ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ႁပ်ႉၸုမ်ႈၶူး M.A တီႈၸၼ်ႉၸွမ်ပထုမ်း ထႃးၼီး ၸိုင်ႈထႆး ဝႃႈၼႆ။

ဝၼ်းတီႈ 28/01/2018 ယၢမ်းၵၢင်ၼႂ် 10 မူင်း ထိုင် 5 မူင်း ႁူဝ်ၶမ်ႈ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၶွင်ႇသီႇ ဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ႁပ်ႉၸုမ်ႈၶူး M.A ၾၢႆႇၵၢၼ်မိူင်းလႄႈ ၵၢၼ်ၽွင်းငမ်း တီႈၸၼ်ႉ ၸွမ်ပထုမ်းထႃးၼီး ၸိုင်ႈထႆး မီးပီႈၼွင်ႉတႆး/ ႁႅင်းၵၢၼ်တႆး ၶဝ်ႈႁူမ်ႈ ႁူမ်ၸူမ်းႁပ်ႉတွၼ်ႈ တင်းၼမ်လၢႆ။

ၸဝ်ႈပိုၼ်ၶမ်း ၽူႈၵိူဝ်းၵုမ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လၢတ်ႈတီႈၸုမ်းၶၢဝ်ႇၽူႈ တွႆႇႁွၵ်ႈဝႃႈ “ ၸဝ်ႈႁူဝ်ပဝ်ႈလူင်ၼႆႉ လႆႈၸႂ်ႉၶၢဝ်းယၢမ်းလဵပ်ႈႁဵၼ်း ၸၼ်ႉ M.A မႃး မွၵ်ႈ 3 ပီပၢႆ။ ဢၼ်ၸဝ်ႈလႆႈႁပ်ႉ ၸုမ်ႈၶူးၵႂႃႇသမ်ႉ ပဵၼ်ၾၢႆႇၵၢၼ်မိူင်းလႄႈ ၵၢၼ်ၽွင်းငမ်း။ ၽိုၼ်လိၵ်ႈဢၼ်ၸဝ်ႈႁဝ်းတႅမ်ႈတၢင်ႇ ၼႂ်းၸၼ်ႉၸွမ် သမ်ႉ ပဵၼ်ႁူဝ်ၶေႃႈဢၼ်ဝႃႈ လၢႆးလုၵ်ႉၽိုၼ်ႉ မိူင်းတႆး၊ မိူင်းမၢၼ်ႈ။ ၸဝ်ႈႁူဝ်ပဝ်ႈၼႆႉ တေလႆႈဝႃႈ မၼ်းၸဝ်ႈၶတ်းၸႂ် ႁဵၼ်းတႄႉတႄႉ ထႅင်ႈၾၢႆႇၼိုင်ႈၵေႃႈ ၵၢၼ်မၼ်းၸဝ်ႈၵေႃႈၼမ် လွင်ႈၵၢၼ်ႁဵၼ်းမၼ်းၸဝ်ႈၼႆႉ ဢမ်ႇတွၼ်ႉၶၢတ်ႇ သေပွၵ်ႈ ၼိုင်ႈဝူင်ႈလႂ် 2 ဝၼ်း၊ ၼိုင်ႈလိူၼ်လႂ် 8 ဝၼ်း မၼ်းၸဝ်ႈ ပၼ်ၶၢဝ်းယၢမ်းသေ ၵႂႃႇႁဵၼ်း ဢဝ် တႄႉတႄႉ၊ တေလႆႈဝႃႈ မၼ်းၸဝ်ႈၶတ်းၸႂ်တႄႉတႄႉဝႃႈဝႃႈၼၼ်ႉယဝ်ႉ” ဝႃႈၼႆ။

မိူဝ်ႈဝၼ်းႁပ်ႉၸုမ်ႈၶူး တီႈၸၼ်ႉၸွမ်ပထုမ်းထႃးၼီး ၸိုင်ႈထႆးၼၼ်ႉ မီးပီႈၼွင်ႉတႆး/ ႁႅင်း ၵၢၼ်တႆး ဢွၼ်ၵၼ် ၵႂႃႇႁူမ်ၸူမ်းႁပ်ႉတွၼ်ႈ ၸွမ်သိုၵ်းလူင် ယွတ်ႈသိုၵ်း တင်းၼမ်လၢႆ။ ၽူႈလႆႈႁပ်ႉၸုမ်ႈၶူးတင်းမူတ်း မီး 2,830 ၵေႃႉ ဝႃႈၼႆ။

ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်ႈၸိုင်ႈတႆးၼႆႉ လႆႈၶိုၼ်ႈႁူင်းႁဵၼ်း လူင်ပွင်ၸိုင်ႈမၢၼ်ႈ တီႈၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း လႆႈႁဵၼ်းထိုင် ၸၼ်ႉ 8 ၼႆသေတႃႉ ၵၢၼ်ႁဵၼ်း မိူင်းထႆးတႄႉ မၼ်းၸဝ်ႈႁဵၼ်းပၢႆးပၺ်ၺႃၵၢင်ၶမ်ႈ/ ႁဵၼ်းတီႈၵႆ/ ပႃးၸဵမ် (ၵေႃးသေႃႊၼေႃး) ၵၢၼ်ႁဵၼ်းၼွၵ်ႈ ၶၢဝ်းယၢမ်း ၸိူဝ်းၼႆႉသေ လႆႈႁဵၼ်းမႃးလၢႆၶၵ်ႉလၢႆတွၼ်ႈ၊ တွၼ်ႈ M.A ၼႆႉတႄႉ လႆႈၾင်တူဝ်ၾင် ၸႂ်ႁဵၼ်းဢဝ်ႁိုင် 3 ပီ ဝႃႈၼႆ။