Thursday, March 28, 2024

တီႉလႆႈယႃႈမႃႉ ၼႂ်းၸႄႈဝဵင်းမူႇၸေႊ ၵႃႈၶၼ်ၼပ်ႉႁူဝ်ႁဵင်သႅၼ်

Must read

ၸဝ်ႈၼႃႈတီႈပလိၵ်ႈ တီႉလႆႈယႃႈမဝ်းၵမ်ၼႂ်းၸႄႈဝဵင်းမူႇၸႄႈ ၵႃႈၶၼ်ၼပ်ႉႁူဝ်ႁဵင်သႅၼ်၊ လိူဝ်သေၼၼ်ႉ တီႈလႆႈ ၶိူင်ႈၵွင်ႈၵၢင်ႇထႅင်ႈတင်းၼမ်။

Photo by – cincds/ ယႃႈမဝ်းၵမ် ဢၼ်တီႉလႆႈတီႈမူႇၸေႊ

ဝၼ်းတီႈ 17/5/2020 ယၢမ်းၵၢင်ၼႂ် မွင်ႇၸူဝ်းလႅင်ႇ တင်း မွင်ႇမိၼ်းထႅၵ်ႉ ၶီႇရူတ်ႉၶိူင်ႈမႃးၸွမ်းၵၼ်သေ ထုၵ်ႇပလိၵ်ႈၵူတ်ႇထတ်းတီႉလႆႈ ယႃႈမႃႉ WY တီႈသဵၼ်ႈတၢင်းယထၢႆႉ(ရထိုက်လမ်းဆုံ) ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ တင်းမူတ်း တီႉလႆႈမွၵ်ႈၶၼ်ငိုၼ်း 2,400 သႅၼ်ပျႃး ဝႃႈၼႆ။

- Subscription -

ဢိင်ၼိူဝ်လွင်ႈၼႆႉသေ ယူႇတီႈပလိၵ်ႈ လႆႈၵူတ်ႇထတ်းထဵတ်ႈထၢမ်ၶႃသွင်ၵေႃႉထႅင်ႈသေ လႆႈလူင်းပိုၼ်ႉတီႈ ၵႂႃႇၵူတ်ႇထတ်းႁိူၼ်း မွင်ႇၸူဝ်းလႅင်ႇ တီႉလႆႈယႃႈမႃႉထႅင်ႈ ၶၼ်ငိုၼ်းမွၵ်ႈ 3,600 သႅၼ်ပျႃး ဝႃႈၼႆ။

ယႃႈမႃႉ ဢၼ်တီႉလႆႈတင်းမူတ်းၼႆႉ ႁူမ်ႈၵၼ် တေတူၵ်းမႅၼ်ႈငိုၼ်းယူႇ မွၵ်ႈ 6,000 သႅၼ်ပျႃးၼႆႉ ဝႃႈၼႆ။

မိူဝ်ႈဝၼ်းတီႈ 16/5/2020 ယၢမ်းၵၢင်ၶမ်ႈ မွၵ်ႈ 7 မူင်းၼၼ်ႉၵေႃႈ ၵူတ်ႇထတ်းထူပ်းႁၼ် ၶိူင်ႈၵွင်ႈၵၢင်ႇ ဢၼ်သႂ်ႇဝႆႉၼႂ်းထူင်ၸၢၼ်ႈသေ မူၵ်းလိၼ်ဝႆႉ တီႈႁိမ်းပႃႇႁဵဝ်ႈ ၸႄႈဝဵင်းမူႇၸေႊ။

Photo by – cincds/ ၶိူင်ႈၵွင်ႈၵၢင်ႇ ဢၼ်တီႉလႆႈ တီႈမူႇၸေႊ

ၶိူင်ႈၵွင်ႈၵၢင်ႇ ဢၼ်တီႉလႆႈၼၼ်ႉ မိူၼ်ၼင်ႇ မၢၵ်ႇၵွင်ႈ၊ မႅၵ်ႉၵွင်ႈ၊ မၢၵ်ႇမႅင်းလႄႈ ၵွင်ႈ ၸဵမ်ၸိူဝ်းၼႆႉ။ ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၸႄႈဝဵင်းမူႇၸေႊ တေသွၵ်ႈႁႃတူဝ်ၸဝ်ႈၶွင်မၼ်း မႃးပၼ်ႇတူတ်ႈတၢမ်ႇ ၸွမ်းၼင်ႇ ပၵ်းပိူင်မၢႆမီႈဝၢၼ်ႈမိူင်းမီး ဝႃႈၼႆ။

မိူဝ်ႈပူၼ်ႉမႃး ဝၼ်းတီႈ 15/5/2020 ၼၼ်ႉၵေႃႈ တီႈပွၵ်ႉၸွၼ်ႊၸူဝ်ႇ ၸႄႈဝဵင်းမူႇၸေႊၼၼ်ႉ ၸဝ်ႈၼႃႈတီႈတီႉလႆႈယႃႈမဝ်းၵမ် တႃႇၶၼ်ငိုၼ်းမွၵ်ႈ 18,000 သႅၼ်ပျႃးပၢႆလႄႈ ၶိူင်ႈၵွင်ႈၵၢင်ႇတီႈၸၢဝ်းၶႄႇ 10 ပၢႆ ၸိူဝ်းလၵ်ႉၶဝ်ႈမႃးယူႇသဝ်း ဢမ်ႇပဵၼ်တၢင်းၵၢၼ် ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း