ပၢင်ၵုမ်ၶိုၵ်ႉတွၼ်း သၽႃးၸႄႈမိူင်းတႆး ဢုပ်ႇဢူဝ်းမၵ်းမၼ်ႈ လွင်ႈငိုၼ်းတွင်း Budget ၼႂ်းပီ 2020-2021 ၼႆႉ။
ဝၼ်းတီႈ 18-19/5/2020 ၶၢဝ်းတၢင်း 2 ဝၼ်း ပၢင်ၵုမ်ၶိုၵ်ႉတွၼ်းသၽႃး ၸႄႈမိူင်းတႆး ၸတ်းႁဵတ်းတီႈလုမ်းသၽႃး ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း၊ ဢုပ်ႇဢူဝ်းမၵ်းမၼ်ႈ လွင်ႈငိုၼ်းတွင်း Budget တႃႇပီ 2020-2021 ဝႃႈၼႆ။
ၼၢင်းၸၢၼ်းၸၢၼ်းဢေး ၽူႈတႅၼ်းသၽႃး ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ မၵ်းမၼ်ႈလွင်ႈငိုၼ်းၿတ်ႉၵျႅတ်ႉၼႆႉ မိူဝ်ႈလႂ်ၵေႃႈ မီးပၼ်ႁႃယူႇတႃႇသေႇၼၼ်ႉယဝ်ႉ။ ယွၼ်ႉဢမ်ႇမီႈလွင်ႈၸႅၵ်ႇပၼ်ၵၼ်ၽဵင်ႇပဵင်း။ ၵၢၼ်ၸႅၵ်ႇငိုၼ်းၼႆႉ ၶဝ်တေတူၺ်း ၸွမ်းၸႄႈတွၼ်ႈ၊ ၼႃႈလိၼ်ၽွင်းငမ်း ၸွမ်းၸႄႈဝဵင်း ႁူဝ်ၵူၼ်းၼမ်ဢေႇ ၸိူင်ႉၼႆႉသေၸႅၵ်ႇ။ သင်ပဵၼ်လႆႈတႄႉ ပိူင်ယႂ်ႇမၼ်း လူဝ်ႇတူၺ်းငဝ်းလၢႆးၼႂ်းပိုၼ်ႉတီႈဢၼ်လူဝ်ႇႁဵတ်းၼၼ်ႉသေ ၸႅၵ်ႇပၼ်ၵႂႃႇႁႂ်ႈၽဵင်ႇပဵင်းၵၼ်ၶႃႈဢေႃႈ” ဝႃႈၼႆ။
ပၢင်ၵုမ်သၽႃးၸႄႈမိူင်းတႆး လႆႈမၵ်းမၼ်ႈၵႂႃႇ ငိုၼ်းၵွင်ၵၢင် (Budget) ၵႂႃႇ 339980.336 လၢၼ်ႉပျႃး ပီ 2020-2021 ၼႆႉ မၵ်းမၼ်ႈၵႂႃႇယဝ်ႉတင်းမူတ်းသေ တေသိုပ်ႇတၢင်ႇထိုင်တီႈ သၽႃးမိူင်းႁူမ်ႈတုမ်ထႅင်ႈ ဝႃႈၼႆ။
ၼၢင်းၸၢၼ်းၸၢၼ်းဢေး သိုပ်ႇလၢတ်ႈဝႃႈ “ ငိုၼ်းၿတ်ႉၵျႅတ်ႉၼၼ်ႉ မၵ်းမၼ်ႈၵႂႃႇယဝ်ႉသေ ၶိုၼ်းသိုပ်ႇတၢင်ႇ ထိုင်တီႈသၽႃးမိူင်းႁူမ်ႈတုမ်။ ယူႇတီႈသၽႃးႁူမ်ႈတုမ်သမ်ႉ တေတတ်းသေပၼ်ႁဝ်းၵႃႈႁိုဝ်ၵူၺ်းဢမ်ႇႁူႉ၊ လွင်ႈၼႆႉတႄႉ ပႆႇယိုၼ်ယၼ်လႆႈတႅတ်ႈတေႃး” ဝႃႈၼႆ။
ပၢင်ၵုမ်သၽႃးၸႄႈမိူင်းတႆးပွၵ်ႈၵမ်း 2 ၼႆႉ လႆႈၸတ်းႁဵတ်းမႃး တင်းမူတ်းမီး 18 ပွၵ်ႈ၊ ပၢင်ၵုမ်ၶိုၵ်ႉၶၵ်ႉ(ဢယေးပေႃႇ) သမ်ႉ မီး 3 ပွၵ်ႈ လႄႈ ပၢင်ၵုမ်ၶိုၵ်ႉတွၼ်း(ဢထူး)သမ်ႉ 2 ပွၵ်ႈ ႁူမ်ႈၵၼ် ပဵၼ် 23 ပွၵ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ