Friday, March 29, 2024

ၸဝ်ႈသူၼ်ၼႂ်းၼွင်ႁၢႆးယႃႈ မွင်းၶၼ်မၢၵ်ႇၶိူဝ်သူမ်ႈၶိုၼ်ႈလိူၼ်ၼႃႈ

Must read

ၸဝ်ႈသူၼ် ၼႂ်းၼွင်ႁၢႆးယႃႈ မုင်ႈမွင်းဝႃႈ လိူၼ်မေႊၼႆႉသဵင်ႈတႄႉ ၶၼ်မၢၵ်ႇၶိူဝ်သူမ်ႈတေၶိုၼ်ႈ ယူႇဝႃႈၼႆ။

Photo by – SHAN/ မၢၵ်ႇၶိူဝ်သူမ်ႈ ၼႂ်းၼွင်ႁၢႆးယႃႈ

ၼႂ်းလိူၼ်မေႊၼႆႉ ၶၼ်မၢၵ်ႇၶိူဝ်သူမ်ႈ တူၵ်းႁႅင်း ၼိုင်ႈတၢင်( 30 ၸွႆႉ) လႂ် 3,000 ပျႃး တေႃႇထိုင် 3,500 ပျႃးၼႆႉၵူၺ်းလႄႈ ယူႇတီႈ ၸဝ်ႈသူၼ်ၶဝ်မုင်ႈမွင်းဝႆႉဝႃႈ ပေႃးလိူၼ်မေႊၼႆႉသဵင်ႈ ၵႃႈၶၼ်မၢၵ်ႇၶိူဝ်သူမ်ႈတေၶိုၼ်ႈယူႇ၊ ၸဝ်ႈသူၼ်ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ဢွၼ်ၵၼ်မုင်ႈမွင်းဝႆႉ ၼင်ႇၼႆ။

- Subscription -

ဢူးဝိၼ်းၼၢႆႇ ၸဝ်ႈသူၼ်မၢၵ်ႇၶိူဝ်သူမ်ႈ ဝၢၼ်ႈၵေႇလႃႇ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ်ၼႆႉ ၵႃႈၶၼ်မၢၵ်ႇၶိူဝ်သူမ်ႈ တူၵ်းလိူဝ်ႁႅင်း၊ ၵူၺ်းၵႃႈ ၸွမ်းၼင်ႇတူဝ်ထူပ်းတႄႉသင်လူဝ်ႇမႃးတႄႉၼႆ ၶဝ်တေၸွမ်းမႃးသိုဝ်ႉယူႇ၊ သင်ဝႃႈ ၼႂ်းမိုဝ်းၵူၼ်းႁပ်ႉသိုဝ်ႉ(ပွႆးၸႃး)ၶဝ်မီးမၢၵ်ႇၶိူဝ်သူမ်ႈဢေႇမႃးၼႆ ၵႃႈၶၼ်မၢၵ်ႇၶိူဝ်သူမ်ႈၼႆႉ တေၶိုၼ်ႈမႃးၶႃႈယဝ်ႉ။ လၢမ်းၶၢတ်ႈဝႆႉဝႃႈ မွၵ်ႈလိူၼ်ႁႃႈ(လိူၼ်မေႊ)ၼႆႉသဵင်ႈ ၵႃႈၶၼ်မၢၵ်ႇၶိူဝ်သူမ်ႈ ၼိုင်ႈတၢင်ၼႆ တေၶိုၼ်ႈၽႅဝ် 25,000 ထိုင် 30,000 ပျႃးယူႇ။ သင်ဝႃႈ ၵႃႈၶၼ်မၼ်းၶိုၼ်ႈမႃးၵေႃႈ ႁဝ်းၶႃႈၼႆႉ တေလႆႈၶိုၼ်းတိုၼ်းလၢင်းမၼ်းၵႃႈၼႆႉၵူၺ်းၶႃႈယဝ်ႉ” ဝႃႈၼႆ။

မၢၵ်ႇၶိူဝ်သူမ်ႈၼႂ်းၼွင်ၼႆႉ ၵူၼ်းဝၢၼ်ႈၵေႇလႃႇလႄႈ ဝၢၼ်ႈၵျေးၸႃး ၶဝ်ၽုၵ်ႇသွမ်ႈၼမ်။ ၶဝ်ၽုၵ်ႇၶၢဝ်းလဵဝ်ၵၼ်လႄႈ ပေႃးထိုင်ၶၢဝ်းမၢၵ်ႇၼႆ မၢၵ်ႇၵေႃႈဢွၵ်ႇမိူဝ်ႈလဵဝ်ၵၼ် ၊ သမ်ႉပဵၼ်ၶၢဝ်းၵူၼ်းဢမ်ႇႁတ်းမႃးသိုဝ်ႉလႄႈ လႆႈဢဝ်ၵႃႈၶၼ် မၢၵ်ႇၶိူဝ်သူမ်ႈ လူတ်းယွမ်းႁႅင်း ဝႃႈၼႆ။

Photo by – SHAN/ သူၼ်မၢၵ်ႇၶိူဝ်သူမ်ႈ ၼႂ်းၼွင်ႁၢႆးယႃႈ

ဢူးၽူဝ်းလႃႉမိၼ်း ၸဝ်ႈၶွင်ႁူင်းၵႃႉၶၢႆ မၢၵ်ႇၶိူဝ်သူမ်ႈ ၽူဝ်းလႃႉမိၼ်း လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၼွင်ၼႆႉ မိူဝ်ႈၽွင်း မၢၵ်ႇၶိူဝ်သူမ်ႈ ဢွၵ်ႇၼမ်ၼႆႉ ၵူၼ်းမႃးသိုဝ်ႉဢမ်ႇမီး၊ မိူဝ်ႈလိူၼ်ပူၼ်ႉမႃးၼၼ်ႉ ၸဝ်ႈသူၼ် ႁူပ်ႉလွင်ႈ ယၢပ်ႇၽိုတ်ႇ ၵၼ်ၶႃႈ ဢေႃႈ။ ယွၼ်ႉတၢင်းပဵၼ်ၶူဝ်ႊဝိတ်ႉၼႆႉသေ မိူဝ်ႈလိူၼ်ပူၼ်ႉ မၢၵ်ႇၶိူဝ်သူမ်ႈ ၼိုင်ႈၸွႆႉလႂ် 200 ပျႃးၵူၺ်း။ ၼႂ်းလိူၼ်ၼႆႉတႄႉ ထိုင် 300 ပျႃးယဝ်ႉ” ဝႃႈၼႆ။

တႄႇဢဝ် လင်ဝၼ်းတီႈ 15/5/2020 ၼႆႉၵႂႃႇ ၶၼ်မၢၵ်ႇၶိူဝ်သူမ်ႈတေၶိုၼ်ႈမႃးၶိုၼ်းယူႇၼႆ ယူႇတီႈၸဝ်ႈသူၼ်ၶဝ်တႄႉ ၼပ်ႉသၢင်ႈလတ်ႈၼႄၼင်ႇၼႆ။

ဢူးဝိၼ်းၼၢႆႇ သိုပ်ႇလၢတ်ႈဝႃႈ “ လင်ဝၼ်းတီႈ 15 ၼႆႉၵႂႃႇ ၶၼ်မၢၵ်ႇၶိူဝ်သူမ်ႈတေၶိုၼ်ႈမႃးယဝ်ႉ။ ဝၢႆးလင် ဝၼ်းတီႈ 20 ၵႂႃႇတႄႉ တေလႆႈထိုင် 15,000 ထိုင် 20,000 ပျႃးယူႇ လၢမ်းၶၢတ်ႈဝႆႉၼင်ႇၼႆ။ ယွၼ်ႉဝႃႈ မၢၵ်ႇၶိူဝ်သူမ်ႈၼႆႉ ဢမ်ႇပေႃးၶႂ်ႈမီးယဝ်ႉ။ မၢင်သူၼ် ပေႃးဢမ်ႇ မီးယဝ်ႉ”ဝႃႈၼႆ။

တေႃႈလဵဝ်ၼႆႉ ၶၼ်မၢၵ်ႇၶိူဝ်သူမ်ႈ ၼႂ်းၼွင် ၼိုင်ႈတၢင်လႂ် မွၵ်ႈ 10,000 ပျႃး။ ပေႃးဝႃႈပဵၼ်ၵူၼ်းၵႃႉၸွမ်းၼႂ်းဝဵင်း ၶၢႆပဵၼ်ၸွႆႉ မၼ်းၸိုင် ၼိုင်ႈၸွႆႉလႂ် 500 ပျႃးယဝ်ႉ ဝႃႈၼႆ။

ယွၼ်ႉၽေး တၢင်းပဵၼ်ၶူဝ်ႊဝိတ်ႉ – 19 ၼႆႉသေ ယူႇတီႈလူင်ပွင်ၸိုင်ႈ ပိုၼ်ၽၢဝ်ႇ ႁၢမ်ႈၵူၼ်းၶွၼ်ႈတုမ်ၵၼ်၊ ႁၢမ်ႈဢွၵ်ႇၼွၵ်ႈႁိူၼ်း၊ ႁၢမ်ႈၵႂႃႇဢႅဝ်ႇယဵမ်ႈ တီႈၵူၼ်းၼမ်လႄႈ ႁၢမ်ႈၵႂႃႇဝၢႆႈၽြႃးတီႈၵူၼ်းၵိုၼ်း ၸိူဝ်းၼၼ်ႉ တေႃႇထိုင် ဝၼ်းတီႈ 15/5/2020 ၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း