ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၾူၼ်ယႂ်ႇလူမ်းလူင် ၽတ်ႉပဝ်ႇႁၢဝ်ႈႁႅင်း တူၼ်ႈမႆႉ တူၼ်ႈတွၵ်ႇ လႄႈ လၵ်းၾႆးႁၵ်းပင်း၊ သၢႆၾႆးၶၢတ်ႇတူၵ်း ၼူင်ႇပၢႆႉ ၾႆးၾႃႉၵေႃႈမွတ်ႇ ။
ဝၼ်းတီႈ 13/5/2020 ယၢမ်းႁူဝ်ၶမ်ႈ မွၵ်ႈ 5 မူင်းပၢႆၼၼ်ႉ ၼႂ်းဝဵင်းတႃႈၶီႈလဵၵ်း ၼၼ်ႉ ၺႃး ၾူၼ်ယႂ်ႇလူမ်းလူင် ၽတ်ႉပဝ်ႇ မၢၵ်ႇႁဵပ်း တူၵ်းႁၢဝ်ႈႁႅင်း တူၼ်ႈမႆႉယႂ်ႇ၊ ၵိင်ႇမႆႉ၊ သဝ်လၵ်းၾႆး၊ သၢႆၾႆးၾႃႉၶၢတ်ႇ၊ ဢၼ်ၺႃးၼမ်လိူဝ်ပိူၼ်ႈတေႉ တၢင်းၵႂႃႇ ဝိႁၢရ် ထၢတ်ႈပုင်ႇလူဝ်ႉ၊ တၢင်းၵႂႃႇပႃႇသၵ်း ႁွင်ႈလိုၵ်ႉ သၢႆဝဵင်း ၸွမ်းၵၢင်ဝဵင်း ၸိူဝ်းၼႆႉ ဝႃႈၼႆ။
ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မိူဝ်ႈဝႃးၼႆႉ ၾူၼ်ယႂ်ႇလူမ်းလူင်မႃးႁၢဝ်ႈႁႅင်း ပႃးတင်းမၢၵ်ႇႁဵပ်းသေ၊ တၢင်းသၢႆဝၢၼ်ႈၼွၵ်ႈတႄႉ ဢမ်ႇႁၼ်တူၵ်း။ ၵမ်ႈၼမ် ပဵၼ်တၢင်းၼႂ်းဝဵင်းတႃႈၶီႈလဵၵ်းၶႃႈယဝ်ႉ။ သဝ်ၾႆး တူၼ်ႈမႆႉ ၸိူဝ်းၼႆႉၵေႃႈ ႁၵ်းပိၼ်ႈလူမ်ႉ တင်းၼမ်ၶႃႈ။ ၵမ်ႈၼမ် တေပဵၼ်သဵၼ်ႈတၢင်းၵႂႃႇထၢတ်ႈပုင်ႇလူဝ်ႉၼၼ်ႉၶႃႈဢေႃႈ” ဝႃႈၼႆ။
ၾူၼ်ယႂ်ႇလူမ်းလူင် ၽတ်ႉပဝ်ႇ ၼႂ်းၸႄႈဝဵင်းတႃႈၶီႈလဵၵ်း ပွၵ်ႈၼႆႉ တၢင်းႁိုင်တေမီးမွၵ်ႈ 1 ၸူဝ်ႈမူင်း။ လူမ်းလုၵ်ႉၼႃႈတၢင်းႁွင်ႇ ၽတ်ႉမႃး ။ တၢင်း(လၢႆႇၼႃႈ) မိူင်းထႆး ဝဵင်းမႄႈသၢႆၵေႃႈ ၺႃးၾူၼ်ယႂ်ႇလူမ်းလူင်မိူၼ်ၵၼ်။
“လွင်ႈၵူၼ်းမၢတ်ႇၸဵပ်းတႄႉ ဢမ်ႇမီးၶႃႈ။ ၾူၼ်ၼႆႉတႄႉ တူၵ်းႁႅင်းပေႇၸႂ်ၶႃႈယဝ်ႉ၊ လူမ်းၵေႃႈၽတ်ႉႁၢဝ်ႈႁႅင်း၊ မၢၵ်ႇႁဵပ်းၵေႃႈတူၵ်းဢေႃႈ ၵူၺ်းၵႃႈ ဢမ်ႇပေႃးလုၵ်ႈယႂ်ႇၶႃႈ။ ၾႆးၾႃႉတႄႉ လႆႈမွတ်ႇၵႂႃႇတၢင်းႁိုင် တေမီးမွၵ်ႈ 3 ၸူဝ်ႈမူင်းပၢႆၼႆႉ” ၵူၼ်းတႃႈၶီႈလဵၵ်း လၢႆလၢႆၵေႃႉ လၢတ်ႈၼႄၼင်ၼႆ။
လိူဝ်ၼၼ်ႉ ၼႂ်းဝူင်ႈၼႆႉၵူၺ်း ၼႂ်းၸိုင်ႈတႆးပွတ်းၸၢၼ်း မိူၼ်ၼင်ႇ ၼမ်ႉၸၢင်၊ ၶူဝ်လမ်၊ မွၵ်ႇမႆႇ ၸိူဝ်းၼႆႉၵေႃႈ ၺႃးၾူၼ်ယႂ်ႇလူမ်းႁႅင်း ၽတ်ႉပဝ်ႇဢဝ် လင်ၶႃးႁိူၼ်း ၵွၵ်းပိဝ် လူႉၵွႆၸွမ်းတင်းၼမ်။ တၢင်းၸိုင်ႈတႆးပွတ်းႁွင်ႇၵေႃႈ ပွတ်းသီႇပေႃႉ ၵျွၵ်ႉမႄး ၸိူဝ်းၼၼ်ႉၵေႃႈ ထူပ်းၽေးၾူၼ်ယႂ်ႇလူမ်းလူင်ၼင်ႇၵဝ်ႇ ဝႃႈၼႆ။
မိူဝ်ႈဝႃး ဝၼ်းတီႈ 13/5/2020 ယၢမ်းၵၢင်ၼႂ် ၾူၼ်ယႂ်ႇလူမ်းလူင် ၽတ်ႉပဝ်ႇ ဢဝ်လင်ၶႃးမုင်းႁိူၼ်း လႄႈ ၽႃႁိူၼ်း ၵူၼ်းမိူင်း ၼႂ်းထုင်ႉလွႆႁူဝ်သိူဝ် ၸႄႈဝဵင်းမၢၼ်ႈၸေႊ ၸႄႈမိူင်းၶၢင်၊ ၼၼ်ႉၵေႃႈလႆႈလူႉၵွႆတင်းၼမ်လၢႆ ဝႃႈၼႆ။
