တင်း တပ်ႉသိုၵ်းတႆး RCSS/SSA လႆႈပဵၼ်ပၢင်တိုၵ်းၵၼ် ၼႂ်းၸႄႈဝဵင်းၵျွၵ်ႉမႄးတင်း ၸႄႈဝဵင်းၼမ်ႉသၼ်ႇ ဢမ်ႇယွမ်း 38 ပွၵ်ႈ ၼႂ်းၶၢဝ်းတၢင်း ဝူင်ႈ လဵဝ်ၵူၺ်း ဝႃႈၼႆ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉ တူဝ်ႈမိူင်း NCA ဝႆႉ။ တပ်ႉသိုၵ်းတဢၢင်း TNLA သမ်ႉ ပဵၼ်လုၵ်ႈၸုမ်း ၸုမ်းဢူၺ်းလီပွတ်းႁွင်ႇၸုမ်းၼိုင်ႈ၊ ပဵၼ်ၸုမ်း ဢမ်ႇပႆႇ ႁပ်ႉတႃႇလူင်းလၢႆးမိုဝ်း NCA ၶိုင်ႁႃလၢႆးတၢင်းမႂ်ႇသေ ႁႂ်ႈဢုပ်ႇဢူဝ်း ၵၢၼ်မိူင်းတင်းလူင်ပွင်ၸိုင်ႈ ၼေႇပျီႇတေႃႇၵႂႃႇ။ လိူဝ်ၼၼ်ႉ တင်းၾၢႆႇလူင်ပွင်ၸိုင်ႈမၢၼ်ႈလႄႈ တပ်ႉသိုၵ်းမၢၼ်ႈၵေႃႈ ဢမ်ႇယွမ်းႁပ်ႉ တပ်ႉသိုၵ်း တဢၢင်း TNLA လူင်း လၢႆးမိုဝ်း NCA သေဢမ်ႇၵႃးယင်းပၢႆ မၵ်းမၼ်ႈဝႆႉဝႃႈ ၶဝ်ပဵၼ်ၸုမ်းၵေႃႇၵၢၼ်ႁၢႆႉ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း