ၵူၼ်းဝၢၼ်ႈၸႄႈဝဵင်းလႃႈသဵဝ်ႈ တုၵ်းယွၼ်းၶိုၼ်းတီႈလိၼ် ဢၼ်သိုၵ်းမၢၼ်ႈယိုတ်းဢဝ်

ၵူၼ်းဝၢၼ်ႈၼႃးမူၼ်း ၸႄႈဝဵင်းလႃႈသဵဝ်ႈ တုၵ်းယွၼ်းၶိုၼ်းတီႈလိၼ် ဢၼ်သိုၵ်းလူင်ပွင်ၸိုင်ႈမၢၼ်ႈယိုတ်းဢဝ်၊ ၾၢႆႇသိုၵ်းဢမ်ႇပူတ်းပွႆႇပၼ်လႄႈ လႆႈထဵင်မေႃးၵၼ်။

ဝၼ်းတီႈ 9/5/2020 သိုၵ်းလူင်ပွင်ၸိုင်ႈမၢၼ်ႈ ဢဝ်ၸၢၵ်ႈထႆၶဝ်ႈထႆတီႈလိၼ်သူၼ်ၵူၼ်းဝၢၼ်ႈၼႃးမူၼ်း ဢိူင်ႇၵွင်းၵေး ႁူဝ်ပိုၵ်ႉ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ၵူၼ်းဝၢၼ်ႈႁူမ်ႈၵၼ် ၵႂႃႇႁၢမ်ႈသေ ထိုင်တီႈထဵင်မေႃးၵၼ်၊ ၵူၼ်းဝၢၼ်ႈ တုၵ်းယွၼ်းတီႈလိၼ်ၼၼ်ႉ ႁႂ်ႈပူတ်းပွႆႇပၼ်ၶိုၼ်းၵူၼ်းဝၢၼ်ႈ/ၸဝ်ႈသူၼ်ၶိုၼ်း ဝႃႈၼႆ။

ၸၢႆးသၢင်ႇထုၼ်းလူႇ ၸဝ်ႈသူၼ် ၵူၼ်းဝၢၼ်ႈၼႃးမူၼ်း လၢတ်ႈတီႈၽူႈတွႆႇႁွၵ်ႈဝႃႈ “ တီႈလိၼ်ၸိူဝ်းၼၼ်ႉ ပဵၼ်သူၼ် ၵူၼ်းဝၢၼ်ႈၼႃးမူၼ်းၶႃႈဢေႃႈ။ မိူဝ်ႈသိုၵ်းမၢၼ်ႈ ပႆႇမႃးသိမ်းၼၼ်ႉ ႁဝ်းၶႃႈၽုၵ်ႇမၢၵ်ႇၵဵင်ၶႃႈ။ ထိုင်မႃး ပီ 2004 ၼႆႉ သိုၵ်းမၢၼ်ႈ မႃးယိုတ်းဢဝ်သေ ၽုၵ်ႇတူၼ်ႈမၼ်းယႂ်း (ကြက်ဆူပင်) ၶဝ် တေႃႇထိုင် ပီ 2010 ၼၼ်ႉ။ လင်ၼၼ်ႉမႃး ၶဝ်ၵေႃႈ ဢမ်ႇႁဵတ်းသင် ဢမ်ႇၽုၵ်ႇသင်သေ ထိုင်ပီ 2018-2019 ၼႆႉ ႁဝ်းၶႃႈ ၵူၼ်းဝၢၼ်ႈ ဢွၼ်ၵၼ်ၵႂႃႇႁဵတ်းၶိုၼ်း ၵႂႃႇၽုၵ်ႇၶဝ်ႈၵၢပ်ႇ၊ ငႃး၊ ၶဝ်ႈ ၸိူဝ်းၼႆႉ။ ထိုင်မႃး ပီ 2020 ဝၼ်းတီႈ 9 လိူၼ်ဢေႊပရိူဝ်ႊၼႆႉ ၶဝ်ဢဝ်ၸၢၵ်ႈထႆၶဝ် 3-4 လမ်း ၶဝ်ႈမႃးထႆလိၼ်ၼႂ်းမၼ်းၼၼ်ႉၶႃႈယဝ်ႉ” ဝႃႈၼႆ။

တီႈလိၼ်ၵူၼ်းဝၢၼ်ႈၼႃးမူၼ်း ဢၼ်သိုၵ်းမၢၼ်ႈၶဝ်ႈႁုပ်ႈယိုတ်း လူၺ်ႈဢဝ်ၸၢၵ်ႈထႆၼၼ်ႉ တေမီး 53 ဢေႊၶိူဝ်ႊ ၸဝ်ႈသူၼ်တင်းမူတ်း 12 ၵေႃႉ၊ မီးဝႆႉၾၢႆႇၸဵင်ႇႁွင်ႇဝၼ်းတူၵ်း ဝၢၼ်ႈၼႃးမူၼ်း ဝႃႈၼႆ။

ၸၢႆးသၢင်ႇထုၼ်းလူႇ သိုပ်ႇလၢတ်ႈဝႃႈ “ မိူဝ်ႈဝၼ်းတီႈ 1/4/2020 ၼၼ်ႉ သိုၵ်းမၢၼ်ႈၶဝ် ဢဝ်ၾၢႆႇလူမ်ႇႁူမ်ႈၵူၼ်းသိုၵ်းမႃး ႁဵတ်းသုမ်ႉသေ ပႂ်ႉဝႆႉတီႈလိၼ်ၼၼ်ႉ။ ထိုင်မႃး ဝၼ်းတီႈ 9/4/2020 ၼႆႉ ၶဝ်ၸင်ႇဢဝ်ၸၢၵ်ႈထႆမႃးထုၺ်လိၼ်။ ၵမ်းၼႆႉ ႁဝ်းၶႃႈ ဢွၼ်ၵၼ်ၵႂႃႇႁၢမ်ႈ ။ ၶဝ်ၸႂ်ႉႁဝ်းၶႃႈသႂ်ႇၸိုဝ်ႈၶႃႈဢေႃႈ ၵူၼ်းႁၢမ်ႈမၼ်း။ ထိုင်မႃး ဝၼ်းတီႈ 16/5/2020 တိုၵ်ႉထႆယူႇၶႃႈ။ သိုၵ်းမၢၼ်ႈဝႃႈ တီႈလိၼ်ၼၼ်ႉ ပဵၼ်ၶွင်ၶဝ် သင်ဝႃႈႁဝ်းၶႃႈ ၵႂႃႇသၢၼ်ၶတ်းၼႆ တေထုၵ်ႇဢဝ်လိူင်ႈ ၸိူင်ႉၼၼ် ၸိူင်ႉၼႆ၊ လွင်ႈၼႆႉ လိၵ်ႈၶဝ်သူင်ႇၽႅဝ်တီႈၽူႈၵွၼ်းဢိူင်ႇႁဝ်းၶႃႈသေ ယူႇတီႈၽူႈၵွၼ်းဢိူင်ႇႁဝ်းၶႃႈ လႆႈႁွင်ႉႁဝ်းၶႃႈၵႂႃႇ သပ်းလႅင်းၼႄၶႃႈဢေႃႈ” ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃး ၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵဵဝ်ႇလူၺ်ႈလွင်ႈတီႈလိၼ်ၵူၼ်းမိူင်း ဝၢၼ်ႈၼႃးမူၼ်းႁဝ်းၶႃႈၼႆႉ ၶႃႈႁဝ်းတေတၢင်ႇတုၵ်းယွၼ်းၵႂႃႇၵူႈၸၼ်ႉၸၼ်ႉၶႃႈ။ တီႈလိၼ်ၼႆႉ သိုၵ်းမၢၼ်ႈၶဝ် ထုၵ်ႇလီပူတ်းပွႆႇပၼ်ၵူၼ်းမိူင်းယဝ်ႉ။ မိူဝ်ႈပူၼ်ႉမႃးမွၵ်ႈ 2 ပီၼၼ်ႉၵေႃႈ ၵူၼ်းဝၢၼ်ႈ ပေႃးၶဝ်ႈၵႂႃႇၽုၵ်ႇသွမ်ႈႁဵတ်းၵိၼ်ၼႂ်းမၼ်းယဝ်ႉ။ တေႃႈလဵဝ်သမ်ႉ ၶိုၼ်းမီးလွင်ႈထဵင်မေႃးၵၼ်မႃးၶိုၼ်းၸိူင်ႉၼႆ။ ၵဵဝ်ႇလူၺ်ႈလွင်ႈၼႆႉ ႁဝ်းၶႃႈ တေဢဝ်လိၵ်ႈဢၼ်ၵူၼ်းမိူင်းတၢင်ႇမႃးၼၼ်ႉ သူင်ႇထိုင်တီႈတိူင်းသိုၵ်းလႃႈသဵဝ်ႈ၊ ယဝ်ႉၵေႃႈ တေႁၢင်ႈႁႅၼ်းၶဝ်ႈႁႃဢုပ်ႇငူပ်ႉငီႉၸွမ်းထႅင်ႈ” ဝႃႈၼႆ။

ဢိင်ၼိူဝ်လွင်ႈၼႆႉသေ တႄႇဢဝ် မိူဝ်ႈပီ 2013 မႃးၼႆႉ ယူႇတီႈၸဝ်ႈသူၼ် ဝၢၼ်ႈၼႃးမူၼ်း ႁဵတ်းလိၵ်ႈသေ တၢင်ႇယွၼ်း တီႈလူင်ပွင်ၸိုင်ႈၸႄႈမိူင်းတႆးလႄႈ တီႈၼေႇပျီႇတေႃႇမႃး လၢႆပွၵ်ႈလၢႆးၵမ်းယဝ်ႉ ဝႃႈၼႆ။

“တီႈလိၼ်ၼႆႉ ႁဝ်းၶႃႈ ၶႂ်ႈလႆႈၶိုၼ်းဢေႃႈ ယွၼ်ႉဝႃႈတေႃႈလဵဝ်ၼႆႉ ၵၢၼ်ႁႃၵိၼ်လဵင်ႉတွင်ႉႁဝ်းၶႃႈၼႆႉ ဢမ်ႇၶႂ်ႈမီးသင် ယဝ်ႉ လိူဝ်သေ တိူၵ်ႈလိၼ်ၼႆႉ၊ ႁဝ်းၶႃႈၸႂ်ယႂ်ႇ တႃႇၽုၵ်ႇသွမ်ႈၵိၼ်ၼႂ်းမၼ်းၶႃႈဢေႃႈ။ ၵႃႈသၢႆႈတႅၼ်းၵေႃႈ ႁဝ်းၶႃႈဢမ်ႇၶႂ်ႈလႆႈ၊ ၵႂႃႇပၼ်ႁဝ်းၶႃႈ ႁဵတ်းၵိၼ်ဢွင်ႈတီႈမႂ်ႇၵေႃႈ ႁဝ်းၶႃႈဢမ်ႇၶႂ်ႈလႆႈၶႃႈ။ ႁဝ်းၶႃႈ ၶႂ်ႈလႆႈတီႈလိၼ်ႁဝ်းၶႃႈ ၶိုၼ်းဢေႃႈ တုၵ်းယွၼ်းႁႂ်ႈပွႆႇပၼ်ႁဝ်းၶႃႈ ၵူၼ်းဝၢၼ်ႈၶိုၼ်းသေၵမ်း” လုင်းၸၢႆးသၢင်ႇထုၼ်းလူႇ ဢွၼ်ႁူဝ်ၸဝ်ႈသူၼ်သေ တုၵ်းယွၼ်းလၢတ်ႈၼႄ ၼင်ႇၼႆ။