ၵူၼ်းဝၢၼ်ႈ ၸၢဝ်းတႆး ထုင်ႉလွႆႁူဝ်သိူဝ် လၢႆလၢႆဝၢၼ်ႈ တင်းၾင်ႇမိူင်းတႆး လႄႈ ဢၼ်တူၵ်းၶဝ်ႈၵႂႃႇ တၢင်းၸႄႈမိူင်းၶၢင် ဢၼ်တိတ်းၸပ်းဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼၼ်ႉ ၺႃးၽေးၾူၼ်ယႂ်ႇလူမ်းလူင် ၽတ်ႉပဝ်ႇလႄႈ ႁဵတ်းႁႂ်ႈ ႁိူၼ်းယေး လူႉၵွႆ တင်းၼမ်။
မိူဝ်ႈၼႆႉဝၼ်းတီႈ 13/5/2020 ယၢမ်းၵၢင်ၼႂ် ၾူၼ်ယႂ်ႇလူမ်းလူင် ၽတ်ႉပဝ်ႇ ထုင်ႉလွႆႁူဝ်သိူဝ် ႁၢဝ်ႈႁႅင်း ၵွၵ်းဢဝ်လင်ၶႃး ႁိူၼ်းၵူၼ်းဝၢၼ်ႈ ၽႃႁိူၼ်း ၵူၼ်းဝၢၼ်ႈ ဝၢၼ်ႈသွၼ်း (မၢၼ်ႈသွၼ်း) ၼႂ်းၸႄႈဝဵင်းၼမ်ႉၶမ်း မိူင်းတႆး ပွတ်းႁွင်ႇ လူႉၵွႆ 4 လင်၊ ဝၢၼ်ႈဢၢႆႇတႂ်ႈ တင်း ဝၢၼ်ႈၼွင်မူၼ်း ဢၼ်တူၵ်းၵႂႃႇ တၢင်းၸႄႈမိူင်းၶၢင် ၼၼ်ႉ ၺႃးၼမ် လူႉၵွႆလိူဝ်ပိူၼ်ႈ။
ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ တီႈထုင်ႉလွႆႁူဝ်သိူဝ် ႁဝ်းၶႃႈ ၼၼ်ႉ လင်ႁိူၼ်းၵူၼ်းဝၢၼ်ႈတုမ်ႉတိူဝ်ႉႁၢဝ်ႈႁႅင်းၶႃႈယဝ်ႉ။ လင်ႁိူၼ်းၵူၼ်းဢၼ်လႆႈလူႉၵွႆ လင်ၶႃးၵွၵ်းပိဝ်ၸွမ်းလူမ်း သေ ဢၼ်လူႉသုမ်းၵႂႃႇၼၼ်ႉ ပေႃးၼပ်ႉၶၼ်ငိုၼ်းတေႉ ႁူဝ်သိပ်းသိပ်းသႅၼ်ယူႇၶႃႈ။ တေႃႈလဵဝ် ယူႇတီႈၽူႈဢုပ်ႇပိူင်ႇ (ၾၢႆႇၽွင်းငမ်း)ၶဝ် တၢင်ႇယွၼ်းဝႆႉ တီႈလူင်ပွင်ၸိုင်ႈၸႄႈဝဵင်းမၢၼ်ႈၸေႊဝႆႉယူႇ” ဝႃႈၼႆ။
ၼႂ်းထုင်ႉလွႆႁူဝ်သိူဝ် ၾင်ႇတၢင်းမိူင်းၶၢင် ၼၼ်ႉ ဝၢၼ်ႈဢၢႆႇတႂ်ႈ(မၢၼ်ႈဢၢႆႇတႂ်ႈ) တုမ်ႉတိူဝ်ႉလူႉၵွႆၼမ်သေပိူၼ်ႈ။ တီႈဝၢၼ်ႈၼႆႉ တႃႇႁိူၼ်းလင်႞ လူႉသုမ်း ဢမ်ႇယွမ်း15 သႅၼ်ပျႃး၊ တႃႇလင်႞သမ်ႉ တေ ဢမ်ႇယွမ်း 7 သႅၼ်။ တၢင်ႇလင်ၵေႃႈ ပေႃးမေးၶိုၼ်းတေႉ တေသဵင်ႈယူႇ တီႈဢေႇသုတ်း ႞ သႅၼ် တေႃႇ 4 – 5 သႅၼ် တေဢမ်ႇယွမ်း၊ ၵျွင်းမုၼ်ၸဝ်ႈ ၊ ႁူင်းႁဵၼ်းၸိူဝ်းၼႆႉၵေႃႈလူႉၵွႆပႃး ။
ထုင်ႉလွႆႁိူဝ်သိူဝ် ၼႆႉ ၵၢႆႇဝႆႉ မိူင်းတႆး ပွတ်းႁွင်ႇ ၸႄႈဝဵင်းၼမ်ႉၶမ်း တင်း ၸႄႈဝဵင်းမၢၼ်ႈၸေႊ ၼႂ်းၸႄႈမိူင်း မိူင်းၶၢင်။ ပဵၼ် ၵူၼ်းၶိူဝ်းတႆး ယူႇသဝ်းၵမ်ႈၼမ်။ ႁူဝ်ဝၢၼ်ႈ မီး 24 ဝၢၼ်ႈ၊ တူၵ်းၵႂႃႇၼႂ်းမိူင်းၶၢင် 18 ဝၢၼ်ႈ။ မိူဝ်ႈ 1947 မွင်းဢဝ် ၵွၼ်းၶေႃၼၼ်ႉ တတ်းဢဝ် ၸႄႈတွၼ်ႈ မၢၼ်ႈမေႃႇ တင်း ၸႄႈတွၼ်ႈၸေႊၼႃး (မိတ်ႉၵျီးၼႃး) ပဵၼ်ၸႄႈမိူင်းၶၢင်ၵႂႃႇလႄႈ ဝဵင်းမၢၼ်ႈၸေႊ ဢၼ်မီးထုင်ႉလွႆႁူဝ်သိူဝ်ၼၼ်ႉၵေႃႈ တူၵ်းၵႂႃႇ ၸွမ်းၼႂ်းၸႄႈမိူင်းၶၢင်။
ၾူၼ်လူင်လူမ်းလူင်မႃးပွၵ်ႈၵမ်းၼႆႉ တႄႇဢဝ် ယၢမ်းၵၢင်ၼႂ် 7 မူင်းၶိုင်ႈ ထိုင်မွၵ်ႈ 8 မူင်း တၢင်းႁိုင် ၸမ်ၶိုင်ႈၸူဝ်ႈမူင်း၊ ၼႂ်းၸိုင်းတႆးပွတ်းႁွင်ႇ တၢင်းဝဵင်းမူႇၸေႊ၊ ၼမ်ႉၶမ်း လႄႈ ပၢင်ႇသၢႆး ဢိၵ်ႇထႅင်ႈလၢႆလၢႆတီႈၵေႃႈ ၺႃးၸွမ်း။ လွင်ႈၶူဝ်းၶွင် ႁိူၼ်းယေးၵူၼ်းဝၢၼ်ႈ တုမ်ႉတိူဝ်ႉ လူႉသုမ်ႉတႄႉ လိူဝ်သေ ဝၢၼ်ႈသွၼ်း ၼႂ်းၸႄႈဝဵင်းၼမ်ႉၶမ်း ဢမ်ႇတူမ်ႉတိူဝ်ႉသင်။။
