ဝၼ်းတီႈ 9 ပူၼ်ႉမႃးၼႆႉ သိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်းၾၢႆလဵဝ် တင်ႈတႄႇ လိူၼ်မေႊ 10 – တေႃႇ ဢေႃႊ ၵတ်သ်ႉ 31 ၶၢဝ်းတၢင်း သီႇလိူၼ်သေတႃႉ တိုၵ်ႉထႅမ်ႁႅင်းသိုၵ်းတူင်ႉၼိုင်ယူႇလႄႈ မိူဝ်ႈဝႃးၼႆႉယင်းလႆႈပဵၼ် ပၢင်တိုၵ်းၵၼ်တင်း သိုၵ်းတဢၢင်း TNLA ယူႇ။

ႁွင်ႈၵၢၼ်ၶၢဝ်ႇ သိုၵ်း TNLA ပိုၼ်ၽၢဝ်ႇ မိူဝ်ႈဝၼ်းတီႈ 13/5/2020 ယၢမ်းဝၢႆးဝၼ်း မွၵ်ႈ 1 မူင်းၼၼ်ႉ ယူႇတီႈတပ်ႉ သိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ပဵၼ်ပၢင်တိုၵ်းၵၼ် ၼႂ်းၵႄႈဝၢၼ်ႈ ၵျွင်းၶမ်းလႄႈ ဝၢၼ်ႈႁူဝ်ဝိတ်ႉ (ဟိုဝိတ်ကျေးရွာ) ၸႄႈဝဵင်းမိူင်းၵုတ်ႈ 3 ပွၵ်ႈ။

ၸဝ်ႈသိုၵ်းတႃးဢၢႆႈၵျေႃႇ ၽူႈၶၢၼ်ႇပၢၵ်ႇ TNLA လၢတ်ႈဝႃႈ – “သိုၵ်းမၢၼ်ႈၼႆႉ ၶဝ်ပိုၼ်ၽၢဝ်ႇမဵဝ်းၼိုင်ႈ ၶဝ်ႈႁဵတ်းမဵဝ်းၼိုင်ႈ။ ၶဝ်ႈပိုၼ်ၽၢဝ်ႇဝႃႈ ၵိုတ်းတိုၵ်းၼႆသေတႃႉ ၶဝ်ယင်းတိုၵ်ႉႁႅၼ်းသိုၵ်းလေႃႇတိုၵ်းယူႇ။ ဝၢႆးလင်ၶဝ်ပိုၼ်ၽၢဝ်ႇယဝ်ႉ ၼႂ်းၸႄႈဝဵင်းမိူင်းၵုတ်ႈ မိူၼ်ၼင်ႇတၢင်းဝၢၼ်ႈ ၵျွင်းၶမ်းလႄႈ ဝၢၼ်ႈႁူဝ်ဝိတ်ႉ ယင်းလႆႈမီးပၢင်တိုၵ်းၵၼ်တင်းႁဝ်းၶႃႈယူႇ။ ပေႃးပိုၼ်ၽၢဝ်ႇၵေႃႈလူဝ်ႇၵိုတ်းၵၢၼ်သူင်ႇႁႅင်းသိုၵ်းဢေႃႈ။ ပေႃးၵိုတ်းတိုၵ်းၼႆ လူဝ်ၵိုတ်းတင်းမူတ်း ၵွၼ်ႇ။ ယၢမ်းလဵဝ် ၶေႃႈပိုၼ်ၽၢဝ်ႇၶဝ်ၼၼ်ႉ မၼ်းမိူၼ်ဝႃႈ – ၵိုတ်းတေႃႇၸုမ်း႞သေ သမ်ႉၵႂႃႇသႂ်ႇႁႅင်းၵႂၢတ်ႇလၢင်ႉပိုတ်းယိုဝ်းထႅင်ႈၸုမ်းၼိုင်ႈ ၵူၺ်း” – ဝႃႈၼႆ။

ၼႂ်းလိူၼ်မေႊၼႆႉ သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်မႃး 3 ပွၵ်ႈ။ တင်ႈဢဝ်လိူၼ် ၾႅပ်ႊၿိဝ်ႊရီႊမႃး တေႃႇယၢမ်းလဵဝ်တႄႉ ဝူင်ႈၵၢင်သွင်ၸုမ်းပဵၼ်ပၢင်တိုၵ်းၵၼ် ဢမ်ႇယွမ်း 12 ပွၵ်ႈ ယဝ်ႉဝႃႈၼႆ။

ဝၼ်းတီႈ 9 ပူၼ်ႉမႃးၼႆႉ သိုၵ်းလူင်ပွင်ၸိုင်ႈမၢၼ်ႈ ဢွၵ်ႇၶေႃႈပိုၼ်ၽၢဝ်ႇ 8 ၶေႃႈ။ ဢိင်ဢဝ်ၶေႃႈၵႂၢမ်း ၽူႈၼမ်းၼႂ်းလူင် ၸၢတ်ႈၸိုင်ႈလုမ်ႈၾႃႉ တိုၵ်းသူၼ်းသေ ၾၢႆႇသိုၵ်းမၢၼ်ႈၵေႃႈ တေ တိုၵ်းတေႃး ၸိူဝ်ႉမႅင်း ၶူဝ်ႊဝိတ်ႉ 19 ၵႂႃႇ ၊ ၼႂ်းၶၢဝ်းတၢင်း ၽဵဝ်ႈလၢင်ႉ ၸိူဝ်ႉမႅင်း ၶူဝ်ႊဝိတ်ႉ 19 ၼၼ်ႉ ၼွၵ်ႈသေ ၼႃႈလိၼ်ဢၼ်တိုၵ်ႉမီးၵၢၼ်ၵေႃႇၵၢၼ်ႁၢႆႉ ယူတီႈသိုၵ်းမၢၼ်ႈ သေ တေၵိုတ်းတိုၵ်း ၵႂႃႇၶၢဝ်းတၢင်း 4 လိူၼ်၊ တေႃႇလိူၼ်ဢေႃႊၵတ်သ်ႉ သဵင်ႈ။ ၼႂ်းၶေႃႈပိုၼ်ၽၢဝ်ႇၼၼ်ႉ ယင်းၾၢင်ႉတိူၼ် ပႃး ၸုမ်းၵိုတ်းတိုၵ်း NCA ႁႂ်ႈႁဵတ်းၸွမ်း ပိူင်သိုၵ်းမၢၼ်ႈ 6 ၶေႃႈ – မိူၼ်ၼင်ႇယႃႇဝၵ်ႉဢဝ်တိုဝ်ႉတၢင်းၵိုတ်းတိုၵ်းသေ ဢဝ်ၼမ်ႉတွၼ်းၼိူဝ်ၶေႃႈၵိၼ်ၵႅꧣ်ႇ၊ ယႃႁဵတ်းႁႂ်ႈၵူၼ်းမိူင်းလႆႈၼၵ်းၼႃပႃးပၢၼ်ႈ၊ တေလႆႈၸွမ်း ပၵ်းပိူင် ဢၼ်ဝၢၼ်ႈမိူင်း ပူင်တမ်းဝႆႉဝႃႈၼႆ ။