ၵူၼ်းၼႂ်းၼွင်ႁၢႆးယႃႈ ဝၢၼ်ႈၵူၼ်း 6 ဝၢၼ်ႈ ဢၼ်မီးၼႂ်းဢိူင်ႇဢိၼ်းသျၢၼ်ႇၵလေႃး ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်းၼၼ်ႉ ဢမ်ႇမီးမေႃယႃ တႃႇယူတ်းယႃ ၵူၼ်းမိူင်းတဵမ်ထူၼ်ႈလႄႈ ၵူၼ်းမိူင်းႁူပ်ႉ လွင်ႈယၢပ်ႇၽိုတ်ႇၵၼ် ဝႃႈၼႆ။

ဢူးတိၼ်ႇသူၺ်ႇဢူး ၽူႈၵွၼ်းဢိူင်ႇဢိၼ်းသျၢၼ်ႇၵလေႃး လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝၢၼ်ႈႁဝ်းၶႃႈၼႆႉ ၵဵဝ်ႇလူၺ်ႈ လွင်ႈပၢႆးယူႇလီမႃးၸိုင် မီးႁွင်ႈၵၢၼ်ၽႄၾၢႆႇလုမ်းလႃး မႄႈလႄႈလုၵ်ႈဢွၼ်ႇ (မိခင်ကလေးဌာနခွဲ ) ဢၼ်လဵဝ်ၵူၺ်းၶႃႈ။ တီႈႁွင်ႈၼၼ်ႉ မီးမေႃယႃ (သားဖွား ဆရာမ) ၵေႃႉၼိုင်ႈလႄႈ ၼၢင်းမေႃယႃ ၸွႆႈၵေႃႉၼိုင်ႈၵူၺ်း၊ မေႃယႃလူင်တႄႉ ဢမ်ႇမီး” ဝႃႈၼႆ။

ယွၼ်ႉၼၼ်လႄႈ တီႈၼႂ်းဢိူင်ႇ ၼႂ်းဝၢၼ်ႈၼႆႉ ၶႂ်ႈႁႂ်ႈမီးႁွင်ႈယႃဢၼ်ၼိုင်ႈၼႆသေ ယၢမ်ႈတၢင်ႇယွၼ်း တီႈၽူႈၵွၼ်းၸႄႈဝဵင်းမႃးယူႇ ဝႃႈၼႆ။

ဢူးတိၼ်ႇသူၺ်ႇဢူး သိုပ်ႇလၢတ်ႈဝႃႈ “ တွၼ်ႈတႃႇ ႁွင်ႈယႃပၢႆးယူႇလီၼႆႉ ၼႂ်းဝၢၼ်ႈႁဝ်းၶႃႈၼႆႉ ယူႇတီႈၽူႈၵွၼ်း ၸႄႈဝဵင်းဝႃႈ ဢမ်ႇၸၢင်ႈပၼ်လႆႈ။ ႁဝ်းၶႃႈ ၵူၼ်းမိူင်းတႄႉ ၶႂ်ႈႁႂ်ႈပၢႆးယူႇလီႁဝ်းၶႅမ်ႉလႅပ်ႈ၊ ယဝ်ႉၵေႃႈ ႁႂ်ႈဢႃယု ယိုၼ်းယၢဝ်းၵႂႃႇၼၼ်ႉၶႃႈယဝ်ႉ” ဝႃႈၼႆ။

ယွၼ်ႉၼၼ်လႄႈ ၵူၼ်းၼႂ်းၼွင်ႁၢႆးယႃႈၼႆႉ သင်ဝႃႈ ဢမ်ႇယူႇလီမႃးၸိုင် လႆႈၵႂႃႇႁူင်းယႃ တီႈၸႄႈဝဵင်းယွင်ႁူၺ်ႈ ယွၼ်ႉဝႃႈ တီႈၼႂ်းၼွင်ဢမ်ႇမီးမေႃယႃလူင်၊ လွင်ႈၼႆႉ ပဵၼ်ဢၼ်ယၢပ်ႇၽိုတ်ႇတွၼ်ႈတႃႇ ၵူၼ်းၼႂ်းၼွင် တႄႉတႄႉ ဝႃႈၼႆ။

ဢိူင်ႇဢိၼ်းသျၢၼ်ႇၵလေႃးၼႆႉ တင်းမူတ်းမီး 6 ဝၢၼ်ႈ လင်ႁိူၼ်းမီး မွၵ်ႈ 900 လင်၊ မုင်ႉႁေႃႁိူၼ်း(ၶွပ်ႈၶူဝ်း) သမ်ႉ မီး 1,400 ပၢႆ ဝႃႈၼႆ။

ဝၢၼ်ႈၵလေႃး ၼႂ်းဢိူင်ႇဢိၼ်းသျၢၼ်ႇၵလေႃးၼႆႉ ပဵၼ်ဝၢၼ်ႈဢၼ်ႁဵတ်းၵိၼ်ၵၢၼ်ၽုၵ်ႇသွမ်ႈ၊ ပိူင်လူင်မၼ်း မၢၵ်ႇၶိူဝ်သူမ်ႈဢွၵ်ႇၼမ်လိူဝ် ပိူၼ်ႈ ၼႆယဝ်ႉ။