ႁႅင်းၵၢၼ်ယၢၼ်မိူင်း 37 ၵေႃႉ ဢၼ်ထုၵ်ႇၵုမ်းတူဝ် Quarantine ဝႆႉတီႈတႃႈၶီႈလဵၵ်း တဵမ် 14 ဝၼ်းယဝ်ႉၼၼ်ႉ လႆႈသူင်ႇတူဝ် ပွၵ်ႈၶိုၼ်းႁိူၼ်းယေးၽႂ်မၼ်းမူတ်းယဝ်ႉ။

မိူဝ်ႈဝၼ်းတီႈ 14/5/2020 ပူၼ်ႉမႃးၼႆႉ ႁႅင်းၵၢၼ်ယၢၼ်မိူင်း 37 ၵေႃႉ ဢၼ်ၵုမ်းတူဝ်ဝႆႉတီႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼၼ်ႉ တဵမ် 14 ဝၼ်းယဝ်ႉလႄႈ ယူႇတီႈၽူႈမီးပုၼ်ႈၽွၼ်းၶဝ် လႆႈႁၢင်ႈႁႅၼ်းသူင်ႇပွၵ်ႈမိူဝ်း ဢွင်ႈတီႈၽႂ်မၼ်းမူတ်းယဝ်ႉ ဝႃႈၼႆ။

ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း/ ၽူႈတူင်ႉၼိုင်ၸွႆႈထႅမ်ႁႅင်းၵၢၼ် လၢတ်ႈတီႈၽူႈတွႆႇႁွၵ်ႈဝႃႈ “ႁႅင်းၵၢၼ် ဢၼ်ၵိုတ်းဝႆႉတီႈတႃႈၶီႈလဵၵ်းတႄႉ ဢမ်ႇမီးယဝ်ႉ ပွၵ်ႈမိူဝ်းၵၼ်ၸဵမ်မိူဝ်ႈဝၼ်းတီႈ 14 ၼၼ်ႉၶႃႈယဝ်ႉ။ လွင်ႈႁႅင်းၵၢၼ်တေၶဝ်ႈမႃးထႅင်ႈၵေႃႈ ပႆႇလႆႈငိၼ်းဝႃႈႁိုဝ်” ဝႃႈၼႆ။

ထႅင်ႈၾၢႆႇၼိုင်ႈၵေႃႈ လွင်ႈႁႅင်းၵၢၼ် ၵူၼ်းမိူင်းႁူမ်ႈတုမ် ဢၼ်ၶမ်ဝႆႉတၢင်းၾင်ႇမႄႈသၢႆၼၼ်ႉ ယူႇတီႈၸဝ်ႈၼႃႈတီႈထႆး တေၶတ်းၸႂ် သူင်ႇပွၵ်ႈၶဝ်ႈမႃးၶိုၼ်း ဝၢႆးလင် ဝၼ်းတီႈ 31/5/2020 ၼႆႉ ဝႃႈၼႆ။

ၸၢႆးၼုမ်ႇတုၺ်ႈ သိုပ်ႇလၢတ်ႈဝႃႈ “ ပေႃးလင်ၶိူဝ်ႊၾိဝ်ႊ (ႁၢမ်ႈဢွၵ်ႇၼွၵ်ႈႁိူၼ်း ယၢမ်းၵၢင်ၶိုၼ်း) သုတ်းယဝ်ႉၵႂႃႇ ၼႂ်းဝၼ်းတီႈ 31 လိူၼ်ၼႆႉယဝ်ႉ ႁႅင်းၵၢၼ်ဢၼ်ပၼ်ၸိုဝ်ႈသဵင်ဝႆႉတီႈလုမ်းၽွင်းတၢင်မၢၼ်ႈ တီႈမိူင်းထႆးၼၼ်ႉ ၼႂ်းၶၢဝ်းတၢင်း 15 ဝၼ်း တေတေႃႉသူင်ႇပွၵ်ႈၶဝ်ႈမႃးၼႂ်းမိူင်းႁူမ်ႈတုမ်ႁႂ်ႈယဝ်ႉ။ ယဝ်ႉၵေႃႈ ၵူၼ်းမိူင်းႁဝ်း ဢၼ်ၶဝ်ႈၵႂႃႇၶမ်ဝႆႉ တၢင်းၾင်ႇမႄႈသၢႆၼၼ်ႉၵေႃႈ ၼႂ်းၶၢဝ်းတၢင်းၼိုင်ႈဝူင်ႈ တေၶတ်းၸႂ်သူင်ႇပွၵ်ႈၶဝ်ႈမႃးၶိုၼ်း တၢင်းၾင်ႇတႃႈၶီႈလဵၵ်းၼႆႉ” ဝႃႈၼႆ။

တေႃႈလဵဝ် တီႈၶူဝ်ၽၵ်းတူၶဝ်ႈဢွၵ်ႇ လႅၼ်လိၼ်တႆး – ထႆးၼႆႉ ႁၢမ်ႈၵူၼ်းၶဝ်ႈဢွၵ်ႇၵႂႃႇမႃးၵူၺ်း လွင်ႈၶူဝ်းၵုၼ်ႇ တႄႉ တေႃႉသူင်ႇၶဝ်ႈဢွၵ်ႇၵႂႃႇမႃးမိူၼ်ၵဝ်ႇယူႇ ဝႃႈၼႆ။

“လွင်ႈတေပိုတ်ႇၶူဝ် ဢမ်ႇပိုတ်ႇဢၼ်ဝႃႈၼၼ်ႉ ႁဝ်းၶႃႈၵေႃႈ ဢမ်ႇပႆႇလႆႈငိၼ်းၶၢဝ်ႇဝႃႈမႃးၸိူင်ႉႁိုဝ်။ လွင်ႈၼႆႉ မၼ်းယူႇတီႈ တင်းၾၢင်ႇၸဝ်ႈၼႃႈတီႈထႆးၶဝ်ၵူၺ်း။ တၢင်းမိူင်းမၢၼ်ႈႁဝ်းၶႃႈတႄႉ တိုၼ်းၽွမ်ႉတူဝ်ႈတၼ်းပိုတ်ႇယူႇၶႃႈယဝ်ႉ။ ၶႃႈထၢင်ႇတႄႉ လႅပ်ႈဝၢႆးလင် ၶဝ်သူင်ႇႁႅင်းၵၢၼ် ၵူၼ်းမိူင်းဢၼ်ၶမ်ဝႆႉၸွမ်းမႄႈသၢႆ ၸိူဝ်းၼၼ်ႉယဝ်ႉ ၸင်ႇတေၶိုင်ပွင်ၶႃႈယဝ်ႉ လွင်ႈပိုတ်ႇလၢၼ်ႇ ၽၵ်းတူလႅၼ်လိၼ်ၼႆႉ” ၸၢႆးၼုမ်ႇတုၺ်ႈလၢတ်ႈၼႄၼင်ႇၼႆ။

ဢိင်ၼိူဝ် တၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈႁၢဝ်ႈႁႅင်းသေ ယူႇတီႈလူင်ပွင်ၸိုင်ႈမိူင်းထႆး ၸီႉသင်ႇဢိုတ်းၽၵ်းတူ ၸွမ်းလႅၼ်လိၼ် တင်းမူတ်း။ ယွၼ်ႉၼၼ်လႄႈ တၢင်းလႅၼ်လိၼ် တႆး- ထႆး ၸိူဝ်းၼႆႉၵေႃႈ လႆႈပိၵ်ႉဢိုတ်း ဢမ်ႇပၼ်ၵူၼ်း ၶဝ်ႈဢွၵ်ႇၵႂႃႇမႃး တင်ႈတႄႇ မိူဝ်ႈဝၼ်းတီႈ 23/3/2020 ၼၼ်ႉမႃး တေႃႇထိုင်ဝၼ်းမိူဝ်ႈၼႆႉ။

တေႃႈလဵဝ် ၼႂ်းမိူင်းထႆး ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 တင်းမူတ်းမီး 3,034 ၵေႃႉ၊ လူႉတၢႆ 56 ၵေႃႉ၊ ယႃၶႅၼ်း 2,888 ၵေႃႉ၊ တိုၵ်ႉယူတ်းယႃဝႆႉယူႇ 90 ၵေႃႉ။