မိူဝ်ႈၼႆႉ ဝၼ်းတီႈ 19/5/2020 ယၢမ်းၵၢင်ဝၼ်း မွၵ်ႈ 11 မူင်းၶိုင်ႈ ႁေႃလူင် မိူင်းၸဝ်ႈၾႃႉပၢင်လွင်း ဢၼ်မီးဢႃယု 100 ပီပၢႆ ဢၼ်ၼႂ်းၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၺႃးလူမ်းၽတ်ႉ ၵူၼ်ႇပင်းပႅတ်ႈတင်းမူတ်း။
ၸၢႆးၶမ်းလူၼ်း ၽူႈတူင်ႉၼိုင်ၼႂ်းၵေႃလိၵ်ႈလၢႆး ၸႄႈဝဵင်းပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ယၢမ်းၵၢင်ဝၼ်း 11 မူင်းၶိုင်ႈၼႆႉ ၾူၼ်လူမ်းၽတ်ႉပဝ်ႇ ဢဝ် ႁေႃလူင်ပၢင်လွင်းႁဝ်းၶႃႈ လင်ဢၼ်ၵိုတ်းၼၼ်ႉ ၵူၼ်ႇပင်းမူတ်းယဝ်ႉၶႃႈ” ဝႃႈၼႆ။
ဢိင်ၼိူဝ်လွင်ႈၼႆႉ ယူႇတီႈၵူၼ်းမိူင်းပၢင်လွင်း ဢွၼ်ၵၼ်သေးလၢႆ လွင်ႈႁေႃ ဢၼ်ၵိုၵ်းမိူင်း လႆႈလူႉၵွႆ ၵူၼ်ႇပင်းပႅတ်ႈၸိူင်ႉၼႆ ဝႃႈၼႆ။
ၸၢႆးၶမ်းလူၼ်း သိုပ်ႇလၢတ်ႈဝႃႈ “ယူႇတီႈႁဝ်းၶႃႈ ၵူၼ်းမိူင်းၵေႃႉၼိုင်ႈသေ သေးလၢႆတႄႉတႄႉၶႃႈဢေႃႈ။ ႁေႃၸဝ်ႈၾႃႉ ဢၼ်ၵိုၵ်းပိုၼ်းႁဝ်းၶႃႈဝႆႉ တီႈဝဵင်းပၢင်လွင်းၼႆႉ။ ႁူဝ်ပဝ်ႈလူင် RCSS ၸဝ်ႈယွတ်ႈသိုၵ်းယၢမ်ႈမႃးထိုင်တီႈၼႆႈသေပၼ်ႁႅင်း ၵူၼ်းပၢင်လွင်းဝႃႈ မၼ်းၸဝ်ႈတေၸွႆႈတႃႇၵုမ်းလုမ်းလႃးၶိုၼ်းၼႆဢေႃႈ။ ႁဝ်းၶႃႈၵူၼ်းမိူင်းယင်းလႆႈ ၶွတ်ႇၽွတ်ႈၶွမ်ႊမတီႇဝႆႉယူႇဢေႃႈၼၼ်ႉ ” ဝႃႈၼႆ။
မိူဝ်ႈပီ 2015 လိူၼ် ၾႅပ်ႊပိဝ်ႊဝရီႊ 18 ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈတႆး ႁွတ်ႈၽႅဝ် ၵႂႃႇတီႈ ဝဵင်းပၢင်လွင်းသေ မွၵ်ႇလၢတ်ႈၵူၼ်းမိူင်း ပၢင်လွင်း 500 ပၢႆ ဝႃႈ တေပဵၼ်ၵဝ်ႉၵၼ်း ၵုမ်းၵေႃႇ ပူၵ်းပွင်ၶိုၼ်း ၊ ၽွင်းၼၼ်ႉ ႁူဝ်ပဝ်ႈ ၼႃႈလိၼ်ၽွင်းငမ်းတူဝ်ၵဝ်ႇ ၸၢဝ်းပဢူဝ်း ၶုၼ်ႇၸၢၼ်ႇလုၼ်ႇ ပဵၼ် ၽူႈပႂ်ႉႁပ်ႉ ၸွမ်သိုၵ်းလူင် ယွတ်ႈသိုၵ်းသေ ဢႅဝ်ႇႁူပ်ႉၵူၼ်းဝၢၼ်ႈ ၵူၼ်ဝၢၼ်ႈၵူၼ်းမိူင်း။
ႁေႃလူင်ပၢင်လွင်းၼႆႉ မီးဢႃယု ႁိုင် 100 ပီပၢႆ ၊ ၸဝ်ႈၾႃႉလူင်ၸဝ်ႈမူဝ်းၵျေႃႇ ပဵၼ်ၸဝ်ႈၾႃႉတူၼ်လိုၼ်းသုတ်း ဢၼ်လႆႈၼင်ႈႁေႃၼႆႉ။
ပေႃးထိုင် ၶၢဝ်းမႆႈမႃး ယူႇတီႈလုၵ်ႈႁဵၼ်းလႄႈ ၶူးသွၼ် ပၢင်သွၼ်လိၵ်ႈတႆး ၶၢဝ်းမႆႈ ဢွၼ်ၵၼ် ၵႂႃႇလုမ်းလႃး ပတ်းၽဵဝ်ႈၸွမ်းၼႂ်းဝၢင်းႁေႃၸိူဝ်းၼၼ်ႉယူႇ ဝႃႈၼႆ။
ၸႄႈဝဵင်းပၢင်လွင်းၼႆႉ ၸဝ်ႈဢႃႇၼႃႇသိုၵ်းမၢၼ်ႈ တတ်းၶိတ်ႇ မၢႆးၵိုၵ်း ၸႄႈဝဵင်းႁူဝ်ပူင်း သီႇသႅင်ႇ သေ မၢႆ ပဵၼ် ၼႃႈလိၼ် ၽွင်းငမ်းတူဝ်ၵဝ်ႇ ၸၢဝ်းပဢူဝ်း ၸွမ်းၼင်ႇ ပိူင်ငဝ်ႈပိုင်းမိူင်း 2008 – ဢၼ်ၸႂ်ႉတိုဝ်း ၽွင်းငမ်းမိူင်းယူႇယၢမ်းလဵဝ်။
