ၵူၼ်းလၢင်းၼမ်ႉမေႃႇ တီႈလႃႈသဵဝ်ႈ ဢမ်ႇလႆႈလူမ်း ဢွၵ်ႊသီႊၵျိၼ်ႊ ထူၺ်ႈၸႂ်ဢမ်ႇထိုင်ၵၼ်သေလူႉတၢႆ 3 ၵေႃႉ။
မိူဝ်ႈဝၼ်းတီႈ 9/5/2020 ၼၼ်ႉ ၵူၼ်းၶုတ်းၼမ်ႉမေႃႇ 5 ၵေႃႉ တီႈပွၵ်ႉ 12 ဢွင်ႇသဵတ်ႉၸႃႇ ႁိမ်းဝတ်ႉတႃႈပုင်ႇ (သဵၼ်ႈတၢင်းၵႂႃႇ တၢင်းဝၢၼ်ႈမၢၵ်ႇၶီႈၼူ) ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ လူင်းလၢင်းၼမ်ႉမေႃႇၵဝ်ႇသေ ဢမ်ႇလႆႈလူမ်းဢွၵ်ႊသီႊၵျိၼ်ႊ၊ ထူၺ်ႈၸႂ်ဢမ်ထိုင်ၵၼ်သေ လႆႈလူႉတၢႆၵႂႃႇ ၼႂ်းၼမ်ႉမေႃႇၼၼ်ႉ 3 ၵေႃႉ၊ တၼ်းလွတ်ႈ 2 ၵေႃႉ ဝႃႈၼႆ။
လုင်းသၢင်ႇၸၢႆး ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈယဝ်ႉ။ ၶဝ်ၶုတ်းလၢင်းၼမ်ႉမေႃႇ။ ဢဝ်ၵူၼ်းၶုတ်းမၼ်းၼၼ်ႉ လူႉတၢႆ 3 ၵေႃႉ။ ယွၼ်ႉၶၢတ်ႇဢွၵ်ႊသီႊၵျိၼ်ႊၼၼ်ႉၶႃႈယဝ်ႉ။ တႃႇ 2 ၵေႃႉတႄႉ တၼ်းလွတ်ႈယူႇ။ ယွၼ်ႉၼမ်ႉမေႃႇၼၼ်ႉ မီးၼိူဝ်ၵွင်းလွႆဢိတ်းၼိုင်ႈလႄႈ သမ်ႉလူဝ်ႇၶုတ်းလူင်းလိုၵ်ႉႁဵတ်းၼၼ် ၶႃႈယဝ်ႉ” ဝႃႈၼႆ။
ၼမ်ႉမေႃႇၼၼ်ႉပဵၼ်ၼမ်ႉမေႃႇၵဝ်ႇ မီးၼႂ်းဝၢင်းႁိူၼ်းလုင်းၸၢႆးလဵၵ်ႉ ပွၵ်ႉ 12 ပွၵ်ႉ ဢွင်ႇသဵတ်ႉၸႃႇ ဝဵင်းလႃႈသဵဝ်ႈ ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းၸွႆႈထႅမ် ၾၢႆႇတူင်ႇဝူင်းၵူၼ်း၊ ၾၢႆႇၶႄၾႆး ၽူႈမီးပုၼ်ႈၽွၼ်းၶဝ် လႆႈမႃးၸွႆႈၵၼ်ဢဝ်ၶၢပ်ႈ တူဝ်တၢႆဢွၵ်ႇသေ တေႃႉသူင်ႇၵႂႃႇၸူးတီႈႁူင်းယႃလႃႈသဵဝ်ႈ ၸဵမ်ၵူၼ်းတၢႆ လွတ်ႈတၢႆ တင်းမူတ်း ဝႃႈၼႆ။
မိူၼ်ၼႆၼင်ႇၵဝ်ႇ ပူၼ်ႉမႃး မိူဝ်ႈဝၼ်းတီႈ 23/4/2020 ယၢမ်းႁူဝ်ၶမ်ႈ မွၵ်ႈ 6 မူင်းပၢႆၼၼ်ႉၵေႃႈ လုင်းၸၢႆးလႃႉ ဝၢၼ်ႈသွင်ၵႄး ၸႄႈဝဵင်းသီႇပေႃႉ ၶုတ်းႁွင်ႈထၢင်မႂ်ႇ တႃႇႁိူၼ်းမၼ်းၸၢႆး။ လုၵ်ႈၸၢႆး လုင်းလႃႉ 2 ၵေႃႉပီႈၼွင်ႉလႄႈ ၵူၼ်းၸွႆႈၶဝ် ၵေႃႉၼိုင်ႈ မႃးၶုတ်းၸွႆႈလုင်းလႃႉ။ ၶုတ်းၸမ်ထၢင် ၽၢႆႈၵဝ်ႇႁႅင်းၼႃႇလႄႈ ထၢင်ၽၢႆႈၵဝ်ႇ ၵူၼ်ႇသႂ်ႇၶဝ် 4 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ