ဝူင်ႈၼႆႉ ၸဝ်ႈၼႃႈတီႈ ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး ဢဝ်ႁႅင်းၵၢၼ်မိူင်းႁူမ်ႈတုမ်မၢၼ်ႈ ဢၼ်ၵႂႃႇႁဵတ်းၵၢၼ်တၢင်းမိူင်းၶႄႇ မႃး ၼၼ်ႉ မွပ်ႈပၼ်လူင်ပွင်ၸိုင်မိူင်းတႆး ႁိမ်းႁဵင်ၵေႃႉ- သူင်ႇပွၵ်ႈတၢင်းမိူင်းယွင်း၊ တၢင်းၵဵင်းတုင်သေ ပွၵ်ႈၶိုၼ်းတၢင်းဝဵင်းလူင်တူၼ်ႈ တီးယဝ်ႉ တေသူင်ႇပွၵ်ႈၶိုၼ်းဝၢၼ်ႈၽႂ်ဝဵင်းမၼ်း။
တင်ႈတႄႇ ဝၼ်းတီႈ 8 မႃး တေႃႇထိုင်ဝၼ်းမိူဝ်ႈၼႆႉ 14/5/2020 ၸဝ်ႈၼႃႈတီႈမိူင်းလႃး သူင်ႇႁႅင်းၵၢၼ်မၢၼ်ႈ 916 ၵေႃႉ ၸိူဝ်းၵႂႃႇ ႁဵတ်း ၵၢၼ်မိူင်းၶႄႇ ၺႃးသူင်ႇတူဝ် ပွၵ်ႈမႃးၸိူဝ်းၼၼ်ႉ ဢဝ်မွပ်ႈတူဝ် ပၼ်လူင်ပွင်ၸိုင်ႈမိူင်းတႆး။ ဝၼ်းတီႈ 10/5/2020 ႁႅင်း ၵၢၼ်မိူင်းႁူမ်ႈ တုမ် ဢၼ်လႆႈၵုမ်းတူဝ် ပႂ်ႉတူၺ်း Quarantine တဵမ် 21 ဝၼ်း တီႈဝဵင်းမိူင်းလႃးယဝ်ႉ ဢဝ်မွပ်ႈပၼ်လူင်ပွင်ၸိုင်ႈမိူင်းတႆး ၸဝ်ႈၼႃႈ တီႈဝဵင်းၵဵင်းတုင် ႁူဝ်ၵူၼ်း 241 ၵေႃႉ။ ဝၼ်းတီႈ 8/5/2020 ၼၼ်ႉသမ်ႉ လုၵ်ႉတၢင်း မိူင်းလႃး သူင်ႇတၢင်းမိူင်းယူႉ – မိူင်းယွင်း 665 ၵေႃႉ၊ ယၢမ်းလဵဝ်တႄႉ သူင်ႇပွၵ်ႈမိူဝ်းတၢင်း ဝဵင်းတူၼ်ႈတီးမူတ်းယဝ်ႉ ဝႃႈၼႆ။
ၸၢႆးႁွမ်ၼွႆႉ ၶွမ်ႊမတီႊႁႃငိုၼ်းၵွင်ၵၢင်လႄႈ ႁႄႉၵင်ႈတၢင်းပဵၼ်ၶူဝ်ႊဝိတ်ႉ ၸႄႈတွၼ်ႈၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝၼ်း သွင်ဝၼ်းၼႆႉတႄႉ ပႆႇႁၼ်ႁႅင်းၵၢၼ်ပွၵ်ႈၶဝ်ႈမႃးတၢင်းၵဵင်းတုင်ၶႃႈ။ မိူဝ်ႈဝၼ်းတီႈ 10 ၼၼ်ႉတႄႉ ပွၵ်ႈၶဝ်ႈမႃး 241 ၵေႃႉ။ တေႃႈလဵဝ် တၢင်းမိူင်းလႃး မိူင်းယူႉ မိူင်းယွင်းၵေႃႈ ပႆႇပွင်ႇၶၢဝ်ႇလၢတ်ႈသင်မႃးၶႃႈ၊ လွင်ႈႁႅင်းၵၢၼ် တေပွၵ်ႈမႃးၼႆႉ ပေႃးပွင်ႇၶၢဝ်ႇလၢတ်ႈမႃးၼႆ ႁဝ်း ၶႃႈတေႁၢင်ႈႁႅၼ်းပႂ်ႉထႃႈဝႆႉယူႇၶႃႈ” ဝႃႈၼႆ။
ၾၢႆႇၼိုင်ႈတၢင်းၼိုင်ႈ တီႈၸႄႈဝဵင်းလၢဝ်ႇၵၢႆး ၼႃႈလိၼ်ၽွင်းငဝ်းတူဝ်ၵဝ်ႇ ၵဝ်ႈၵၢင်ႉၵေႃႈ လႆႈႁပ်ႉ ႁႅင်းၵၢၼ်ပႂ်ႉတူၺ်း Quarantine တဵမ် 21 ဝၼ်း ႁူဝ်ၵူၼ်း 300 ပၢႆ၊ ၼၼ်ႉၵေႃႈ လႆႈတေႃႉသူင်ႇပွၵ်ႈတၢင်းဝဵင်းလႃႈသဵဝ်ႈ မူတ်းယဝ်ႉ။ လိူဝ်သေၼၼ်ႉ ယူႇတီႈ ၽူႈမီးပုၼ်ႈၽွၼ်း တီႈဝဵင်းလၢဝ်ႇၵၢႆး တေဢမ်ႇသိုပ်ႇႁပ်ႉပႂ်ႉတူၺ်း Quarantine ထႅင်ႈယဝ်ႉ ပေႃးပွၵ်ႈၶဝ်ႈမႃးၵေႃႈ တေတေႃႉသူင်ႇ ၵႂႃႇတၢင်းလႃႈသဵဝ်ႈ ၵမ်း လဵဝ် ဝႃႈၼႆ။
ၽူႈမီးပုၼ်ႈၽွၼ်းတီႈဝဵင်းလၢဝ်ႇၵၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 11 ႁႅင်းၵၢၼ်ဢၼ်လႆႈၵုမ်းတူဝ်ဝႆႉ Quarantine တဵမ် 21 ဝၼ်းယဝ်ႉၼၼ်ႉ ႁဝ်းၶႃႈ လႆႈတေႃႉသူင်ႇပွၵ်ႈတၢင်းလႃႈသဵဝ်ႈယဝ်ႉ။ ဢၼ်တေပွၵ်ႈတၢင်းမိူင်းၶႄႇ မႃးထႅင်ႈၼၼ်ႉ ႁဝ်းၶႃႈ တေႁပ်ႉဝႆႉၸူဝ်ႈၶၢဝ်းသေ တေတေႃႉသူင်ႇပွၵ်ႈၵမ်းလဵဝ်ၶႃႈယဝ်ႉ တေဢမ်ႇဝႆႉပႂ်ႉတူၺ်းမိူၼ်မိူဝ်ႈၵူႈပွၵ်ႈယဝ်ႉ။ ပေႃးပႂ်ႉတူၺ်း 21 ဝၼ်းၼႆ တွၼ်ႈတႃႇႁဝ်းၶႃႈၼႆႉ မၼ်းယၢပ်ႇၽိုတ်ႇၶႃႈဢေႃႈ” ဝႃႈၼႆ။
မိူဝ်ႈဝၼ်းတီႈ 10/5/2020 ၼၼ်ႉ ႁႅင်းၵၢၼ်ပွၵ်ႈၶဝ်ႈမႃးတၢင်းဝဵင်းၼမ်ႉၽႃႈ(သျိၼ်းသူၺ်ႇႁေႃႇ) ႁူဝ်ၵူၼ်း 400 ပၢႆ၊ လိူဝ်ၼၼ်ႉ ဢၼ်ၶဝ်ႈမႃးတၢင်းယၼ်လူင်ၵဵင်း (ရန်လုံကျိုင်း) ထႅင်ႈ 100 ပၢႆ ၼၼ်ႉၵေႃႈ ယူႇတီႈၽူႈမီးပုၼ်ႈၽွၼ်း ဝဵင်းလၢဝ်ႇၵၢႆး ႁပ်ႉဝႆႉ ၶၢဝ်းတၢင်း 2 ဝၼ်းသေ သူင်ႇပွၵ်ႈတၢင်းလႃႈသဵဝ်ႈၵမ်းလဵဝ်-ၼႆယဝ်ႉ။
